Maria Magdaléna tanggah ka langit bari nyusutan cipanon. Guru nu dipikanyaah ku manéhna keur dipaku dina tihang. Harita téh keur usum semi sarta beurang kénéh, tapi ”panonpoe ujug-ujug pareum, reup poek sakurilingna”! (Lukas 23:44, 45) Manéhna narik kaén nu aya dina taktakna tuluy ngariung jeung awéwé séjénna. Gerhana matahari nu ngan sababaraha menit moal mungkin nyababkeun langit jadi poék salila tilu jam. Bisa jadi Maria jeung jalma séjénna nu aya di deukeut Yésus mulai ngadéngé sora sasatoan nu biasana mah ngan kadéngé pas peuting. Sababaraha jalma ”kacida sarieuneunana, sarta ngaromong kieu, ’Saestuna eta jelema teh Putra Allah!’” (Mateus 27:54) Bisa jadi murid-murid Yésus jeung jalma-jalma séjénna nganggap ieu téh tanda ti Yéhuwa. Katingalina Yéhuwa keur ambek jeung sedih pisan ningali sakumaha kejemna jalma-jalma ka putra-Na.

 Maria Magdaléna ogé pasti teu kuateun ningali kaayaan ieu, tapi manéhna tetep maturan Yésus. (Yohanes 19:25, 26) Maria Magdaléna apal Yésus téh pasti keur nyerieun pisan, indungna Yésus ogé butuh dibaturan jeung dikuatkeun.

 Yésus téh geus ngalakukeun loba hal keur Maria, jadi Maria hayang ngabales kahadéan Yésus. Baheula Maria ngarasa hirupna teu aya harepan jeung teu dihargaan ku batur, tapi Yésus nulungan manéhna. Maria jadi boga martabat jeung tujuan hirup. Manéhna ogé jadi boga iman nu pengkuh. Kumaha caritana? Urang bisa diajar naon tina tuladan iman manéhna?

 Dina Kitab Suci, carita ngeunaan Maria dimimitian waktu manéhna ditulungan ku Yésus. Dina jaman éta, pangaruh ti roh-roh jahat kacida kuatna. Roh-roh jahat sok nyerang jalma-jalma, malah loba nu sok kasurupan. Urang teu apal kumaha pangaruh roh jahat ka Maria Magdaléna, tapi urang apal yén aya tujuh roh jahat anu asup kana awakna. Roh-roh éta téh kejem pisan. Untungna, Yésus nyingkirkeun roh-roh jahat éta!—Lukas 8:2.

 Sanggeus dibébaskeun, Maria ngarasa reugreug jeung boga kahirupan nu anyar. Kumaha cara manéhna nganuhunkeun ka Yésus? Manéhna jadi murid Yésus anu satia. Manéhna hayang nyumponan pangabutuh Yésus jeung para rasulna. Priya-priya éta butuh dahareun, pakéan, jeung tempat keur saré. Maranéhna téh lain jalma beunghar jeung teu digawé. Supaya maranéhna bisa terus ngawawar jeung ngajar, kudu aya nu ngurus pangabutuhna.

 Maria jeung sababaraha awéwé nyadiakeun pangabutuh Yésus jeung para rasulna. Maranéhna téh ”ngabarantu ka Yesus jeung murid-murid-Na ku pangabogana masing-masing.” (Lukas 8:1, 3) Bisa jadi, ti antara para awéwé éta aya nu beunghar. Kitab Suci teu ngajelaskeun naon nu dilakukeun ku maranéhna. Bisa waé nyadiakeun dahareun, nyeuseuh pakéan, atawa nyiapkeun pamondokan. Tapi, maranéhna réla nyumponan pangabutuh kira-kira 20 priya éta. Jadi, Yésus jeung para rasulna bisa terus ngawawar. Mémang, Maria apal mun manéhna moal bisa ngabales kahadéan Yésus ka manéhna. Tapi, Maria bungah pisan bisa mantuan Yésus!

 Ayeuna, jalma nu daék ngalalayanan nu séjén sok dianggap rendah ku batur. Tapi, parasaan Allah mah teu siga kitu. Bayangkeun parasaan Allah, pasti Mantenna bungah pisan ningali Maria ngalakukeun nu panghadéna pikeun ngalalayanan Yésus jeung para rasulna. Ayeuna, loba urang Kristen gé bungah waktu ngalalayanan nu séjén. Sakapeung, bantuan leutik atawa kekecapan nu hadé téh gedé mangpaatna. Yéhuwa ngahargaan pisan tindakan saperti kitu.—Siloka 19:17; Ibrani 13:16.

 Dina taun 33 M, loba awéwé milu jeung Yésus ka Pésta Paska di Yérusalém. Maria Magdaléna téh salah sahijina. (Mateus 27:55, 56) Waktu ngadéngé Yésus ditéwak sarta diadilan sapeupeuting, manéhna pasti sedih pisan. Ayeuna kaayaan jadi leuwih parah. Pamingpin agama Yahudi jeung jalma réa maksa Gupernur Pontius Pilatus supaya ngahukum pati Yésus dina tihang. Bisa jadi Maria ningali Yésus nu geus leuleus, awakna geus garetihan, bari kudu nyéréd tihang siksaan. Padahal éta tihang téh engké bakal dipaké keur ngahukum pati anjeunna sorangan.—Yohanes 19:6, 12, 15-17.

 Ayeuna geus tengah poé, tapi kaayaan meni poék. Maria Magdaléna jeung awéwé séjénna nangtung ”deukeut tihang siksaan Yésus”. (Yohanes 19:25, Terjemahan Dunia Baru) Maria terus maturan Yésus nepi ka ahir. Manéhna ningali kumaha Yésus nitipkeun indungna ka Yohanes, rasulna Yésus nu dipikanyaah. Pas pisan saacan maot, Yésus ngajerit ka Bapana, ”Geus tutas!” Maria ngarasa nalangsa pisan. Sanajan kitu, Maria tetep aya di ditu sanggeus Yésus maot. Manéhna gé tetep cicing di deukeut makam anyar tempat mayit Yésus digolérkeun ku Yusup ti Arimatéa.—Yohanes 19:30; Mateus 27:45, 46, 57-61.

 Urang bisa nyonto Maria lamun aya dulur saiman nu keur susah. Meureun urang teu bisa ngaleungitkeun kasusah atawa kanyeri manéhna. Tapi, urang bisa nunjukkeun welas asih jeung nguatkeun manéhna. Manéhna bakal dikuatkeun lamun babaturanana terus maturan. Manéhna pasti kalilipur pisan. Salian ti éta, urang gé ngabuktikeun yén urang ngandelkeun Allah jeung nyaah ka babaturan urang.—Siloka 17:17.

 Sanggeus mayit Yésus aya dina makam, Maria jeung awéwé séjénna nyiapkeun seuseungitan keur dibalurkeun kana mayit Yésus. (Markus 16:1, 2; Lukas 23:54-56) Jadi, isukanana Maria hudang subuh-subuh. Harita téh poé sanggeus poé Sabat. Bayangkeun, pas masih poék kénéh, manéhna jeung awéwé séjénna leumpang ngajugjug ka makam Yésus. Di jalan, maranéhna mikirkeun carana ngagulingkeun batu gedé nu ngahalangan makam. (Mateus 28:1; Markus 16:1-4) Tapi, maranéhna teu nyerah. Lantaran percaya ka Allah, maranéhna ngalakukeun nu panghadéna jeung masrahkeun sésana ka Yéhuwa.

 Bisa jadi, Maria nu mimiti nepi di makam. Tapi pas kakara nepi, Maria olohok. Batu makamna geus digulingkeun, malah makamna gé kosong! Der Maria langsung lumpat, rék méré nyaho Pétrus jeung Yohanes. Bayangkeun, bari hah-héh-hoh manéhna ngomong, ”Gusti urang aya nu maling ti kuburan, duka dibawa ka mana!” Ngadéngé kitu, Pétrus jeung Yohanes buru-buru lumpat ka makam, rék mastikeun mun makamna téh bener-bener kosong, tuluy balik deui ka imah. a—Yohanes 20:1-10.

 Terus, subuh éta kénéh Maria balik deui ka makam. Di ditu téh meni jempling, jaba euweuh sasaha. Maria ngahuleng melongkeun makam nu kosong. Clak, cipanon Maria ngeclak. Manéhna teu percaya kénéh mayit guruna leungit. Ujug-ujug, katingali dua malaikat nu pakéanana bodas diuk di jero makam! Para malaikat nanya, ”Ku naon Nyai ceurik?” Bari reuwas jeung linglung, Maria ngulang deui omonganana ka para rasul. Manéhna ngajawab, ”Gusti abdi aya nu maling, duka dibantun ka mana.”—Yohanes 20:11-13.

 Maria malik, geuningan aya saurang lalaki nu nangtung di tukangeunana. Manéhna teu apal éta téh saha, disangkana tukang kebon nu ngurus éta tempat. Éta lalaki nanya, ”Ku naon Nyai ceurik? Neangan saha?” Maria ngajawab, ”Manawi Juragan anu nyandak Anjeunna, wartoskeun dicandak ka mana, ku abdi bade dibantun deui!” (Yohanes 20:14, 15) Sok pikirkeun, bisaeun kitu Maria ngagotong awak Yésus? Yésus pan lalaki nu kuat jeung gagah. Maria teu mikirkeun hal éta. Manéhna ngan mikirkeun naon nu perlu dilakukeun.

 Lamun urang keur sedih jeung boga masalah nu beurat pisan, sing inget ka Maria Magdaléna. Ulah ngan mikirkeun kalemahan jeung hal-hal nu teu bisa urang lakukeun. Engké urang kalah ka jadi hariwang jeung teu bisa nanaon. Lakukeun waé nu bisa dilakukeun jeung andelkeun Allah, engké hasilna sok leuwih ti nu urang sangka. (2 Korinta 12:10; Pilipi 4:13) Lamun ngandelkeun Allah, urang bakal nyenangkeun Allah Yéhuwa. Éta nu paling penting téh! Éta ogé nu dilakukeun ku Maria, jadi Allah méré berkah nu luar biasa ka manéhna.

 Lalaki nu nangtung di tukangeun Maria téh lain tukang kebon. Lalaki éta téh baheulana tukang kai, terus jadi guru. Maria nyaah pisan ka guru éta. Tapi, Maria teu engeuheun éta téh saha. Maria kalah ka rék ninggalkeun anjeunna. Padahal éta téh Yésus nu geus dihirupkeun deui jadi mahluk roh. Harita Yésus keur ngawujud jadi manusa, tapi awak nu digunakeun ku Yésus téh béda jeung nu saacanna. Matakna, jalma-jalma nu baheulana deukeut jeung Yésus gé henteu engeuheun éta téh Yésus.—Lukas 24:13-16; Yohanes 21:4.

 Kumaha cara Yésus méré nyaho Maria? Anjeunna manggil, ”Maria!” Maria engeuheun éta téh guru nu dipikanyaah ku manéhna. Maria malik, terus manggil ”Rabuni!” Éta téh kecap Ibrani nu biasa dipaké Maria keur manggil Yésus. Maria bungah pisan nepi ka nyenyepeng Yésus jeung embung ngaleupaskeunana.—Yohanes 20:16.

 Yésus apal naon nu dipikirkeun ku Maria. Ceuk Yésus, ”Ulah nyabak ka Kami.” Urang bisa ngabayangkeun cara Yésus ngomong. Pasti ngomongna lemah lembut jeung bari seuri. Anjeunna ngaleupaskeun leungeun Maria sarta ngayakinkeun, ”Kami tacan unggah ka Rama.” Harita can waktuna Yésus indit ka sawarga, aya kénéh nu kudu dilakukeun di dunya. Jadi, Yésus ménta bantuan ka Maria. Yésus ngomong, ”Bejakeun ka dulur-dulur Kami, yen Kami arek mulang ka Rama, nya eta Rama Kami jeung Rama maranehna, Allah Kami jeung Allah maranehna.”—Yohanes 20:17.

 Maria meunang hadiah nu luar biasa! Maria téh jalma nu pangmimitina panggih jeung Yésus nu geus dihirupkeun deui. Ayeuna, manéhna gé meunang tugas penting pikeun méré nyaho warta éta. Bayangkeun Maria téh pasti bungah jeung sumanget pisan néangan murid-murid séjénna. Maria ngabéjaan, ”Abdi mah geus panggih jeung Guru!” Maria nepikeun kabéh nu diomongkeun ku Yésus. Saking bungahna, Maria ngomong meni ngadérédéd. (Yohanes 20:18, SF) Saacanna mah murid-murid kakara ngadéngé carita ti awéwé-awéwé, tapi ayeuna maranéhna meunang carita tambahan deui ti Maria.—Lukas 24:1-3, 10.

 maha réaksi murid-murid? Mimitina mah teu pati alus. Ceuk Kitab Suci, ”Caritaanana ku rasul-rasul teu dipercaya, dianggap omongan nu lain-lain.” (Lukas 24:11) Sabenerna mah niat para rasul téh teu goréng, tapi da éta téh pangaruh ti lingkungan maranéhna digedékeun. Harita para awéwé biasana teu dipercaya. Malah ceuk guru-guru agama mah, awéwé téh teu meunang méré kasaksian di pangadilan. Meureun sacara teu sadar, para rasul geus kapangaruhan ku pandangan éta. Tapi Yéhuwa jeung Yésus mah teu kitu. Malah Yéhuwa jeung Yésus mercayakeun tugas nu penting pisan ka Maria, saurang awéwé nu satia.

 jan teu dipercaya, Maria teu ambek. Manéhna tetep bungah lantaran dipercayakeun tugas ku guruna. Urang Kristen ayeuna gé dipercayakeun tugas pikeun nguarkeun hiji warta. Dina Kitab Suci, warta éta disebut ”Injil Kasalametan ngeunaan Karajaan Allah.” (Lukas 8:1) Yésus méré nyaho ka murid-muridna, moal kabéh jalma bakal ngahargaan warta ti maranéhna. Malahan, kalolobaan mah ngéwaeun. (Yohanes 15:20, 21) Jadi, urang Kristen kudu inget kana tuladan Maria Magdaléna. Sanajan mimitina teu dipercaya ku murid-murid, Maria tetep sumanget lantaran bisa nepikeun warta ngeunaan Yésus nu geus hirup deui!

 ji waktu, Yésus némbongkeun diri ka para rasulna, tuluy ka murid-murid séjénna. Yésus ogé pernah némbongkeun diri ka leuwih ti 500 jalma! (1 Korinta 15:3-8) Teu sual Maria ningali langsung atawa henteu, iman manéhna pasti beuki kuat waktu ngadéngé carita-carita yén Yésus némbongkeun diri. Bisa jadi, Maria Magdaléna téh salah sahiji awéwé nu datang ka Yérusalém dina poé Péntakosta waktu murid-murid Yésus narima roh suci.—Rasul 1:14, 15; 2:1-4.

 ang yakin yén Maria Magdaléna tetep nyepeng pageuh imanna nepi ka ahir kahirupanana. Urang kudu upaya pikeun nyonto manéhna! Kumaha carana? Ku nganuhunkeun kana pangorbanan Yésus sarta daék nulungan batur, bari tetep ngandel ka Allah.