2 Samuél 24:1-25
24 Yéhuwa ambek deui ka Israél waktu aya nu ngajurung Daud* ku kekecapan ieu, ”Sok itung jumlah urang Israél jeung Yéhuda.”
2 Jadi Raja ngomong ka Yoab, kapala pasukan nu keur bareng jeung manéhna, ”Jung indit ka sakabéh kaom Israél ti Dan nepi ka Béér-syéba, tuluy jieun daptar jalma-jalmana, supaya kuring nyaho jumlah sakabéh rahayat.”
3 Tapi Yoab ngomong ka Raja, ”Mugia Yéhuwa Allah Raja ngagandakeun jumlah rahayat nepi ka 100 kalieun, sarta mugia éta kasaksian ku Gusti Raja! Tapi ku naon Gusti Raja hoyong ngalakukeun ieu?”
4 Sanajan kitu, Raja embung ngadéngékeun omongan Yoab jeung para komandan bawahanana. Jadi, maranéhna indit ti hareupeun Raja pikeun ngadaptar urang Israél.
5 Maranéhna meuntasan Walungan Yordan tuluy masang kémah di Aroér, di katuhueun* kota di tengah-tengah lebak. Terus maranéhna indit ka daérah urang Gad sarta ka Yazér.
6 Geus kitu, maranéhna indit ka Giléad sarta ka daérah Tahtim-hodsyi, ti dinya ka Dan-yaan tuluy muter ka Sidon.
7 Terus maranéhna indit ka bénténg Tirus sarta ka sakabéh kota urang Héwi jeung urang Kanaan. Ahirna, maranéhna nepi di Béér-syéba nu aya di Négéb di daérah Yéhuda.
8 Sanggeus ngurilingan sakuliah nagri salila 9 bulan 20 poé, maranéhna balik ka Yérusalém.
9 Jumlah jalma nu geus didaptar dilaporkeun ku Yoab ka Raja. Aya 800.000 prajurit Israél nu mawa pedang, sarta 500.000 urang Yéhuda.
10 Tapi sanggeus ngitung jumlah maranéhna, haté* Daud rumasa salah. Daud ngomong ka Yéhuwa, ”Abdi geus nyieun dosa gedé. Yéhuwa, hampura kasalahan hamba Gusti ieu. Tindakan abdi téh bodo pisan.”
11 Waktu Daud hudang isuk-isuk, Yéhuwa ngomong kieu ka Nabi Gad, nyaéta jalma nu nepikeun titingalian ti Allah ka Daud,
12 ”Jung indit tuluy béjakeun ka Daud, ’Ieu nu diucapkeun ku Yéhuwa, ”Kuring méré tilu piliheun ka manéh, sok pilih mana nu kudu dilakukeun ku Kuring.”’”
13 Jadi Gad ngadep ka Daud tuluy ngomong kieu, ”Badé milih nu mana: tujuh taun kalaparan di sakuliah nagri, tilu bulan Raja kudu kabur lantaran diudag-udag ku musuh, atawa tilu poé aya wabah panyakit di sakuliah nagri? Mangga pikirkeun bener-bener, abdi kedah ngajawab naon ka Allah nu ngutus abdi.”
14 Jadi Daud ngajawab kieu ka Gad, ”Aduh, abdi meni susah haté. Tapi tibatan dihukum ku jalma, mending dihukum ku Yéhuwa, da Anjeunna mah gedé welas asihna.”
15 Geus kitu, Yéhuwa ngadatangkeun wabah panyakit ka Israél, ti isuk-isuk nepi ka waktu nu geus ditangtukeun. Balukarna, aya 70.000 jalma nu maot ti Dan nepi ka Béér-syéba.
16 Waktu malaikat ngarahkeun leungeunna ka Yérusalém rék maéhan pendudukna, Yéhuwa ngarasa sedih* lantaran geus ngadatangkeun wabah éta. Anjeunna ngomong ka malaikat éta, ”Geus cukup! Turunkeun leungeun manéh.” Harita malaikat Yéhuwa keur aya di deukeut tempat ngirik* milikna Arauna urang Yébus.
17 Waktu ningali malaikat nu maéhan jalma-jalma, Daud ngomong ka Yéhuwa, ”Abdi nu nyieun dosa, abdi ogé nu salah. Tapi domba-domba ieu, maranéhna téh salah naon? Keun wéh abdi sareng kulawarga bapa abdi nu dihukum ku Gusti.”
18 Jadi poé éta, Gad ngadep ka Daud tuluy ngomong kieu, ”Geura jieun mézbah keur Yéhuwa di tempat ngirik milikna Arauna urang Yébus éta.”
19 Barang ngadéngé omongan Gad, Daud indit ka ditu sakumaha paréntah Yéhuwa.
20 Waktu ningali ka handap, Arauna ningali Raja datang bareng jeung para palayanna. Gancang Arauna mapagkeun tuluy sujud ka Raja.
21 Arauna nanya, ”Aya naon Gusti Raja datang ka tempat hamba Raja ieu?” Jawab Daud, ”Kuring rék meuli tempat ngirik ieu ti manéh. Di dieu, kuring rék nyieun mézbah keur Yéhuwa, supaya wabah panyakit nu nyerang bangsa ieu bisa eureun.”
22 Tapi Arauna ngomong ka Daud, ”Mangga wéh candak tempat ieu ku Gusti Raja, tuluy sanggakeun korban sakumaha saéna Raja. Mangga ieu sapi-sapi kanggo korban beuleuman. Sakantenan ieu papan paranti ngirik sarta kai tanggungan kanggo suluhna.
23 Nun Raja, ieu sadayana ku abdi dipasihkeun ka Raja.” Terus Arauna ngomong deui, ”Mugia Raja diberkahan ku Yéhuwa Allahna Raja.”
24 Tapi Raja ngomong ka Arauna, ”Entong kitu, éta kabéh ku kuring kudu dibeuli. Kuring moal nyanggakeun korban beuleuman ka Yéhuwa Allah kuring lamun kuring teu mayar nanaon.” Jadi Daud mayar 50 syékel* pérak keur meuli tempat ngirik éta jeung sapi-sapina.
25 Tuluy Daud nyieun mézbah keur Yéhuwa di dinya, sarta nyanggakeun korban beuleuman jeung korban karukunan. Geus kitu, Yéhuwa ngabulkeun paménta Daud keur bangsa éta. Rep wabah panyakit nu nyerang Israél téh eureun.
Catetan Tambihan
^ Atawa ”waktu Daud kajurung”.
^ Atawa ”di kiduleun”.
^ Atawa ”haté sanubari”.
^ Atawa ”kaduhung”.
^ Misahkeun gandum tina cangkangna.
^ 1 syékel = 11,4 g. Tingali Lamp. B14.
