Raja-Raja nu Kadua 13:1-25
13 Dina taun ka-23 pamaréntahan Yéhoas anak Ahazia raja Yéhuda, Yéhoahaz anak Yéhu jadi raja Israél di Samaria. Manéhna maréntah salila 17 taun.
2 Manéhna terus ngalampahkeun nu jahat dina pandangan Yéhuwa. Manéhna gé nuturkeun dosa Yéroboam anak Nébat, nu ngalantarankeun Israél ngalampahkeun dosa. Éta dosa teu disingkahan ku manéhna.
3 Jadi, amarah Yéhuwa ngagedur ka Israél. Israél ku Anjeunna diantep sina terus diéléhkeun ku Hazaél raja Siria jeung ku Bén-hadad anak Hazaél.
4 Teu lila ti dinya, Yéhoahaz sasambat ménta dipikarunya ku Yéhuwa. Panyambatna didéngékeun ku Yéhuwa, lantaran Anjeunna geus ningali kumaha raja Siria nindes Israél.
5 Jadi Yéhuwa méré hiji panulung pikeun ngabébaskeun urang Israél tina genggeman Siria. Ku kituna, urang Israél bisa hirup tengtrem kawas saacanna.
6 (Najan kitu, maranéhna masih kénéh marigawé dosa nu dimimitian ku kulawarga Yéroboam, nu ngalantarankeun Israél ngalampahkeun dosa. Éta dosa terus dilampahkeun ku maranéhna. Tihang-tihang berhala* nu aya di Samaria gé teu diancurkeun ku maranéhna.)
7 Nu nyésa tina pasukan Yéhoahaz téh ngan 50 prajurit kuda, 10 karéta perang, jeung 10.000 prajurit nu leumpang. Nu séjénna mah geus béak digempur ku raja Siria, dileyekan kawas kekebul di pangirikan.*
8 Riwayat Yéhoahaz, kaasup sagala nu dilampahkeunana jeung kahébatanana, ditulis dina buku sajarah ngeunaan raja-raja Israél.
9 Ahirna, Yéhoahaz maot siga karuhunna jeung dikuburkeun di Samaria. Yéhoas anakna ngaganti manéhna jadi raja.
10 Dina taun ka-37 pamaréntahan Yéhoas raja Yéhuda, Yéhoas anak Yéhoahaz jadi raja Israél di Samaria. Manéhna maréntah salila 16 taun.
11 Manéhna terus ngalampahkeun nu jahat dina pandangan Yéhuwa. Yéhoas gé terus nuturkeun sakabéh dosa Yéroboam anak Nébat, nu nyababkeun urang Israél ngalampahkeun dosa. Dosa-dosa éta terus dilampahkeun ku manéhna.
12 Riwayat Yéhoas, kaasup sagala nu dilampahkeunana jeung kahébatanana sarta kumaha manéhna merangan Amazia raja Yéhuda, ditulis dina buku sajarah ngeunaan raja-raja Israél.
13 Ahirna, Yéhoas maot siga karuhunna jeung dikuburkeun di Samaria, ngahiji jeung raja-raja Israél séjénna. Yéroboam* anakna ngaganti manéhna jadi raja.
14 Hiji mangsa, Élisa gering ripuh nepi ka téréh maot. Jadi, Yéhoas raja Israél ngalongok manéhna. Bari ceurik sesegruk, Yéhoas ngomong, ”Bapa, bapa! Tingali, karéta perang jeung pasukan kuda Israél!”
15 Ceuk Élisa, ”Cokot busur jeung panahna.” Seug ku Yéhoas dicokot.
16 Geus kitu, Élisa ngomong ka raja Israél, ”Sok cekel busurna.” Sanggeus Yéhoas nyekel busur panah, Élisa numpangkeun leungeunna kana leungeun Raja.
17 Ceuk Élisa, ”Buka jandéla nu nyanghareup ka wétan.” Jadi ku Raja dibuka. Élisa ngomong, ”Lepas panahna!” Seug panah téh ku Raja dilepas. Élisa ngomong deui, ”Panah kaunggulan* ti Yéhuwa, panah kaunggulan* nu ngéléhkeun Siria! Anjeun bakal ngéléhkeun pasukan Siria di Afék nepi ka euweuh nu nyésa.”
18 Élisa ngomong deui, ”Cokot panah-panah éta.” Seug dicokot. Tuluy manéhna ngomong ka raja Israél, ”Teunggeul taneuh ku panah-panah éta.” Sanggeus neunggeul tilu kali, Yéhoas eureun.
19 Ningali kitu, hamba Allah nu bener jadi ambek, pok ngomong, ”Kuduna mah anjeun neunggeul taneuh téh lima atawa genep kali, sangkan pasukan Siria diéléhkeun ku anjeun nepi ka euweuh nu nyésa! Mun kieu mah anjeun ngan bakal ngéléhkeun Siria tilu kali.”
20 Ka dieunakeun, Élisa maot jeung dimakamkeun. Ti saprak harita, pasukan rampog ti Moab datang ka éta nagri unggal awal taun.*
21 Hiji poé, waktu jalma-jalma keur ngagotong mayit pikeun dimakamkeun, maranéhna ningali pasukan rampog. Gancang éta mayit téh dialungkeun ka jero makamna Élisa, tuluy maranéhna tingbalecir. Barang éta mayit antel kana tulang-taléngna Élisa, dak dumadak manéhna hirup deui tuluy cengkat.
22 Salila pamaréntahan Yéhoahaz, Israél ditindes ku Hazaél raja Siria.
23 Tapi Yéhuwa masih kénéh perhatian, karunya, jeung bageur ka maranéhna. Anjeunna inget kana perjangjiana-Na jeung Ibrahim, Ishak, sarta Yakub. Anjeunna teu hayang maranéhna dimusnakeun. Anjeunna gé teu nyingkirkeun maranéhna ti hareupeun Anjeunna nepi ka ayeuna.
24 Waktu Hazaél raja Siria maot, Bén-hadad anakna ngaganti manéhna jadi raja.
25 Baheula, Hazaél perang jeung Yéhoahaz sarta ngarebut kota-kotana. Tapi ayeuna, kota-kota éta direbut deui ku Yéhoas anak Yéhoahaz ti Bén-hadad anak Hazaél. Yéhoas ngéléhkeun Bén-hadad tilu kali tuluy ngarebut deui kota-kota Israél.
Catetan Tambihan
^ Tingali Daptar Istilah.
^ Tempat misahkeun gandum tina cangkangna.
^ Maksudna, Yéroboam II.
^ Atawa ”kasalametan”.
^ Atawa ”kasalametan”.
^ Ieu téh kira-kira bulan Maret atawa April. Tingali Lamp. B15.
