Raja-Raja nu Kahiji 5:1-18
5 Basa Hiram raja Tirus ngadéngé yén Sulaéman geus dilantik jadi raja ngaganti Daud bapana, manéhna ngutus sababaraha palayanna ka Sulaéman, sabab geus lila Hiram nyobat jeung Daud.*
2 Terus Sulaéman ngirim pesen kieu ka Hiram,
3 ”Anjeun tangtu terang, Daud pun bapa teu tiasa ngabangun bumi kanggo ngamulyakeun nami Yéhuwa Allahna. Harita téh anjeunna merangan seueur musuh, sanajan tungtungna dipasihan kaunggulan ku Yéhuwa.
4 Tapi, ayeuna abdi ku Yéhuwa dipasihan katengtreman, bébas ti musuh-musuh di sakuriling abdi. Teu aya nu ngalawan abdi, jeung abdi teu kedah sieun ku nanaon.
5 Jadi, abdi téh hoyong ngabangun bumi kanggo ngamulyakeun nami Yéhuwa Allah abdi, sakumaha jangji Yéhuwa ieu ka Daud pun bapa, ’Nu bakal ngabangun imah keur ngaran Kuring téh nya putra manéh, nu ku Kuring disina diuk dina tahta manéh ngaganti manéh.’
6 Jadi abdi badé nyuhunkeun pitulung, nyuhunkeun palayan-palayan anjeun mangnuarankeun kai-kai aras Lébanon kanggo abdi, tangtu engké dibantuan ku palayan-palayan abdi. Palayan-palayan anjeun gé tangtu ku abdi dibayar sakumaha paménta anjeun. Anjeun gé terang, jalmi-jalmi di dieu mah teu tarampil nuar kai saperti urang Sidon.”
7 Barang ngadéngé pesen ti Sulaéman, Hiram kacida atoheunana jeung ngomong kieu, ”Mugia dinten ieu Yéhuwa dipuji, sabab Anjeunna tos masihan ka Daud putra nu bijaksana kanggo mingpin bangsa nu sakitu ageungna!”
8 Jadi Hiram ngabales pesen ti Sulaéman, ”Pesen ti anjeun tos katampi. Sadaya paménta anjeun bakal dilaksanakeun. Abdi bakal nyadiakeun kai aras jeung kai juniper.
9 Ku palayan-palayan abdi, kai-kai golondongan bakal diturunkeun ti Lébanon ka laut. Engké kai-kaina dibeungkeut, didamel rakit-rakit, terus dicandak ngaliwatan laut ka tempat nu tos ditangtukeun ku anjeun. Saatosna dugi, beungkeutanana badé dipangmukaankeun, engké kantun dicandak ku anjeun. Kanggo buruhna, nyuhunkeun disadiakeun tuangeun kanggo saeusi istana abdi.”
10 Geus kitu, Hiram nyadiakeun kai aras jeung kai juniper sakumaha nu dipikahayang ku Sulaéman.
11 Sabalikna, Sulaéman méré gandum 3.200 ton* keur pasadiaan dahareun istana Hiram. Manéhna gé méré minyak zaitun nu pangalusna 4.400 liter.* Éta nu dibikeun ku Sulaéman ka Hiram unggal taunna.
12 Yéhuwa méré Sulaéman kabijaksanaan, sakumaha jangji-Na. Hiram jeung Sulaéman téh boga hubungan nu alus, sarta duanana nyieun perjangjian.
13 Raja Sulaéman ngawajibkeun 30.000 lalaki ti sakuliah Israél sina digarawé keur manéhna.
14 Maranéhna diutus ka Lébanon, unggal bulanna 10.000 urang. Di Lébanon sabulan, di imahna masing-masing dua bulan. Jalma-jalma nu diwajibkeun gawé éta diawaskeun ku Adoniram.
15 Sulaéman boga kuli* 70.000 urang jeung tukang motong batu di gunung 80.000 urang.
16 Pajabat daérah nu jadi mandorna aya 3.300 urang.
17 Ku paréntah Raja, jalma-jalma nu digawé éta ngagali batu-batu nu galedé jeung marahal, tuluy dipotongan pikeun dijadikeun pondasi bait.
18 Jadi tukang-tukangna Sulaéman, tukang-tukangna Hiram, jeung urang Gébal motongan batu. Geus kitu, kai jeung batu disiapkeun pikeun ngabangun bait.
Catetan Tambihan
^ Atawa ”Hiram téh nyaah ka Daud”.
^ As. ”20.000 kor”. Tingali Lamp. B14.
^ As. ”20 kor”.
^ Atawa ”kuli panggul”.
