Hoséa 10:1-15
10 ”Israél téh saibarat tangkal anggur nu beuki ka dieu buahna beuki goréng.*
Beuki loba buahna, beuki loba nyieunan mézbahna.Beuki alus hasil tanahna, beuki dialus-alus ogé pilar-pilar berhalana.
2 Haté maranéhna téh munapék.*Ayeuna maranéhna bakal kabukti salah.
Bakal aya nu ngaruntuhkeun mézbah-mézbahna jeung ngancurkeun pilar-pilarna.
3 Maranéhna bakal ngomong kieu, ’Urang mah teu boga raja, lantaran urang teu sieun ka Yéhuwa.
Upama boga raja gé, rék bisa ngalampahkeun naon manéhna keur urang?’
4 Maranéhna ngomong kosong, sumpah palsu, jeung nyieun perjangjian-perjangjian.Ku kituna, kateuadilan nyebar kawas jukut racun dina tanah beunang ngawuluku.*
5 Penduduk Samaria bakal prihatin
Ku sabab patung anak sapi di Bét-awén bakal dibawa ka nagri séjén.Jalma-jalma bakal nyeungceurikan éta patung,Kitu ogé jeung para imam allah palsu, nu baheulana ngagulkeun éta patung jeung kamulyaanana.
6 Éta patung bakal dibawa ka Asiria, dijadikeun hadiah keur raja nu agung.
Éfraim bakal nandang kaéra,Israél bakal éra lantaran nurut kana naséhat nu teu bener.
7 Samaria jeung rajana bakal leungit,Kawas ranting potong nu dialungkeun kana cai.
8 Tempat-tempat pamujaan di Bét-awén, nyaéta dosana Israél, bakal dirubuh-rubuhkeun.
Mézbah-mézbahna bakal dipinuhan ku rungkun cucuk jeung jujukutan.
Jalma-jalma bakal ngomong ka gunung-gunung, ’Sumputkeun urang!’
Jeung ka pasir-pasir,* ’Rungkupan urang!’
9 Éh Israél, ti jaman di Gibéah kénéh, manéh geus nyieun dosa.
Nepi ka ayeuna gé, angger kawas kitu.
Sanajan jalma-jalma jahat diperangan di Gibéah, angger wéh teu béak-béak.
10 Kuring bakal ngahukum maranéhna iraha waé sakahayang Kuring.
Waktu maranéhna nanggung dua kasalahanana,*Bangsa-bangsa bakal ngahiji ngalawan maranéhna.
11 Tadina mah Éfraim téh lir sapi bikang nu dilatih jeung resep ngirik.*Jadi, ku Kuring pundukna nu éndah téh teu dipasangan beban.
Tapi ayeuna, Kuring rék nitah hiji jalma sina numpakan* Éfraim.
Yéhuda bakal ngawuluku, Yakub sina narik garu keur éta jalma.
12 Geura wuluku tanah nu subur,
Tebar binih kaadilan tuluy ala asih satia,Meungpeung aya kénéh waktu pikeun néangan Kuring, Yéhuwa.Engké Kuring bakal datang jeung ngajarkeun naon nu bener jeung adil.
13 Tapi, maranéh mah ngadon melak kajahatan.Nu diala gé hal-hal nu teu bener.Maranéh ngadahar hasil tina ngabohong,Sabab maranéh ngandelkeun diri sorangan,Ngandelkeun prajurit-prajurit maranéh nu kacida lobana.
14 Bakal aya sora ribut perang ngalawan bangsa maranéh.Kota-kota maranéh nu dibénténgan bakal diancur-ancurkeun,Kawas jaman Syalman ngancurkeun Bét-arbél dina mangsa perang,Basa indung-indung jeung barudakna digebugan nepi ka paraéh.
15 Éta nu bakal kaalaman ku manéh, éh Bétel, sabab manéh kacida jahatna.
Subuh-subuh kénéh, raja Israél bakal dimusnakeun.”
Catetan Tambihan
^ Atawa bisa jadi ”nu beuki ka dieu beuki nyaliara”.
^ Atawa ”licik”.
^ Ngaguar taneuh.
^ Atawa ”bukit-bukit”.
^ Nyaéta, waktu maranéhna nanggung hukuman nu kawas rancatan.
^ Misahkeun sisikian tina cangkangna.
^ Atawa ”sina masang kai tanggungan ka”.
