Babad nu Kahiji 20:1-8
20 Dina awal taun,* waktu raja-raja maraju perang, Yoab mingpin pasukanna pikeun nyerang jeung ngancurkeun nagri urang Ammon. Manéhna maju ngepung Raba, tapi Daud mah tetep di Yérusalém. Yoab nyerang Raba sarta ngancurkeun éta kota.
2 Geus kitu, Daud nyokot makuta emas tina sirahna Déwa Malkam tuluy dipaké. Éta makuta beuratna kira-kira 34 kilo* sarta dihias ku batu-batu permata. Manéhna gé nyokot loba pisan jarahan ti éta kota.
3 Daud ngaboyong jalma-jalma nu aya di dinya. Maranéhna dititah gawé maké ragaji batu, pakakas nu seukeut tina beusi, jeung kampak. Sakabéh jalma di kota-kota urang Ammon dikitukeun ku Daud. Ahirna, Daud jeung sakabéh prajuritna baralik ka Yérusalém.
4 Sanggeus kitu, aya perang jeung urang Filistin di Gézér. Harita, Sibékai urang Husya maéhan Sipai turunan Réfaim. Ku kituna, urang Filistin diéléhkeun.
5 Tuluy, aya perang deui jeung urang Filistin. Élhanan anak Yair maéhan Lahmi adina Goliat urang Gat, nu gagang tumbakna sagedé kai dina alat tinun.
6 Aya perang deui di Gat. Di dinya, aya hiji lalaki nu awakna gedé pisan. Ramo dina leungeun jeung sukuna téh masing-masing aya 6, jadi kabéh ramona aya 24. Manéhna gé turunan Réfaim.
7 Manéhna terus nangtang Israél, jadi dipaéhan ku Yonatan, anak Syiméa lanceukna Daud.
8 Maranéhna téh turunan Réfaim nu aya di Gat. Maranéhna dipaéhan ku Daud jeung para palayanna.
