Dua Babad 3:1-17
3 Sulaéman ngawangun bumina Yéhuwa di Yérusalém di Gunung Moria. Baheula, Yéhuwa némbongan ka Daud bapana di dinya, di tempat ngirik* milikna Ornan urang Yébus. Éta téh tempat nu disiapkeun ku Daud pikeun ngawangun bait.
2 Sulaéman mimiti ngawangun téh dina poé kadua bulan kadua, dina taun kaopat pamaréntahanana.
3 Pondasi nu dipasang ku Sulaéman pikeun ngawangun bumina Allah nu sajati téh panjangna 60 hasta jeung lébarna 20 hasta, nurutkeun ukuran hasta dina jaman éta.*
4 Hareupeun éta bumi aya tepas.* Panjang tepas téh 20 hasta, sarua jeung lébar éta bumi, jangkungna gé 20 hasta.* Bagian jero éta bumi dilapis ku emas murni.
5 Rohangan utama dipasangan kai juniper, dilapis ku emas murni, sarta dihias ku gambar-gambar tangkal palem jeung ranté.
6 Geus kitu, éta bumi dihias ku batu-batu permata nu aralus. Emas nu dipaké téh asalna ti Parwaim.
7 Tuluy éta bumi, kaso-kaso dina hateup, bagian lawang nu panghandapna, témbok-témbok, jeung panto-pantona téh dilapis ku emas. Ari témbok-témbokna diukiran ku gambar kérub-kérub.
8 Manéhna gé nyieun Rohangan Mahasuci. Panjang rohanganana téh sarua jeung lébar éta bumi, nyaéta 20 hasta. Lébar éta rohangan téh 20 hasta. Éta rohangan dilapis ku emas murni nu beuratna kira-kira 20,5 ton.*
9 Beurat emas keur paku-paku téh nyaéta 570 gram.* Rohangan-rohangan hateup gé ku manéhna dilapis ku emas.
10 Geus kitu, manéhna nyieun dua patung kérub nu dilapis ku emas di Rohangan Mahasuci.
11 Panjang jangjang kérub nu kahiji jeung nu kadua téh jumlahna 20 hasta. Keur kérub nu kahiji, jangjangna nu hiji téh panjangna 5 hasta sarta antel kana témbok. Jangjang nu hiji deui gé panjangna 5 hasta sarta antel kana jangjang kérub nu kadua.
12 Keur kérub nu kadua, jangjangna nu hiji téh panjangna 5 hasta sarta antel kana témbok. Jangjang nu hiji deui gé panjangna 5 hasta sarta antel kana jangjang kérub nu kahiji.
13 Ti tungtung jangjang kérub nu kahiji nepi ka tungtung jangjang kérub nu kadua téh panjangna 20 hasta. Kérub-kérub éta nangtung bari nyanghareup ka Rohangan Suci.
14 Manéhna gé nyieun hordéng tina benang biru, wol ungu, benang beureum, jeung linén lemes, tuluy éta hordéng disulam ku gambar-gambar kérub.
15 Terus, manéhna nyieun dua pilar hareupeun éta bumi, jangkungna 35 hasta. Mamakutaan nu aya di luhur unggal pilar téh jangkungna 5 hasta.
16 Manéhna gé nyieun ranté-ranté nu kawas kongkorong nu diterapkeun kana mamakutaan nu aya dina pilar-pilar éta. Dina ranté-ranté éta, manéhna masangkeun 100 dadalimaan.
17 Dua pilar éta téh ditempatkeun hareupeun bait, hiji di katuhu hiji di kénca. Nu di beulah katuhu* dingaranan Yakhin,* nu di beulah kénca* dingaranan Boaz.*
Catetan Tambihan
^ Misahkeun sisikian tina cangkangna.
^ 1 hasta biasa = 44,5 sénti, tapi aya nu boga pandangan ”ukuran hasta dina jaman éta” téh sarua jeung hasta panjang, nyaéta 51,8 sénti. Tingali Lamp. B14.
^ Atawa ”rohangan panghareupna”.
^ Sababaraha naskah kuno téh nyebutkeun ”120”, ari naskah séjénna jeung sababaraha tarjamahan mah nyebutkeun ”20 hasta”.
^ As. ”nu beuratna 600 talénta emas”. Tingali Lamp. B14.
^ As. ”50 syékel”. Tingali Lamp. B14.
^ Atawa ”kidul”.
^ Hartina ”Mugia [Yéhuwa] Ngukuhkeun Ieu Tempat”.
^ Atawa ”kalér”.
^ Bisa jadi hartina ”Maké Kakuatan”.
