Raja-Raja nu Kadua 25:1-30
25 Dina taun kasalapan pamaréntahan Zédékia, nyaéta dina poé kasapuluh bulan kasapuluh, Nébukhadnézar raja Babilon bareng jeung pasukanna datang nyerang Yérusalém. Manéhna masang kémah hareupeun Yérusalém jeung ngabangun témbok sakurilingna pikeun ngepung éta kota.
2 Éta kota dikepung nepi ka taun ka-11 pamaréntahan Raja Zédékia.
3 Dina poé kasalapan bulan kaopat, waktu aya kalaparan nu hébat di kota jeung jalma-jalma teu baroga dahareun,
4 témbok kota dijebol. Peutingna, waktu kota dikepung kénéh ku urang Khaldéa, kabéh prajurit kabur ngaliwatan gerbang di antara témbok lapis dua nu aya di deukeut taman raja. Ari Raja mah kabur ka arah Araba.
5 Tapi, Raja diudag ku pasukan Khaldéa. Manéhna kasusul di Gurun Keusik Yérikho sarta ditinggalkeun ku pasukanna sorangan.
6 Raja Zédékia ditéwak tuluy dibawa ka raja Babilon di Ribla. Di ditu manéhna dihukum.
7 Barudakna dipeuncitan, disaksian ku manéhna sorangan. Geus kitu, panon Zédékia dilolongkeun ku Nébukhadnézar, tuluy manéhna diranté jeung dibawa ka Babilon.
8 Dina poé katujuh bulan kalima, nyaéta dina taun ka-19 pamaréntahan Nébukhadnézar raja Babilon, saurang palayan raja, nyaéta Nébuzaradan kapala pangawal, datang ka Yérusalém.
9 Manéhna ngaduruk imah Yéhuwa, istana raja, jeung kabéh imah nu aya di Yérusalém. Kabéh imah jalma penting gé béak diduruk.
10 Témbok-témbok sakuriling Yérusalém ku kabéh pasukan Khaldéa diruntuhkeun, sakumaha nu diparéntahkeun ku Nébuzaradan kapala pangawal téa.
11 Rahayat nu nyésa kénéh di éta kota, jalma-jalma nu ngabélot ka raja Babilon, jeung kabéh penduduk séjénna ku Nébuzaradan diboyong kabéh.
12 Anu disésakeun ku manéhna téh ngan sawaréh ti jalma-jalma nu malarat pisan. Maranéhna dititah digarawé di kebon anggur jeung ngolah tanah.
13 Urang Khaldéa ngancurkeun pilar-pilar tambaga nu aya di imah Yéhuwa, gorobag-gorobag, jeung Laut Tambaga nu aya di imah Yéhuwa. Geus kitu, tambagana diakutan ka Babilon.
14 Maranéhna gé nyokotan kabéh wadah paranti lebu, singkup, alat paranti mareuman seuneu dina sumbu, cangkir, jeung kabéh parabot tambaga nu dipaké di bait.
15 Nébuzaradan kapala pangawal téa nyokot wadah-wadah ruhak sarta mangkok-mangkok tina emas jeung pérak murni.
16 Ari tambaga tina dua pilar, tina Laut Tambaga, jeung tina gorobag-gorobag nu dijieun ku Sulaéman keur imah Yéhuwa téh teu bisa ditimbang bakating ku loba-lobana.
17 Unggal pilar téh jangkungna 18 hasta.* Mamakutaanana dijieun tina tambaga, jangkungna 3 hasta. Jaring jeung dadalimaan sakuriling mamakutaan dijieun tina tambaga. Pilar nu hiji deui gé dijieun sarua kawas kitu.
18 Éta kapala pangawal téh néwak Séraya imam kapala, Zéfanya nu mantuan imam kapala, jeung tilu panjaga panto.
19 Ari di kota, nu ditéwak téh hiji pajabat istana nu ngapalaan para prajurit, lima panaséhat pribadi raja, hiji sékertaris panglima nu ngasup-ngasupkeun jalma jadi prajurit, jeung 60 jalma biasa nu aya di kota.
20 Maranéhna dibawa ku Nébuzaradan kapala pangawal téa ka raja Babilon di Ribla.
21 Maranéhna kabéh dipaéhan ku raja Babilon di Ribla di tanah Hamat. Tah, kitu caritana kumaha urang Yéhuda diboyong ti nagrina.
22 Nébukhadnézar raja Babilon ngangkat Gédalia anak Ahikam incu Syafan pikeun jadi pangawas keur jalma-jalma nu ditinggalkeun di tanah Yéhuda.
23 Barang ngadéngé yén raja Babilon geus ngangkat Gédalia, para panglima jeung pasukanna langsung ngadatangan Gédalia di Mizpa. Ngaran para panglima éta téh nyaéta Ismail anak Nétania, Yohanan anak Karéah, Séraya anak Tanhumét urang Nétofa, jeung Yaazania anak urang Maakat.
24 Gédalia sumpah ka maranéhna jeung pasukanna, kieu cenah, ”Tong sieun jadi palayanna urang Khaldéa. Sok matuh di ieu tanah jeung tunduk ka raja Babilon. Aranjeun tangtu bakal hirup tenang.”
25 Dina bulan katujuh, Ismail anak Nétania incu Élisyama, nu kaasup kulawarga raja, datang ka Mizpa bareng jeung sapuluh jalma séjénna. Maranéhna maéhan Gédalia jeung kabéh urang Yahudi sarta urang Khaldéa nu harita keur bareng jeung Gédalia.
26 Kabéh jalma, ti nu ngora nepi ka nu kolot, kaasup para panglima, kalabur ka Mesir da sarieuneun ku urang Khaldéa.
27 Dina taun Éwil-mérodakh jadi raja Babilon, Yéhoyakhin raja Yéhuda dibébaskeun ti panjara ku manéhna. Dibébaskeunana téh dina poé ka-27 bulan ka-12, taun ka-37 ti saprak Yéhoyakhin diboyong ti Yéhuda.
28 Éwil-mérodakh kacida bageurna ka Yéhoyakhin nepi ka Yéhoyakhin dibéré pangkat nu leuwih luhur tibatan raja séjénna nu diboyong bareng jeung manéhna ka Babilon.
29 Jadi, Yéhoyakhin ngalaanan baju panjarana. Manéhna gé saumur-umur dahar saméja jeung Raja.
30 Sapanjang hirup, manéhna dibéré dahareun ku Raja unggal poé.
Catetan Tambihan
^ 1 hasta = 44,5 sénti. Tingali Lamp. B14.
