Kisah 1:1-26
1 Téofilus, dina surat nu kahiji, kuring nulis ngeunaan sagala nu dilakukeun jeung diajarkeun ku Isa
2 nepi ka manéhna diangkat ka sorga. Saacanna, manéhna dibingbing ku kawasa suci pikeun méré pituduh ka para rasul nu geus dipilih ku manéhna.
3 Sanggeus ngalaman kasangsaraan, Isa sering némbongan ka maranéhna nepi ka maranéhna yakin pisan Isa geus hirup deui. Salila 40 poé, manéhna osok manggihan maranéhna jeung nyaritakeun Pamaréntahan Allah.
4 Waktu panggih jeung maranéhna, Isa nitah kieu, ”Ulah ninggalkeun Yérusalém, tapi terus dagoan naon nu geus dijangjikeun ku Bapa, nu pernah dicaritakeun ku urang téa.
5 Yahya ngabaptis ku cai, ari maranéh mah moal lila deui bakal dibaptis ku kawasa suci.”
6 Waktu keur ngumpul, maranéhna nanya ka Isa, ”Juragan téh rék mulihkeun pamaréntahan di Israél ayeuna?”
7 Isa ngajawab, ”Maranéh mah teu perlu nyaho waktu jeung mangsa nu geus ditangtukeun ku Bapa, da éta mah wewenangna Bapa.
8 Tapi, maranéh bakal narima kawasa waktu dibéré kawasa suci, jeung maranéh bakal méré kasaksian ngeunaan urang di Yérusalém, di sakuliah Yudéa jeung Samaria, nepi ka tempat nu pangjauhna di bumi.”*
9 Sanggeus ngomong kitu, Isa naék ka langit disaksian ku maranéhna, nepi ka teu katingali deui da katutupan ku awan.
10 Waktu maranéhna keur ningalikeun Isa naék ka langit, ujug-ujug aya dua lalaki maké baju bodas nangtung di gigireun maranéhna
11 jeung ngomong, ”Urang Galiléa, ku naon bet narangtung di dinya bari ningali ka langit? Isa nu naék ka langit bakal datang ku cara nu sarua, sakumaha nu bieu katempo ku maranéh waktu manéhna naék ka langit.”
12 Geus kitu, maranéhna balik ka Yérusalém ti Gunung Zaitun, nu teu jauh ti Yérusalém, kira-kira ngan sakilométer.*
13 Pas nepi, maranéhna naék ka hiji kamar di loténg, tempat maranéhna mondok. Di dinya aya Pétrus, Yahya, Yakobus, Andréas, Filipus, Tomas, Bartoloméus, Matius, Yakobus anak Alféus, Simon nu sumanget, jeung Yudas anak Yakobus.
14 Maranéhna sahaté sapikiran terus ngadoa, bareng jeung para wanita, Maryam indungna Isa, jeung adi-adina Isa.
15 Hiji poé, Pétrus nangtung di antara dulur-dulur (jelema nu karumpul téh kabéhna aya 120 urang) jeung ngomong kieu,
16 ”Dulur-dulur, aya ayat nu kudu laksana. Ayat éta ditulis ku Daud nu dibingbing kawasa suci. Daud ngaramal ngeunaan Yudas, nu nungtun jalma-jalma pikeun néwak Isa.
17 Tadina mah manéhna téh salah sahiji ti antara urang jeung dipilih pikeun ngalalayanan bareng jeung urang.
18 (Jelema ieu meuli tanah maké duit hasil ngahianat. Manéhna ragrag tapi sirah ti heula, tuluy beuteungna bucat nepi ka peujitna amburadul.
19 Kabéh penduduk Yérusalém nyahoeun kajadian ieu, matakna dina basa maranéhna, tanah éta disebut Akéldama nu hartina ”Tanah Getih”.)
20 Hal éta geus ditulis dina kitab Jabur, ’Pamatuhanana bakal kosong, moal aya nu nyicingan,’ jeung, ’Tugasna salaku pangawas sing dicokot ku batur.’
21 Ku kituna, manéhna kudu diganti ku jalma nu babarengan jeung urang salila Juragan Isa aya* di antara urang,
22 ti mimiti Isa dibaptis ku Yahya nepi ka Isa diangkat ka sorga. Manéhna gé kudu siga urang, nyaksian Isa dihirupkeun deui.”
23 Jadi, maranéhna ngusulkeun dua jalma, nyaéta Yusuf nu disebut ogé Barsabas atawa Yustus, jeung Matias.
24 Geus kitu, maranéhna ngadoa kieu, ”Yéhuwa, Gusti terang eusi haté abdi sadaya. Ku kituna, tunjukkeun saha nu dipilih ku Gusti ti antara dua jalma ieu
25 supaya manéhna jadi rasul jeung bisa ngajalankeun tugas palayanan, lantaran Yudas geus ninggalkeun tugasna demi nuturkeun kahayangna sorangan.”
26 Jadi, dua ngaran jalma éta diundi, jeung nu kapilih téh Matias. Ku kituna, manéhna dijadikeun rasul bareng jeung 11 rasul séjénna.
Catetan Tambihan
^ Atawa ”nepi ka tungtung bumi”.
^ As. ”kira-kira sajauh perjalanan poé Sabat”. Jarak perjalanan nu bisa dilakukeun ku urang Yahudi dina poé Sabat.
^ Atawa ”ngajalankeun kagiatanana”.
