Babad nu Kahiji 21:1-30
21 Geus kitu, Sétan* ngalawan Israél sarta ngajurung Daud pikeun ngitung jumlah urang Israél.
2 Jadi, Daud ngomong ka Yoab jeung para pamingpin nu ngapalaan rahayat, ”Jung itung jumlah urang Israél ti Béér-syéba nepi ka Dan, tuluy laporkeun ka kuring supaya kuring nyaho jumlah maranéhna.”
3 Tapi Yoab ngomong kieu, ”Mugia Yéhuwa ngagandakeun jumlah umat-Na nepi ka 100 kalieun! Gusti Raja, maranéhna sadaya téh hambana Raja, pan? Ku naon Gusti Raja hoyong ngalakukeun ieu? Paménta Raja téh bisa ngalantarankeun Israél ngalampahkeun dosa.”
4 Sanajan kitu, Raja embung ngadéngékeun omongan Yoab. Bral Yoab indit ka sakuliah Israél, geus kitu balik deui ka Yérusalém.
5 Jumlah jalma nu geus didaptar dilaporkeun ku Yoab ka Daud. Di sakuliah Israél, aya 1.100.000 jalma nu mawa pedang, ari di Yéhuda mah aya 470.000 jalma nu mawa pedang.
6 Tapi, urang Léwi jeung Bényamin mah henteu didaptarkeun, sabab Yoab ijid kana paréntah Raja.
7 Allah nu sajati kacida teu resepna kana ieu perkara, jadi Anjeunna ngahukum Israél.
8 Daud ngomong ka Allah nu sajati, ”Abdi tos milampah dosa ageung. Mugia Gusti ngahampura kasalahan hamba Gusti ieu. Tindakan abdi téh bodo pisan.”
9 Geus kitu Yéhuwa ngomong ka Gad, jalma nu nepikeun titingalian ti Allah ka Daud, kieu cenah,
10 ”Jung indit tuluy béjakeun ka Daud, ’Ieu nu diucapkeun ku Yéhuwa, ”Kuring méré tilu piliheun ka manéh, sok pilih mana nu kudu dilakukeun ku Kuring.”’”
11 Jadi, Gad ngadep ka Daud tuluy ngomong kieu, ”Ieu nu diucapkeun ku Yéhuwa, ’Sok pilih salah sahiji:
12 Rék tilu taun kalaparan, atawa rék tilu bulan manéh diéléhkeun ku musuh jeung diudag-udag ku pedang musuh, atawa rék tilu poé malaikat Yéhuwa ngahukum sakuliah Israél maké pedang Yéhuwa, nyaéta ku wabah panyakit, nu nyababkeun loba jalma maot di sakuliah nagri?’ Mangga pikirkeun bener-bener, abdi kedah ngajawab kumaha ka Allah nu ngutus abdi.”
13 Jadi Daud ngajawab kieu ka Gad, ”Aduh, abdi téh meni susah haté. Tapi tibatan dihukum ku jalma, mending abdi dihukum ku Yéhuwa, da Anjeunna mah kacida welas asihna.”
14 Geus kitu, Yéhuwa ngadatangkeun wabah panyakit ka Israél, balukarna aya 70.000 urang Israél nu maot.
15 Tuluy, Allah nu sajati ngutus malaikat ka Yérusalém pikeun maéhan pendudukna. Tapi basa éta rék dilampahkeun ku malaikat, Yéhuwa ningali jeung ngarasa sedih* lantaran geus ngadatangkeun éta wabah. Anjeunna ngomong ka éta malaikat, ”Geus, cukup! Turunkeun leungeun manéh.” Harita, malaikat Yéhuwa keur nangtung di deukeut tempat ngirik* milikna Ornan urang Yébus.
16 Barang tanggah ka luhur, Daud ningali malaikat Yéhuwa nangtung di antara bumi jeung langit bari mawa pedang nu diarahkeun ka Yérusalém. Brek Daud jeung para kokolot nu harita maraké kaén goni sarujud.
17 Daud ngomong kieu ka Allah nu sajati, ”Abdi nu miwarang supaya jalma-jalma diétang, abdi nu milampah dosa, abdi ogé nu lepat. Tapi domba-domba ieu, maranéhna téh salah naon? Nun Yéhuwa Allah abdi, keun abdi sareng kulawarga pun bapa waé nu dihukum ku Gusti. Ari umat Gusti mah ulah disina keuna ku ieu wabah.”
18 Geus kitu, malaikat Yéhuwa nitah Gad méré nyaho Daud pikeun nyieun mézbah keur Yéhuwa di tempat ngirik milikna Ornan urang Yébus éta.
19 Barang ngadéngé omongan Gad nu ditepikeun maké nami Yéhuwa, bral Daud indit.
20 Harita téh Ornan keur ngirik gandum. Barang manéhna malik jeung ningali éta malaikat, opat anakna nu lalaki nu harita bareng jeung manéhna langsung nyarumput.
21 Barang ningali Daud datang, gancang Ornan kaluar ti tempat ngirik tuluy sujud ka Daud.
22 Ceuk Daud, ”Jual tempat ngirik anjeun ka kuring. Di dieu, kuring rék nyieun mézbah keur Yéhuwa, supaya wabah panyakit nu nyerang ieu bangsa bisa eureun. Sok jual, ku kuring rék dibayar sapantesna.”
23 Tapi Ornan ngomong ka Daud, ”Mangga candak baé, teras lampahkeun naon waé sakumaha saéna Gusti Raja. Mangga, ieu sapi-sapi kanggo kurban beuleuman, sakantenan ieu papan paranti ngirik kanggo suluhna sarta gandum kanggo kurban kadaharan. Ieu sadayana ku abdi dipasihkeun ka Raja.”
24 Tapi, Raja Daud ngomong ka Ornan, ”Entong kitu. Éta kabéh ku kuring kudu dibeuli ku harga nu sapantesna. Kuring moal nyokot milik anjeun tuluy ngabaktikeunana ka Yéhuwa, atawa ngabaktikeun kurban beuleuman lamun kuring teu mayar nanaon.”
25 Jadi, Daud méré emas ka Ornan kira-kira 7 kilo* keur meuli éta tempat.
26 Tuluy di dinya, Daud nyieun mézbah pikeun Yéhuwa sarta ngabaktikeun kurban beuleuman jeung kurban karukunan. Seug manéhna sasambat ka Yéhuwa. Doana dijawab, gur seuneu ti langit meuleum kurban beuleuman dina mézbah.
27 Tuluy, Yéhuwa nitah malaikat nu tadi téa nyarungkeun pedangna.
28 Waktu Daud ningali doana dijawab ku Yéhuwa di tempat ngirik milikna Ornan urang Yébus téa, manéhna terus ngurban di dinya,
29 padahal harita téh tabernakel Yéhuwa nu dijieun ku Musa aya di tanah gurun, ari mézbah keur kurban beuleuman aya di pasir* di Gibéon.
30 Tapi, Daud teu wani ka ditu pikeun ménta pituduh Allah. Manéhna sieuneun ku pedang malaikat Yéhuwa.
Catetan Tambihan
^ Atawa bisa jadi ”salah sahiji nu nentang”, ngamaksudkeun hiji jalma.
^ Atawa ”kaduhung”.
^ Misahkeun gandum tina cangkangna.
^ As. ”600 syékel”. Tingali Lamp. B14.
^ Atawa ”bukit”.
