1 Samuél 7:1-17
7 Jadi, urang Kiriat-yéarim datang mawa peti perjangjian Yéhuwa ka imahna Abinadab nu aya di pasir.* Tuluy, maranéhna ngalantik* Éléazar anak Abinadab sina ngajaga peti perjangjian Yéhuwa.
2 Peti perjangjian geus lila aya di Kiryat-yéarim, salila 20 taun. Geus kitu, sakabéh urang Israél ménta pitulung* ka Yéhuwa.
3 Samuél ngomong ka kabéh urang Israél, ”Lamun maranéh sapinuh haté balik ka Yéhuwa, singkirkeun patung allah-allah séjén jeung patung-patung Astorét nu aya di antara maranéh. Haté maranéh kudu sapinuhna ka Yéhuwa, jeung maranéh kudu nyembah ngan ka Anjeunna. Lamun kitu, maranéh bakal disalametkeun ti urang Filistin.”
4 Seug urang Israél miceunan patung-patung Baal jeung Astorét tuluy nyembah ka Yéhuwa hungkul.
5 Ceuk Samuél, ”Kumpulkeun kabéh urang Israél di Mizpa, kuring rék ngadoa ka Yéhuwa demi maranéh.”
6 Jadi, urang Israél ngarumpul di Mizpa. Maranéhna ngala cai tuluy caina dikucurkeun di hareupeun Yéhuwa. Dina poé éta, maranéhna puasa. Ceuk maranéhna, ”Urang kabéh geus nyieun dosa ka Yéhuwa.” Ti dinya, Samuél jadi hakim keur urang Israél di Mizpa.
7 Waktu urang Filistin ngadéngé urang Israél keur ngarumpul di Mizpa, para pangawasa urang Filistin indit rék nyerang Israél. Ngadéngé kitu, urang Israél sarieuneun ka urang Filistin.
8 Jadi urang Israél ngomong kieu ka Samuél, ”Ulah eureun ngadoa ka Yéhuwa Allah urang, supaya urang ditulungan jeung disalametkeun ti urang Filistin.”
9 Seug Samuél nyokot anak domba tuluy nyanggakeun éta jadi korban beuleuman keur Yéhuwa. Samuél ngadoa ménta tulung ka Yéhuwa demi Israél. Doana dijawab ku Yéhuwa.
10 Waktu Samuél nyanggakeun korban beuleuman, urang Filistin nyerang urang Israél. Geus kitu, Yéhuwa ngadatangkeun guludug nu ngagulugur tarik pisan, nepi ka urang Filistin paburisat jeung diéléhkeun di hareupeun Israél.
11 Brul urang Israél kalaluar ti Mizpa ngudag urang Filistin, tuluy maéhan maranéhna nepi ka kiduleun Bét-kar.
12 Geus kitu, Samuél nyokot hiji batu tuluy diteundeun di antara Mizpa jeung Yésyana. Ku manéhna batu éta dingaranan Ébenézér,* da ceuk manéhna, ”Nepi ka ayeuna Yéhuwa geus nulungan urang.”
13 Ku kituna urang Filistin ditalukkeun. Maranéhna teu daratang deui ka daérah Israél. Yéhuwa terus ngalawan urang Filistin sapanjang Samuél hirup kénéh.
14 Salian ti éta, kota-kota jeung daérah Israél nu direbut ku urang Filistin dipulangkeun deui, ti Ékron nepi ka Gat.
Di antara urang Israél jeung urang Amori gé aya karukunan.
15 Samuél terus jadi hakim Israél sapanjang hirupna.
16 Unggal taun, manéhna sok nguriling ka Bétel, Gilgal, jeung Mizpa. Manéhna jadi hakim Israél di tempat-tempat éta.
17 Tapi manéhna sok balik ka Rama, da di dinya imahna. Di dinya gé manéhna jadi hakim Israél sarta nyieun mézbah keur Yéhuwa.
Catetan Tambihan
^ Atawa ”bukit”.
^ As. ”nyucikeun”.
^ Atawa ”tingaraduh ménta pitulung”.
^ Hartina ”Batu Pitulung”.
