Babad nu Kahiji 13:1-14
13 Daud badami jeung para pamingpin nu ngapalaan 1.000 urang, para pamingpin nu ngapalaan 100 urang, jeung para pamingpin séjénna.
2 Geus kitu, Daud ngomong kieu ka sakumna jamaah Israél, ”Upami aranjeun satuju, sarta upami ieu dikersakeun ku Yéhuwa Allah urang, hayu urang ngirim utusan ka dulur-dulur urang nu aya kénéh di sakuliah wilayah Israél sarta ka para imam sareng urang Léwi di kota-kota aranjeunna nu aya tegalanana, sina ka darieu ngagabung sareng urang.
3 Geus kitu, urang bawa balik peti perjangjian Allah urang.” Éta téh lantaran dina jaman Saul, peti téh teu diurus.
4 Sakumna jamaah nyatujuan, da ceuk pamikir maranéhna, éta téh hadé.
5 Seug Daud ngumpulkeun sakabéh urang Israél, ti walungan* di Mesir nepi ka Lébo-hamat,* pikeun mawa peti perjangjian Allah nu sajati ti Kiriat-yéarim.
6 Daud jeung sakabéh urang Israél indit ka Baala, ka Kiriat-yéarim daérah Yéhuda, rék mawa peti perjangjian Allah nu sajati, nu diuk dina tahta luhureun* kérub-kérub. Di tempat ayana éta peti, jalma-jalma nyebut nami Yéhuwa.
7 Ku maranéhna peti perjangjian Allah nu sajati téh dimuatkeun kana padati anyar, dibawa ti imahna Abinadab. Nu ngarahkeun padati téh Uzza jeung Ahio.
8 Daud jeung sakabéh urang Israél sumanget pisan ngarayakeun éta kajadian hareupeun Allah nu sajati. Maranéhna ngarawih sarta maraén harpa, alat musik séjénna nu maké senar, rabana, simbal, jeung tarompét.
9 Tapi barang maranéhna nepi di tempat ngirik* Khidon, Uzza nyekel jeung nahan éta peti, da peti téh ampir tiguling gara-gara sapi-sapi éta.
10 Ku kituna, Yéhuwa ambek pisan ka Uzza. Uzza dipaéhan ku Anjeunna lantaran nyekel éta peti. Manéhna maot di dinya kénéh, di hareupeun Allah.
11 Tapi, Daud jadi ambek lantaran Yéhuwa ngabudalkeun amarah-Na ka Uzza. Ku kituna, éta tempat disebut Péréz-uzza* nepi ka ayeuna.
12 Poé éta, Daud jadi sieuneun ka Allah nu sajati. Ceuk manéhna, ”Ari kieu mah kumaha kuring rék mawa peti perjangjian Allah nu sajati ka tempat kuring?”
13 Daud henteu mawa peti perjangjian ka tempatna di Kota Daud. Tapi, manéhna nitah supaya éta peti dibawa ka imahna Obéd-édom urang Gat.
14 Peti perjangjian Allah nu sajati téh tetep aya di imahna Obéd-édom salila tilu bulan. Yéhuwa terus ngaberkahan rumah tanggana Obéd-édom jeung sakabéh pangabogana.
Catetan Tambihan
^ Atawa ”ti Syihor”, nyaéta salah sahiji cabang Walungan Nil.
^ Atawa ”jalan asup ka Hamat”.
^ Atawa bisa jadi ”di antara”.
^ Misahkeun gandum tina cangkangna.
^ Hartina ”Budalna Amarah ka Uzza”.
