2 Samuél 5:1-25
5 Ka dieunakeun, sakabéh kaom Israél datang ka Daud di Hébron. Ceuk maranéhna, ”Urang kabéh téh pan sagetih sadaging jeung* anjeun.
2 Basa Saul masih kénéh jadi raja, anjeun nu mingpin Israél dina pangperangan.* Terus Yéhuwa ngomong kieu ka anjeun, ’Manéh bakal jadi pangangon umat Kuring Israél sarta jadi pamingpin maranéhna.’”
3 Ku kituna, sakabéh kokolot Israél datang ka Raja di Hébron. Raja Daud nyieun perjangjian jeung maranéhna di Hébron di hareupeun Yéhuwa. Geus kitu, maranéhna ngalantik Daud jadi raja Israél.
4 Daud umur 30 taun waktu jadi raja. Manéhna maréntah salila 40 taun.
5 Di Hébron, manéhna maréntah Yéhuda salila 7 taun 6 bulan. Di Yérusalém, manéhna maréntah sakabéh Israél jeung Yéhuda salila 33 taun.
6 Geus kitu, Raja jeung pasukanna indit ka Yérusalém rék merangan urang Yébus nu matuh di dinya. Maranéhna ngaléléwé Daud, ”Manéh moal bisa lah asup ka dieu! Ku nu lolong jeung ku nu pincang gé manéh tangtu bisa diusir.” Ceuk pamikir maranéhna, ’Daud moal bisa asup ka dieu.’
7 Tapi Daud ngarebut bénténg Zion, nu ayeuna jadi Kota Daud.
8 Poé éta, Daud ngomong kieu ka nu rék nyerang urang Yébus, ”Jig asup liwat torowongan cai tuluy serang urang Yébus. Serang kabéh jalma, kaasup ’nu lolong jeung nu pincang’. Kuring geuleuh ka maranéhna.” Éta sababna jalma-jalma sok ngomong kieu, ”Nu lolong jeung nu pincang moal bakal asup ka imah.”
9 Tuluy bénténg éta dicicingan ku Daud sarta disebut* Kota Daud. Daud ngabangun témbok jeung bangunan-bangunan séjén di luhureun Pasir* sarta di tempat-tempat séjén di kota éta.
10 Ku kituna, Daud beuki kuat. Manéhna disarengan ku Yéhuwa, Allah pangawasa pasukan sorga.
11 Hiram raja Tirus ngirim utusan ka Daud. Manéhna gé ngirimkeun kai aras, tukang kai, jeung tukang batu keur ngabangun témbok. Maranéhna mulai ngabangun istana Daud.
12 Daud nyaho Yéhuwa geus ngukuhkeun manéhna salaku raja di Israél. Anjeunna gé ngalantarankeun karajaan Daud beuki kuat demi Israél umat-Na.
13 Sanggeus pindah ti Hébron ka Yérusalém, Daud boga leuwih loba selir jeung pamajikan. Manéhna gé boga leuwih loba anak lalaki jeung anak awéwé.
14 Anak-anak Daud nu lahir di Yérusalém téh nyaéta Syamua, Syobab, Natan, Sulaéman,
15 Ibhar, Élisyua, Néfég, Yafia,
16 Élisyama, Éliada, jeung Élifélét.
17 Waktu urang Filistin ngadéngé Daud geus dilantik jadi raja Israél, maranéhna kabéh datang rék nyerang Daud. Ngadéngé kitu Daud indit ka panyumputan.
18 Urang Filistin datang tuluy nyebar di Lebak Réfaim.
19 Daud nanya ka Yéhuwa, ”Abdi kedah maju ngalawan urang Filistin atawa ulah? Gusti bakal nyerahkeun maranéhna ka abdi moal?” Yéhuwa ngajawab, ”Sok maju, Kuring pasti nyerahkeun urang Filistin ka manéh.”
20 Jadi, Daud indit ka Baal-pérazim tuluy ngéléhkeun maranéhna di dinya. Pok Daud ngomong, ”Yéhuwa geus ngéléhkeun musuh-musuh kuring di hareupeun kuring, kawas cai nu ngajebol témbok.” Éta sababna tempat éta dingaranan Baal-pérazim.*
21 Urang Filistin ninggalkeun berhala-berhalana di dinya, tuluy ku Daud jeung baladna dicarokotan.
22 Ka dieunakeun, urang Filistin datang deui tuluy nyebar di Lebak Réfaim.
23 Daud nanya ka Yéhuwa, tapi dijawab ku Anjeunna, ”Ulah nyerang maranéhna ti hareup. Tapi maranéh kudu muter, tuluy serang ti tukang. Serang maranéhna di hareupeun gumplukan rungkun.*
24 Waktu manéh ngadéngé sora kawas sora barisan prajurit di luhureun rungkun,* gancang maju, sabab Yéhuwa geus aya di hareupeun manéh pikeun ngéléhkeun pasukan Filistin.”
25 Jadi, Daud ngajalankeun paréntah Yéhuwa. Manéhna ngéléhkeun urang Filistin ti Géba terus nepi ka Gézér.
Catetan Tambihan
^ As. ”tulang jeung daging”.
^ As. ”mawa Israél kaluar jeung asup”.
^ Atawa bisa jadi ”sarta ku manéhna disebut”.
^ Atawa ”Bukit; Milo”. Istilah Ibrani nu hartina ”gundukan”.
^ Hartina ”Ahli Ngajebol”.
^ As. ”rungkun baka”.
^ As. ”rungkun baka”.
