Hoséa 1:1-11
1 Hoséa* anak Bééri narima firman Yéhuwa di jaman Uzzia, Yotam, Ahaz, jeung Hizkia, raja-raja Yéhuda, sarta di jaman Yéroboam anak Yoas, raja Israél.
2 Basa Yéhuwa mimiti nepikeun firman-Na ka Hoséa, Yéhuwa nyarios kieu, ”Manéh kudu kawin jeung hiji awéwé. Engkéna éta awéwé bakal jadi palacur,* tuluy manéh bakal boga anak tina hasil ngalacurna.* Ieu téh lantaran rahayat di ieu nagri geus teu satia ka Yéhuwa, kawas palacur.”
3 Jadi Hoséa kawin jeung Gomér anak Diblaim. Geus kitu, Gomér ngandung tuluy ngalahirkeun orok lalaki.
4 Yéhuwa nyarios ka Hoséa, ”Orok téh ngaranan Yizréél,* sabab sakeudeung deui Kuring rék ngahukum kulawarga Yéhu lantaran loba nu dipaéhan di Yizréél. Kuring gé rék nyingkirkeun karajaan Israél.
5 Dina poé éta, Kuring bakal motongkeun busur panah Israél di Lebak Yizréél.”
6 Éta awéwé ngandung deui tuluy ngalahirkeun orok awéwé. Geus kitu Allah ngomong ka Hoséa, ”Orok téh ngaranan Lo-ruhama,* sabab Kuring moal mikarunya deui ka urang Israél. Kuring pasti bakal nyingkirkeun maranéhna.
7 Tapi, Kuring bakal mikarunya ka urang Yéhuda. Kuring, Yéhuwa Allah maranéhna, bakal nyalametkeun maranéhna. Nyalametkeunana lain ku busur panah, atawa ku pedang, atawa ku jalan perang, atawa ku kuda, atawa ku nu tarumpak kuda.”
8 Sanggeus Lo-ruhama disapih, Gomér ngandung tuluy ngalahirkeun orok lalaki.
9 Geus kitu Allah nyarios ka Hoséa, ”Orok téh ngaranan Lo-ami,* sabab maranéh téh lain umat Kuring, sarta Kuring gé moal jadi Allah maranéh.
10 ”Urang Israél bakal ngalobaan lir keusik di laut, moal kataker moal kaitung. Di tempat Kuring pernah ngomong ka maranéhna, ’Maranéh lain umat Kuring’, di dinya ogé Kuring bakal ngomong, ’Maranéh téh anak-anak Allah nu hirup.’
11 Urang Yéhuda jeung urang Israél bakal dihijikeun deui. Maranéhna bakal milih hiji pamingpin, tuluy kaluar ti éta nagri. Éta poé téh bakal jadi poé nu agung keur Yizréél.
Catetan Tambihan
^ Ieu téh ngaran pondok ti Hosyaya, nu hartina ”Disalametkeun ku Yah; Yah Tos Nyalametkeun”.
^ Atawa ”bakal ngalampahkeun nu cabul”.
^ Atawa ”lampah cabulna”.
^ Hartina ”Allah Bakal Nebarkeun Binih”.
^ Hartina ”Teu Dipikarunya”.
^ Hartina ”Lain Umat Kuring”.
