Raja-Raja nu Kahiji 7:1-51
7 Sulaéman ngabangun istanana sorangan. Butuh waktu 13 taun nepi ka kabéhanana anggeus dibangun.
2 Manéhna gé ngabangun Gedong Leuweung Lébanon anu panjangna 100 hasta,* lébarna 50 hasta, jeung jangkungna 30 hasta. Éta gedong dibangun luhureun opat jajar tihang tina kai aras. Luhureun tihang-tihang éta aya balok-balok kai aras.
3 Di luhur éta gedong diamparan papan-papan aras anu dipasang di luhur kai-kai nu malang. Éta kai ditunjang ku pilar-pilar nu jumlahna* 45, aya 15 unggal barisna.
4 Aya tilu tingkat jandéla nu dielisan, unggal jandéla téh pahareup-hareup jeung jandéla séjénna.
5 Kabéh jandéla nu pahareup-hareup di tilu tingkat éta téh bentukna pasagi, kitu ogé jeung kabéh panto sarta kusénna.
6 Sulaéman gé ngabangun Balé* Pilar anu panjangna 50 hasta jeung lébarna 30 hasta. Di hareupna aya téras anu dihateupan, disangga ku pilar-pilar.
7 Salian ti éta, manéhna gé ngabangun Balé* Singgasana anu disebut ogé Balé Pangadilan. Ti lanté nepi ka lalangitna, kabéh dilapisan ku papan-papan aras. Éta téh tempat Sulaéman mutus perkara.
8 Ari istana pamatuhan Sulaéman mah ayana di buruan séjén, misah ti éta Balé, tapi cara ngabangunna téh sarua jeung éta Balé. Terus manéhna gé ngabangun hiji istana anu ampir sarua jeung éta Balé keur pamajikanana, nyaéta anak awéwéna Firaun.
9 Kabéh bangunan, ti pondasi nepi ka batu témbokan nu pangluhurna, ti luar nepi ka buruan gedé, dijieun tina batu-batu nu marahal. Batu-batuna geus dipotongan nurutkeun ukuranana, unggal sisina diratakeun ku ragaji.
10 Pondasi-pondasina dijieun tina batu-batu nu marahal jeung galedé pisan, ukuranana aya nu 10 hasta, aya ogé nu 8 hasta.
11 Di luhurna gé aya batu-batu nu marahal, nu geus diukur jeung dipotongan, sarta aya kai aras.
12 Di sakuriling buruan gedéna, aya témbok anu dijieun tina batu potongan tilu lapis jeung balok kai aras salapis. Éta sarua jeung témbok nu ngurilingan buruan jero imah Yéhuwa jeung téras éta imah.*
13 Raja Sulaéman ngutus jalma sina ngajemput Hiram ti Tirus.
14 Indungna Hiram téh randa ti kaom Naftali, ari bapana mah urang Tirus, tukang tambaga. Hiram ogé tukang tambaga anu ahli, boga loba pangalaman, jeung ngarti pisan kana tambaga.* Jadi, manéhna datang jeung ngajalankeun tugas ti Raja Sulaéman.
15 Prak Hiram digawé nyieun dua pilar tambaga, unggal pilar téh jangkungna 18 hasta, kurilingna 12 hasta.*
16 Ti dinya, manéhna nyieun dua mamakutaan tambaga keur dipasang luhureun pilar. Unggal mamakutaan téh jangkungna 5 hasta.
17 Unggal mamakutaan dihias ku tujuh rarantéan nu ngabentuk jaring.
18 Pikeun ngahias mamakutaan, dijieun dua jajar dadalimaan nu ngurilingan jaring. Dua mamakutaan éta dihiasna sarua.
19 Dina mamakutaan pilar hareupeun tepas* téa, aya hiasan nu rupana kembang bakung, jangkungna téh 4 hasta.
20 Bagian ieu téh ayana di luhur bagian mamakutaan nu ngajendol nu dikurilingan ku jaring. Dina mamakutaan anu dipasang luhureun dua pilar, dina unggal mamakutaan, diterapan dadalimaan 200 siki, diduajajarkeun.
21 Éta dua pilar téh ditempatkeunana ku Hiram hareupeun tepas bait.* Nu di beulah katuhu* dingaranan Yakhin,* nu di beulah kénca* dingaranan Boaz.*
22 Di luhur pilar-pilar, aya hiasan nu rupana kembang bakung. Ahirna, éta pilar-pilar anggeus dijieun.
23 Hiram nyieun hiji wadah paranti nampung cai nu disebut Laut Tambaga. Bentukna bunder, jerona 5 hasta, garis tengahna 10 hasta, jeung kurilingna 30 hasta.*
24 Handapeun biwir Laut, sakurilingna dihias ku wawaluhan dua jajar, unggal hastana sapuluh wawaluhan, dicitakna téh ngahiji jeung éta Laut.
25 Éta Laut ditumpangkeun kana 12 sasapian jalu tina tambaga. Nu 3 nyanghareup ka kalér, 3 ka kulon, 3 ka kidul, 3 deui ka wétan. Kabéh sasapian éta nukangan Laut.
26 Kandelna Laut téh sadampal leungeun.* Bentuk biwirna siga biwir cangkir, siga kembang bakung nu keur mekar. Éta Laut bisa nampung cai 44.000 liter.*
27 Hiram gé nyieun sapuluh gorobag* tina tambaga. Masing-masing panjangna 4 hasta, lébarna 4 hasta, jeung jangkungna 3 hasta.
28 Kabéh gorobag dijieunna kawas kieu: Unggal sisina dijieun tina pelat-pelat tambaga anu dipasangkeun kana rangka pasagi.
29 Dina pelat-pelat éta aya gambar singa, sapi jalu, jeung kérub. Rangkana gé dihias ku gambar-gambar nu sarua. Di luhur gambar sapi jalu jeung handapeun gambar singa, aya gambar timbul nu bentukna rundayan.
30 Unggal gorobag boga opat roda tambaga. Roda-roda éta dihubungkeun ku babatang* tambaga jeung disangga ku opat tihang panyangga nu aya di opat juru gorobag. Panyangga handapeun jolang, dina unggal sisina téh dihias ku gambar timbul nu bentukna rundayan.
31 Di luhur gorobag aya rangka nu ngalingker kawas mamakutaan, paranti nempatkeun jolang. Di bagian handap mamakutaan nepi ka dasar jolang jangkungna téh sahasta. Éta mamakutaan téh ngahiji jeung panyangga. Mun dijumlah, jangkungna téh 1,5 hasta. Di sakuriling mamakutaan téh aya pelat-pelat nu diukir, pelatna téh pasagi lain bunder.
32 Opat rodana téh aya di handap sisi-sisi gorobag, masing-masing roda jangkungna 1,5 hasta. Babatang tambaga nu nahan roda-roda éta ngahiji jeung éta gorobag.
33 Roda-rodana dijieun kawas roda karéta kuda. Unggal bagian roda, nyaéta babatang nu nahan roda, pinggiran roda,* jari-jari, jeung porosna, dijieun tina tambaga.
34 Dina unggal gorobag, unggal juruna aya tihang panyangga, dijieunna maké citakan nu sarua jeung gorobag.
35 Di luhur gorobag aya rangka nu ngalingker kawas mamakutaan, jangkungna satengah hasta. Mamakutaan, pelat-pelatna, jeung panyangga dijieun dina hiji citakan.
36 Mamakutaan jeung pelat-pelatna, kabéh dihias ku ukiran kérub, singa, jeung tangkal palem. Sakuriling mamakutaan gé dihias ku gambar rundayan.
37 Kitu dijieunna sapuluh gorobag téh. Kabéhanana maké citakan nu sarua, jadi ukuran jeung modélna gé sarua.
38 Geus kitu, Hiram nyieun sapuluh jolang tambaga keur sapuluh gorobag, hiji jolang keur hiji gorobag. Unggal jolang téh garis tengahna 4 hasta, jeung bisa nampung cai 880 liter.
39 Seug gorobag-gorobag téh ku Hiram ditempatkeun, lima di katuhueun imah lima deui di kéncaeunana. Ari Laut ditempatkeunana katuhueun imah, di beulah kidul wétan.
40 Hiram gé nyieun jolang-jolang séjénna, sosodok-sosodok, jeung baskom-baskom.
Ku kituna, Hiram ngaréngsékeun kabéh pagawéanana keur Raja Sulaéman di imah Yéhuwa, nyaéta
41 dua pilar jeung mamakutaanana anu bentukna siga mangkok, dua jaring keur ngahias dua mamakutaan éta,
42 opat ratus dadalimaan keur dua jaring nu ngahias dua mamakutaan éta, unggal jaringna téh dua jajar dadalimaan,
43 sapuluh gorobag jeung sapuluh jolangna,
44 Laut Tambaga jeung 12 sapi jalu handapeunana,
45 wadah paranti lebu, sosodok, mangkok, jeung kabéh parabot tina tambaga nu harérang. Éta kabéh dijieun ku Hiram keur Raja Sulaéman jang dipaké di imah Yéhuwa.
46 Raja nitah supaya éta barang-barang téh dijieunna dina citakan tina taneuh liket di daérah Yordan, di antara Sukot jeung Zarétan.
47 Bakating ku loba, kabéh barang téh teu ditimbang-timbang acan ku Sulaéman, jadi beuratna tambaga téh teu kanyahoan sabaraha-sabarahana.
48 Sulaéman gé méré paréntah pikeun nyieun parabotan keur di imah Yéhuwa, nyaéta mézbah emas, méja emas paranti neundeun roti nu dibaktikeun ka Allah,
49 wadah-wadah lampu tina emas murni nu diteundeun hareupeun rohangan nu pangjerona, lima di katuhu lima di kénca, kekembangan, lampu-lampu, jeung cacapit sumbu, kabéhanana téh tina emas.
50 Aya ogé baskom, alat paranti mareuman seuneu dina sumbu, mangkok, cangkir, jeung wadah ruhak, kabéhanana tina emas murni. Aya deui nu dijieun téh, nyaéta éngsél-éngsél panto keur rohangan nu pangjerona, atawa Rohangan Mahasuci, jeung éngsél-éngsél panto keur Rohangan Suci, kabéhanana tina emas.
51 Ku kituna, kabéh nu kudu dipigawé di imah Yéhuwa téh diréngsékeun ku Raja Sulaéman. Seug Sulaéman mawa asup barang-barang anu geus disucikeun ku Daud bapana. Pérak, emas, jeung barang-barang séjénna disimpen di rohangan tempat nyimpen harta di imah Yéhuwa.
Catetan Tambihan
^ 1 hasta = 44,5 sénti. Tingali Lamp. B14.
^ Meureun ngamaksudkeun jumlah kai-kai nu malang luhureun pilar.
^ Atawa ”Téras”.
^ Atawa ”Téras”.
^ Atawa bisa jadi ”téras istana”.
^ Atawa ”parunggu”.
^ Atawa ”jeung butuh tali 12 hasta pikeun ngurilingan unggal pilar”.
^ Rohangan panghareupna.
^ Atawa ”kidul”.
^ Bisa jadi hartina ”Maké Kakuatan”. Dibacana téh sanggeus ngaran pilar nu hijina deui, nyaéta ”Yakhin”.
^ Atawa ”kalér”.
^ Hartina ”Mugia [Yéhuwa] Ngukuhkeun Ieu Tempat”.
^ Maksudna, Rohangan Suci.
^ Atawa ”jeung butuh tali 30 hasta pikeun ngurilinganana”.
^ Kira-kira 7,4 sénti. Tingali Lamp. B14.
^ As. ”2.000 bat”. Tingali Lamp. B14.
^ Atawa ”gorobag paranti ngakut cai”.
^ Atawa ”as roda”.
^ Atawa ”pélek”.
