2 Samuél 17:1-29
17 Ahitofél ngomong kieu ka Absalom, ”Idinan abdi milih 12.000 prajurit pikeun ngudag Daud peuting ieu.
2 Abdi rék nyerang pas manéhna keur leuleus jeung teu walakaya,* tangtu manéhna bakal jadi geumpeur. Ku kituna, jalma-jalma nu milu bareng jeung manéhna bakal kalabur. Ngan Raja nu rék dipaéhan ku abdi.
3 Geus kitu abdi rék mawa balik kabéh jalma ka anjeun. Lamun jalma nu diincer ku anjeun maot, kabéh jalma bakal balik ka anjeun sarta hirup tengtrem.”
4 Absalom jeung sakabéh kokolot Israél nganggap naséhat éta téh alus pisan.
5 Tapi ceuk Absalom, ”Cikan geroan Husyai urang Arkhi téa. Urang déngékeun heula kumaha saran manéhna.”
6 Jadi Husyai ngadep ka Absalom. Tuluy Absalom ngomong ka manéhna, ”Ieu naséhat ti Ahitofél, turutkeun ulah? Lamun ulah, coba kumaha saran manéh?”
7 Husyai ngajawab, ”Naséhat Ahitofél nu ayeuna mah henteu saé!”
8 Husyai neruskeun, ”Apal nyalira pan bapa anjeun jeung anak buahna téh jalma nu perkasa. Maranéhna gé keur arambek pisan siga biruang nu kaleungitan anak-anakna di tegalan. Salian ti éta, bapa anjeun téh saurang prajurit, jadi manéhna moal bakal meuting bareng jeung nu séjénna.
9 Pasti ayeuna manéhna keur nyumput di salah sahiji guha* atawa tempat séjénna. Lamun manéhna nyerang ti heula, engké nu ngadéngé éta bakal ngomong kieu, ’Baladna Absalom geus diéléhkeun!’
10 Mun geus kitu mah jalma nu wanian kawas singa gé pasti jadi sieun, sabab sakabéh urang Israél apaleun bapa anjeun téh jalma nu perkasa, anak buahna gé jalma nu wanian.
11 Saran abdi mah kieu: Kumpulkeun sakabéh urang Israél ti Dan nepi ka Béér-syéba nu lobana siga keusik di basisir. Pingpin maranéhna ka pangperangan.
12 Di mana waé kapanggihna, urang serang manéhna siga ibun nu ragrag kana taneuh. Ku kituna, moal aya saurang-urang acan anu salamet, boh manéhna boh baladna.
13 Lamun manéhna mundur ka salah sahiji kota, kabéh urang Israél bakal mawa tali ka kota éta, tuluy bakal nyéréd kota éta ka lebak nepi ka teu nyésa karikil hiji-hiji acan.”
14 Tuluy Absalom jeung sakabéh urang Israél ngomong kieu, ”Naséhatna Husyai urang Arkhi téh leuwih alus tibatan naséhatna Ahitofél!” Yéhuwa mémang boga niat rék ngagagalkeun naséhat alus Ahitofél, supaya Yéhuwa bisa ngadatangkeun musibat ka Absalom.
15 Ka dieunakeun, Husyai ngomong ka Imam Zadok jeung Imam Abiatar, ”Ieu naséhat Ahitofél ka Absalom jeung para kokolot Israél. Ari naséhat abdi mah kieu.
16 Sok ayeuna mah gancang kirim pesen ka Daud, béjaan manéhna, ’Peuting ieu ulah cicing di pameuntasan walungan di gurun keusik, tapi Raja kudu meuntas. Lamun henteu, Raja jeung sakabéh rombongan Raja bakal dibasmi.’”*
17 Ari Yonatan jeung Ahimaaz cicingna téh di luar kota, nyaéta di Én-rogél. Éta téh supaya maranéhna teu kanyahoan ku batur. Jadi, saurang palayan awéwé datang ngabéjaan maranéhna, geus kitu maranéhna indit ngabéjakeun éta ka Raja Daud.
18 Tapi, aya saurang lalaki ngora nu ningali maranéhna, tuluy ngalapor ka Absalom. Jadi duanana gancang indit tuluy nepi ka imah saurang lalaki di Bahurim nu boga sumur di buruanana. Maranéhna asup ka jero sumur,
19 terus ku pamajikan lalaki éta, sumurna ditutupan maké kaén. Kaénna diamparan ku sisikian nu geus ditutu. Éta teu kanyahoan ku sasaha.
20 Para palayan Absalom datang ka imah awéwé éta tuluy nanya, ”Mana Ahimaaz jeung Yonatan?” Ku awéwé éta dijawab, ”Tadi arindit ka arah walungan.” Geus kitu para palayan éta néangan maranéhna, tapi teu kapanggih, jadi balik wéh ka Yérusalém.
21 Sanggeus para palayan éta indit, Yonatan jeung Ahimaaz kaluar ti sumur, tuluy indit ngalapor kieu ka Raja Daud, ”Ahitofél tos nyieun rencana rék nyerang Juragan, jadi sok énggal peuntasan walungan.”
22 Harita kénéh, Daud jeung rombonganana indit meuntasan Walungan Yordan. Pas bray isuk téh kabéhanana geus meuntas.
23 Waktu nyaho naséhatna teu diturut, Ahitofél masang pelana kana kaldéna tuluy balik ka lemburna. Sanggeus méré wasiat ka kulawargana, manéhna gantung diri tuluy maot. Geus kitu, manéhna dikuburkeun di makam karuhunna.
24 Harita, Daud indit ka Mahanaim, ari Absalom meuntasan Walungan Yordan bareng jeung sakabéh pasukan Israél.
25 Absalom ngangkat Amasa jadi panglima gaganti Yoab. Bapana Amasa téh Itra urang Israél, ari indungna mah Abigail anak Nahas. Abigail téh adina Zéruya indungna Yoab.
26 Absalom jeung pasukan Israél masang kémah di daérah Giléad.
27 Barang nepi di Mahanaim, Daud didatangan ku Syobi anak Nahas ti Raba daérahna urang Ammon, Makhir anak Amiél ti Lo-débar, sarta Barzilai urang Giléad ti Rogélim.
28 Maranéhna mawa kasur, baskom, wawadahan tina taneuh liket, gandum, barli, tipung, sisikian nu disangray, kacang babi, kacang miju, sisikian nu digaringkeun,
29 madu, mantéga, domba, jeung kiju. Kabéh kadaharan éta dibawa keur Daud jeung rombonganana, sabab ceuk maranéhna, ”Jalma-jalma ieu tangtu lapar, leuleus, jeung haus di gurun keusik.”
