Raja-Raja nu Kadua 22:1-20
22 Basa jadi raja, umur Yosia téh dalapan taun. Manéhna maréntah salila 31 taun di Yérusalém. Ngaran indungna téh Yédida anak Adaya, asalna ti Bozkat.
2 Manéhna ngalampahkeun nu bener dina pandangan Yéhuwa sarta nuturkeun lalampahan Daud karuhunna. Manéhna teu nyimpang ka kénca atawa ka katuhu.
3 Dina taun ka-18 pamaréntahan Raja Yosia, manéhna ngutus sékertaris karajaan, nyaéta Syafan anak Azalia incu Mésyulam, pikeun indit ka imah Yéhuwa. Raja maréntahkeun kieu,
4 ”Panggihan Imam Agung Hilkia. Titah anjeunna ngumpulkeun duit nu dibawa ka imah Yéhuwa, nyaéta duit nu geus dikumpulkeun ku para panjaga panto.
5 Bikeun duitna ka jalma-jalma nu ditugaskeun pikeun ngawaskeun pagawéan di imah Yéhuwa. Engké ku maranéhna kudu dibikeun deui ka jalma-jalma nu bakal ngoméan imah Yéhuwa,
6 nyaéta tukang kai, kuli bangunan, jeung tukang batu. Tuluy ku maranéhna duitna kudu dipaké keur meuli kai jeung batu potongan pikeun ngoméan nu raruksak di imah Allah.
7 Teu kudu ditanya duitna dipaké naon, lantaran maranéhna bisa dipercaya.”
8 Ka dieunakeun, Imam Agung Hilkia ngomong kieu ka Syafan sékertaris téa, ”Kuring nimu buku Torét di imah Yéhuwa.” Seug éta buku dibikeun ka Syafan tuluy dibaca ku manéhna.
9 Geus kitu, Syafan ngadep ka Raja jeung ngomong kieu, ”Artos nu dikumpulkeun di imah Yéhuwa téh tos dikaluarkeun sareng diserahkeun ka jalma-jalma nu ditugaskeun pikeun ngawaskeun padamelan di éta imah.”
10 Syafan gé ngomong kieu ka Raja, ”Imam Hilkia masihan ieu buku ka abdi.” Seug buku téh ku Syafan dibacakeun hareupeun Raja.
11 Sanggeus ngadéngé kekecapan dina buku Torét, béréwék Raja nyoéhkeun pakéanana.
12 Raja langsung méré paréntah ka Imam Hilkia, Ahikam anak Syafan, Akhbor anak Mikaya, Syafan sékertaris téa, jeung Asaya palayan raja, kieu cenah,
13 ”Demi kuring, demi sakabéh rahayat, jeung demi sakabéh urang Yéhuda, pangnanyakeun ka Yéhuwa ngeunaan kekecapan nu aya dina buku nu kakara katimu ieu. Yéhuwa téh ambek pisan ka urang, lantaran karuhun urang teu nurut kana kekecapan nu aya dina ieu buku. Maranéhna teu ngajalankeun sagala nu ditulis keur bangsa urang.”
14 Jadi Imam Hilkia, Ahikam, Akhbor, Syafan, jeung Asaya indit ngadatangan Nabiah Hulda pamajikanana Syalum. Syalum téh anak Tikwa incu Harhas, pangurus papakéan. Hulda cicingna di Wilayah Anyar di Yérusalém, nya di dinya maranéhna nyarita ka Hulda téh.
15 Ceuk Hulda, ”Ieu nu dicarioskeun ku Yéhuwa Allah Israél, ’Béjakeun ka nu ngutus maranéh,
16 ”Ieu nu diucapkeun ku Yéhuwa, ’Kuring bakal ngadatangkeun musibat ka ieu tempat jeung pendudukna. Sakabéh kekecapan nu aya dina buku nu dibaca ku raja Yéhuda bakal laksana.
17 Maranéhna geus ninggalkeun Kuring jeung ngurban ka allah-allah séjén. Maranéhna geus nganyenyeri haté Kuring ku sagala nu dipigawé ku maranéhna. Ku sabab éta, amarah Kuring bakal ngaléntab ka ieu tempat, moal bisa pareum.’”
18 Tapi, maranéh gé kudu ngomong kieu ka raja Yéhuda nu ngutus maranéh pikeun nanya ka Yéhuwa, ”Ieu nu diucapkeun ku Yéhuwa Allah Israél, ’Manéh geus ngadéngé kekecapan nu aya dina éta buku.
19 Waktu manéh ngadéngé naon nu rék dilampahkeun ku Kuring ka ieu tempat jeung pendudukna, nyaéta maranéhna bakal dikutuk jeung dipikasieun ku jalma-jalma, haté manéh langsung kageuing.* Manéh ngarendahkeun diri hareupeun Yéhuwa tuluy nyoéhkeun pakéan manéh bari ceurik sesegruk. Kuring geus ngadéngé panyambat manéh, ceuk Yéhuwa.
20 Éta sababna, manéh moal bakal ningali musibat nu rék didatangkeun ku Kuring ka ieu tempat. Manéh bakal maot siga karuhun manéh tuluy dikuburkeun.’”’” Éta pesen ditepikeun ka Raja.
Catetan Tambihan
^ As. ”langsung jadi leuleuy”.
