1 Tésalonika 3:1-13
3 Bakating ku sono-sonona, urang-urang mutuskeun rék cicing heula di Athéna
2 sarta ngutus Timotius, dulur urang jeung palayan* Allah nu nguarkeun warta hadé ngeunaan Al-Masih. Tujuanana téh pikeun nguatkeun jeung negerkeun aranjeun, supaya iman aranjeun pengkuh.
3 Ku kituna, moal aya nu jadi lemah* ku kasangsaraan-kasangsaraan ieu. Aranjeun gé nyaho sorangan, urang pasti* ngalaman hal-hal nu siga kieu.
4 Basa bareng kénéh jeung aranjeun, urang-urang geus sering ngabéjaan yén urang téh bakal ngalaman kasangsaraan, nya aranjeun gé nyaho éta téh keur kajadian.
5 Éta sababna bakating ku sono-sonona, kuring ngutus Timotius da hayang nyaho kasatiaan aranjeun, bisi aranjeun beunang kagoda ku Iblis* jeung upaya urang-urang nu satékah polah téh jadi percumah.
6 Tapi, Timotius kakara balik ka dieu ti aranjeun sarta mawa kabar alus ngeunaan kasatiaan jeung kanyaah aranjeun. Ceuk manéhna, aranjeun terus inget kana hal-hal éndah waktu urang babarengan, jeung aranjeun téh sono ka urang-urang, sakumaha urang-urang gé sono ka aranjeun.
7 Éta sababna dulur-dulur, sanajan ngalaman kasusahan* jeung kasangsaraan, urang-urang dikuatkeun ku aranjeun jeung ku kasatiaan nu ditémbongkeun ku aranjeun.
8 Urang-urang jadi kuat deui* lamun aranjeun tetep pengkuh salaku murid Juragan.
9 Di hareupeun Allah, urang-urang téh bungah pisan ku lantaran aranjeun. Kumaha urang-urang bisa nganuhunkeun ka Allah pikeun hal éta?
10 Beurang peuting urang-urang husu pisan ngadoa, supaya bisa panggih langsung jeung aranjeun sarta bisa méré bantuan nu dibutuhkeun pikeun nguatkeun iman aranjeun.
11 Mugia Allah, Bapa urang, jeung Juragan urang Isa méré jalan supaya urang-urang bisa datang ka aranjeun.
12 Salian ti éta, mugia Juragan ngabantu supaya kanyaah aranjeun beuki kuat jeung beuki gedé, boh ka dulur-dulur saiman boh ka kabéh jalma, sakumaha kanyaah urang-urang ka aranjeun.
13 Ku kituna, haté aranjeun jadi pengkuh sarta aranjeun jadi taya cacadna jeung suci di hareupeun Allah, Bapa urang, dina mangsa kahadiranana Juragan urang Isa bareng jeung sakabéh jalma sucina.
Catetan Tambihan
^ Atawa bisa jadi, ”batur gawé”.
^ Atawa ”oyag”.
^ Atawa ”urang geus ditetepkeun pikeun”.
^ Atawa ”Tukang Ngagoda éta”.
^ Atawa ”kakurangan”.
^ As. ”Urang-urang hirup”.
