Raja-Raja nu Kadua 24:1-20
24 Dina jaman pamaréntahan Yéhoyakim, Nébukhadnézar raja Babilon datang nyerang manéhna. Jadi salila tilu taun, Yéhoyakim ngalalayanan manéhna. Tapi ahirna, Yéhoyakim barontak.
2 Tuluy, Yéhuwa ngadatangkeun pasukan rampog ti Khaldéa, Siria, Moab, jeung Ammon pikeun nyerang manéhna. Anjeunna terus ngadatangkeun maranéhna pikeun nyerang jeung numpes Yéhuda, sakumaha ucapan Yéhuwa nu ditepikeun ku para nabi-Na.
3 Pangna kajadian kitu ka Yéhuda téh lantaran paréntah Yéhuwa. Anjeunna hayang nyingkirkeun maranéhna ti hareupeuna-Na lantaran sakabéh dosa Manasyé.
4 Manasyé geus maéhan loba jalma nu teu salah, nepi ka Yérusalém banjir ku getih maranéhna. Ku kituna, Yéhuwa embung ngahampura Yéhuda.
5 Riwayat Yéhoyakim, kaasup sagala nu dilampahkeunana, ditulis dina buku sajarah ngeunaan raja-raja Yéhuda.
6 Ahirna Yéhoyakim maot siga karuhunna. Yéhoyakhin anakna ngaganti manéhna jadi raja.
7 Raja Mesir jeung pasukanna geus tara budal deui ti nagrina, lantaran raja Babilon geus nyokot sakabéh wilayah milik raja Mesir, ti Wadi* Mesir nepi ka Walungan Éfrat.
8 Basa jadi raja, Yéhoyakhin téh umur 18 taun. Manéhna maréntah salila tilu bulan di Yérusalém. Ngaran indungna téh Néhusta anak Élnatan, asalna ti Yérusalém.
9 Manéhna terus ngalampahkeun nu jahat dina pandangan Yéhuwa, sakumaha bapana.
10 Harita, para perwira Nébukhadnézar raja Babilon nyerang jeung ngepung kota Yérusalém.
11 Waktu éta kota keur dikepung, Nébukhadnézar raja Babilon datang.
12 Yéhoyakhin raja Yéhuda bareng jeung indungna, para palayanna, para pamingpinna, jeung para pajabat istanana taluk ka raja Babilon. Jadi dina taun kadalapan pamaréntahan raja Babilon, Yéhoyakhin diboyong jadi tawanan.
13 Geus kitu, raja Babilon ngakutan sakabéh harta nu aya di imah Yéhuwa jeung di istana. Manéhna gé ngancur-ngancurkeun kabéh parabot emas beunang nyieun Sulaéman raja Israél pikeun imah Yéhuwa. Éta téh kajadian percis sakumaha nu geus diucapkeun ku Yéhuwa saacanna.
14 Nu diboyong ku raja Babilon téh nyaéta kabéh urang Yérusalém, kabéh pamingpin, kabéh prajurit nu perkasa, kabéh tukang beusi,* jeung kabéh jalma nu ahli nyieun rupa-rupa barang, kabéhanana téh aya 10.000 urang. Euweuh nu teu diboyong, nu disésakeun di éta nagri téh ngan jalma-jalma nu malarat pisan.
15 Jadi, Yéhoyakhin diboyong ti Yérusalém ka Babilon pikeun dijadikeun tawanan, kitu ogé jeung indungna, pamajikan-pamajikanana, para pajabat istana, jeung jalma-jalma penting di éta nagri.
16 Raja Babilon gé ngaboyong kabéh prajurit, kabéhanana aya 7.000 urang. Tukang beusi* jeung jalma nu ahli nyieun rupa-rupa barang gé diboyong ku raja Babilon, kabéhanana aya 1.000 urang. Maranéhna kabéh téh jalma nu perkasa jeung geus dilatih supaya siap perang.
17 Matania emangna Yéhoyakhin ku raja Babilon diangkat jadi raja ngaganti Yéhoyakhin. Ngaranna gé diganti jadi Zédékia.
18 Basa jadi raja, Zédékia téh umur 21 taun. Manéhna maréntah salila 11 taun di Yérusalém. Ngaran indungna téh Hamutal anak Yérémia, asalna ti Libna.
19 Manéhna terus ngalampahkeun nu jahat dina pandangan Yéhuwa, sakumaha kabéh lalampahan Yéhoyakim.
20 Pangna kajadian kitu di Yérusalém jeung Yéhuda téh lantaran Yéhuwa ambek jeung hayang nyingkirkeun maranéhna ti hareupeuna-Na. Ka dieunakeun, Zédékia barontak ngalawan raja Babilon.
Catetan Tambihan
^ Tingali Daptar Istilah.
^ Atawa bisa jadi ”kabéh jalma nu ngabangun bénténg”.
^ Atawa bisa jadi ”Jalma nu ngabangun bénténg”.
