2 Tésalonika 2:1-17
2 Tapi dulur-dulur, ngeunaan kahadiran Juragan urang Isa Al-Masih, sarta iraha urang dikumpulkeun jeung manéhna, urang-urang ménta
2 supaya aranjeun ulah gancang bingung atawa reuwas waktu aya warta yén poé Yéhuwa geus datang, sanajan éta téh sigana ti Allah,* atawa aranjeun ngadéngé ti batur, atawa aranjeun maca surat nu katingalina ti urang-urang.
3 Ulah nepi kasasabkeun* ku naon waé, lantaran poé éta moal waka datang saacan aya kamurtadan jeung disingkabkeunana manusa doraka, nu pasti dibinasakeun.
4 Manéhna téh tukang ngalawan nu munjulkeun diri di antara aallahan jeung sesembahan* séjén. Jadi, manéhna diuk di bait Allah jeung ngaku-ngaku yén manéhna téh allah.
5 Aranjeun inget pan basa bareng jeung aranjeun, kuring pernah méré nyaho hal ieu.
6 Aranjeun apal saha nu nahan supaya manusa doraka éta moal waka disingkabkeun saacan waktuna.
7 Mémang, kadorakaan éta geus aya, tapi susulumputan kénéh nepi ka nu nahanna teu aya deui.
8 Geus kitu, manusa doraka éta bakal disingkabkeun. Ku Juragan Isa, manéhna bakal dibinasakeun ku napas nu ngahébos tina bahamna jeung dimusnakeun waktu kahadiran Juragan jadi nyata.
9 Manusa doraka éta muncul ku karana kawasa Sétan jeung bakal ngalakukeun tindakan nu hébat, tanda nu nyasabkeun, mujijat,
10 jeung sagala tipuan nu licik nu nyasabkeun jalma-jalma nu bakal dibinasakeun. Maranéhna téh dihukum ku sabab teu narima jeung teu mikanyaah bebeneran nu bisa nyalametkeun maranéhna.
11 Éta sababna, maranéhna ku Allah diantep sina kasasabkeun ku pangajaran palsu. Maranéhna jadi percaya kana kabohongan
12 supaya kabéhanana bisa dihukum lantaran teu percaya kana bebeneran tapi mikaresep nu teu bener.
13 Sanajan kitu, dulur-dulur nu dipikanyaah Yéhuwa, urang-urang ngarasa kudu terus nganuhunkeun ka Allah ku lantaran aranjeun, da ti mimiti kénéh Allah geus milih aranjeun pikeun disalametkeun. Aranjeun ku Allah geus disucikeun ku kawasa suci-Na lantaran aranjeun boga iman kana bebeneran.
14 Anjeunna milih aranjeun liwat warta hadé nu diuarkeun ku urang-urang, ku kituna aranjeun bisa dimulyakeun siga Juragan urang Isa Al-Masih.
15 Jadi dulur-dulur, sing pengkuh sarta terus jalankeun naon nu diajarkeun ka aranjeun ku urang-urang liwat ucapan atawa surat.
16 Mugia Juragan Isa Al-Masih jeung Allah, Bapa urang, nu nyaah ka urang, nu salawasna negerkeun, jeung nu méré harepan éndah ku sabab welas asih-Na nu taya bandingna,*
17 ngagedékeun haté jeung nguatkeun aranjeun, supaya aranjeun terus ngalakukeun jeung ngucapkeun naon nu hadé.
Catetan Tambihan
^ As. ”liwat roh”. Tingali ”Roh” dina Daptar Istilah.
^ Atawa ”kaolo”.
^ Atawa ”pupujaan”.
^ Tingali Daptar Istilah.
