Raja-Raja nu Kahiji 4:1-34
4 Raja Sulaéman jadi raja di sakuliah Israél.
2 Ieu pajabat-pajabatna: Azaria anak Zadok jadi imam,
3 Élihoréf jeung Ahiya anak-anakna Syisya jadi sékertaris, Yéhosyafat anak Ahilud jadi tukang nyatet,
4 Bénaya anak Yéhoyada jadi panglima, Zadok jeung Abiatar jadi imam,
5 Azaria anak Natan jadi kapala para pajabat daérah, Zabud anak Natan jadi imam jeung sobatna* raja,
6 Ahisyar jadi pangawas istana, sarta Adoniram anak Abda ngawaskeun jalma-jalma nu diwajibkeun gawé keur raja.
7 Aya 12 pajabat daérah di sakuliah Israél nu nyadiakeun dahareun keur raja jeung rumah tanggana. Masing-masing aya giliranana, sabulan séwang unggal taunna.
8 Ieu ngaran maranéhna: Anak Hur nu ngawasaan daérah pagunungan Éfraim,
9 anak Dékér nu ngawasaan Makaz, Syaalbim, Bét-syémés, jeung Élon-bét-hanan,
10 anak Héséd nu ngawasaan Arubot (manéhna ngawasaan Sokoh jeung sakuliah tanah Héfér),
11 anak Abinadab nu ngawasaan sakuliah Lamping* Dor (pamajikanana téh Tafat anak Sulaéman),
12 Baana anak Ahilud nu ngawasaan Taanakh, Mégido, jeung sakuliah Bét-syéan, nu aya di sisi Zarétan handapeun Yizréél, ti Bét-syéan nepi ka Abél-méhola nepi ka wilayah Yokméam,
13 anak Gébér nu ngawasaan Ramot-giléad (manéhna ngawasaan désa-désa pakémahan Yair anak Manasyé, nu aya di Giléad, jeung wilayah Argob, nu aya di Basyan, nyaéta 60 kota gedé nu dibénténgan jeung pantona maké palang-palang tambaga),
14 Ahinadab anak Ido nu ngawasaan Mahanaim,
15 Ahimaaz nu ngawasaan Naftali (pamajikanana téh Basémat, anak Sulaéman ogé),
16 Baana anak Husyai nu ngawasaan Asyér jeung Béalot,
17 Yéhosyafat anak Paruah nu ngawasaan Isakhar,
18 Syiméi anak Éla nu ngawasaan Bényamin,
19 Gébér anak Uri nu ngawasaan tanah Giléad, nyaéta tanahna Sihon raja urang Amori jeung Og raja Basyan. Sakabéh pajabat daérah éta diawaskeun ku hiji pajabat daérah.
20 Urang Yéhuda jeung urang Israél téh lobana siga keusik di basisir. Maranéhna teu kurang dahareun teu kurang inumeun, sarta baragja hirupna.
21 Sulaéman ngawasaan sakabéh karajaan, ti Walungan Éfrat nepi ka nagrina urang Filistin jeung nepi ka wawatesan Mesir. Karajaan-karajaan éta marawa upeti jeung ngalalayanan Sulaéman sapanjang Sulaéman hirup.
22 Ari bahan dahareun anu dipikabutuh ku Sulaéman unggal poéna téh nyaéta tipung lemes kira-kira 6.600 liter* jeung tipung biasa kira-kira 13.200 liter,*
23 sapi kandang 10, sapi nu dikencar 20, domba 100, kitu deui uncal jalu, kijang, uncal jinis lianna, jeung manuk nu lalintuh.
24 Sulaéman ngawasaan sakabéh wilayah kuloneun Walungan Éfrat, ti Tifsa nepi ka Gaza, kaasup raja-rajana. Sakabéh wilayah nu dikawasaan ku manéhna téh ayem tengtrem.
25 Sapanjang pamaréntahan Sulaéman, urang Yéhuda jeung urang Israél nu aya di Dan nepi ka Béér-syéba téh hirup tengtrem, masing-masing baroga tangkal anggur jeung tangkal ara sorangan.
26 Sulaéman gé boga kuda* 12.000 jeung kandang 4.000* keur kuda nu narik karéta-karétana.
27 Para pajabat daérah éta nyadiakeun dahareun keur Raja Sulaéman jeung kabéh jalma nu dahar di méja raja. Dina bulan giliranana, unggal pajabat daérah boga tanggung jawab pikeun mastikeun euweuh nu kurang.
28 Maranéhna gé nyadiakeun barli jeung jarami keur parab kuda, kaasup kuda nu narik karéta, di mana waé dibutuhkeun. Éta kabéh kudu disadiakeun, da mémang éta tugas maranéhna.
29 Sulaéman ku Allah dibéré kabijaksanaan jeung pangarti nu luar biasa. Manéhna gé dibéré kanyaho* nu loba pisan lir keusik di basisir.
30 Euweuh nu bisa nandingan kabijaksanaan Sulaéman, boh jalma ti nagri-nagri Wétan boh urang Mesir.
31 Manéhna leuwih bijaksana ti sakabéh jelema, ngaleuwihan Étan turunan Ézrah sarta anak-anak Mahol, nyaéta Héman, Kalkol, jeung Darda. Ngaranna kasohor ka sakabéh bangsa di sakurilingna.
32 Manéhna ngarang* 3.000 paribasa jeung 1.005 lagu.
33 Manéhna bisa nerangkeun ngeunaan tatangkalan, ti tangkal aras di Lébanon nepi ka pepelakan hisop* nu jaradi dina témbok. Manéhna gé bisa nerangkeun ngeunaan sasatoan, bangsa manuk, bangsa réptil, bangsa lauk, jeung serangga.
34 Jalma-jalma ti sagala bangsa daratang hayang ngadéngékeun kabijaksanaan Sulaéman, kaasup raja-raja di sakuliah dunya nu geus ngadéngé ngeunaan kabijaksanaan Sulaéman.
Catetan Tambihan
^ Atawa ”jalma kapercayaan”.
^ Atawa ”Léréng”.
^ As. ”30 kor”. Tingali Lamp. B14.
^ As. ”60 kor”.
^ Atawa ”pasukan kuda”.
^ Jumlah ieu disebutkeun dina sababaraha manuskrip jeung dina 2Bab 9:25. Aya manuskrip nu nyebutkeun jumlahna téh 40.000.
^ Atawa ”pangaweruh”.
^ Atawa ”ngucapkeun”.
^ Tingali Daptar Istilah.
