1 Samuél 12:1-25
12 Ahirna, Samuél ngomong ka sakabéh urang Israél, ”Bapa geus nyumponan* sagala paménta maranéh. Bapa geus ngalantik raja nu bakal maréntah maranéh.
2 Tah, ieu raja nu bakal mingpin* maranéh téh! Bapa geus mingpin maranéh ti ngongora, tapi ayeuna Bapa geus kolot jeung huisan. Anak-anak Bapa gé aya di dieu bareng jeung maranéh.
3 Ayeuna, ieu Bapa. Sok, lamun aya nu rék ngadu ngeunaan Bapa di hareupeun Yéhuwa jeung jalma nu dilantik ku Anjeunna, mangga. Aya teu anu sapi atawa kaldéna pernah dicokot ku Bapa? Aya teu nu pernah ditipu atawa ditindes ku Bapa? Pernah teu Bapa narima sogokan pikeun nutupan kasalahan jalma? Lamun pernah, ku Bapa rék dipulangkeun.”
4 Maranéhna ngajawab, ”Bapa tara nipu, nindes, atawa narima sogokan ti saha waé.”
5 Jadi Samuél ngomong ka maranéhna, ”Poé ieu, Yéhuwa jeung jalma nu dilantik ku Anjeunna jadi saksi yén maranéh teu boga tuduhan nanaon ka* Bapa.” Jawab maranéhna, ”Muhun, Anjeunna* saksina.”
6 Jadi Samuél ngomong ka maranéhna, ”Yéhuwa, nu milih Musa jeung Harun sarta nu mawa karuhun maranéh kaluar ti Mesir, Anjeunna saksina.
7 Ayeuna, pék narangtung. Bapa rék ngahakiman maranéh di hareupeun Yéhuwa jeung ngingetkeun maranéh kana sagala hal hadé nu dilampahkeun ku Yéhuwa keur maranéh jeung karuhun maranéh.
8 ”Sanggeus Yakub datang ka Mesir, sarta karuhun maranéh ménta tulung ka Yéhuwa, Yéhuwa gancang ngutus Musa jeung Harun pikeun mingpin maranéhna kaluar ti Mesir, sarta mawa maranéhna maratuh di tempat ieu.
9 Tapi maranéhna mopohokeun Yéhuwa Allahna. Ku kituna, Anjeunna nyerahkeun* maranéhna ka Siséra panglima tentarana Hazor, ka urang Filistin, jeung ka raja Moab, nu terus merangan maranéhna.
10 Seug maranéhna ménta tulung ka Yéhuwa, ’Abdi sadaya geus nyieun dosa lantaran geus ninggalkeun Yéhuwa tuluy nyembah déwa-déwa Baal jeung patung-patung Astorét. Ayeuna, salametkeun abdi sadaya ti musuh-musuh, supaya bisa nyembah ka Gusti.’
11 Geus kitu Yéhuwa ngutus Yérubaal, Bédan, Yéfta, jeung Samuél, tuluy nyalametkeun maranéh ti musuh-musuh nu aya di sakurilingeun maranéh, ngarah maranéh bisa hirup tengtrem.
12 Waktu maranéh rék diserang ku Nahas raja urang Ammon, maranéh terus ngomong kieu ka Bapa, ’Pokona urang hayang boga raja!’ padahal Yéhuwa Allah maranéh téh Raja maranéh.
13 Tah, ieu raja nu dipilih jeung dipénta ku maranéh. Yéhuwa geus ngalantik saurang raja keur maranéh.
14 Upama maranéh hormat* ka Yéhuwa sarta ngalalayanan jeung taat ka Anjeunna, upama maranéh teu ngalawan paréntah Yéhuwa, sarta upama maranéh jeung raja maranéh nuturkeun Yéhuwa Allah maranéh, éta téh hadé.
15 Tapi, upama maranéh teu taat ka Yéhuwa jeung ngalawan paréntah Yéhuwa, Yéhuwa bakal ngalawan maranéh jeung bapa maranéh.
16 Pék narangtung, jeung tingali tindakan luar biasa nu dilakukeun ku Yéhuwa di hareupeun maranéh.
17 Ayeuna téh keur usum* panén gandum, pan? Bapa rék nyuhunkeun hujan jeung guludug ka Yéhuwa, supaya maranéh nyaho jeung ngarti yén ménta raja téh kajahatan nu luar biasa dina pandangan Yéhuwa.”
18 Geus kitu, Samuél ngadoa ka Yéhuwa. Breg Yéhuwa nurunkeun hujan jeung guludug poé éta. Ku kituna, jalma-jalma jadi sarieuneun pisan ka Yéhuwa jeung Samuél.
19 Kabéh jalma ngomong ka Samuél, ”Pangdoakeun abdi sadaya ka Yéhuwa Allahna Bapa, sabab abdi sadaya embung maot. Abdi sadaya geus ngalampahkeun kajahatan ku cara ménta raja. Éta téh nambahan dosa.”
20 Samuél ngomong ka jalma-jalma, ”Ulah sieun. Mémang maranéh geus ngalampahkeun sakabéh kajahatan ieu. Tapi ayeuna mah ulah ninggalkeun Yéhuwa. Maranéh kudu ngalalayanan Yéhuwa ku sapinuh haté.
21 Ulah ninggalkeun Anjeunna pikeun nuturkeun allah-allah palsu,* nu euweuh gunana jeung teu bisa nyalametkeun, lantaran allah-allah éta téh euweuh naon-naonna.*
22 Demi ngaran-Na nu agung, Yéhuwa moal ninggalkeun umat-Na, sabab Yéhuwa sorangan geus milih maranéh jadi umat-Na.
23 Ari Bapa mah moal mungkin eureun ngadoakeun maranéh, da éta téh dosa ka Yéhuwa. Bapa gé bakal terus ngajarkeun jalan Allah nu hadé jeung bener ka maranéh.
24 Asal, maranéh kudu hormat* ka Yéhuwa, jeung satia* ngalalayanan Anjeunna ku sapinuh haté. Sing aringet kana hal-hal luar biasa anu geus dilampahkeun ku Anjeunna keur maranéh.
25 Tapi lamun maranéh ngahaja ngalampahkeun nu jahat, maranéh jeung raja maranéh bakal dimusnakeun.”
Catetan Tambihan
^ As. ”ngadéngékeun sora maranéh ngeunaan”.
^ As. ”leumpang di hareupeun”.
^ As. ”teu manggihan nanaon dina leungeun”.
^ Atawa bisa jadi ”manéhna”.
^ As. ”ngajual”.
^ As. ”sieun”.
^ Atawa ”usim”.
^ Atawa ”hal-hal nu percumah”.
^ Atawa ”lantaran éta téh percumah”.
^ As. ”sieun”.
^ Atawa ”ku bebeneran”.
