Hoséa 5:1-15
-
Éfraim jeung Yéhuda dihakiman (1-15)
5 ”Éh para imam, daréngékeun.Éh turunan Israél, perhatikeun.Éh kulawarga raja, daréngékeun.Maranéh bakal dihakiman,Sabab maranéh téh kawas jiret di Mizpa,Kawas jaring nu dipasang di Tabor.
2 Jalma-jalma nu barontak geus maéhan loba jalma.Kuring geus ngélingan maranéhna.
3 Kuring wawuh ka Éfraim,Sarta Israél moal bisa nyumput ti Kuring.
Éh Éfraim, ayeuna manéh téh resep ngalampahkeun nu cabul.*Israél geus nganajiskeun diri.
4 Kalakuanana ngahalangan maranéhna balik ka Allah maranéhna,Sabab maranéhna dikungkung ku kahayangna pikeun ngalacur.*Maranéhna teu nganggap Yéhuwa téh Allah maranéhna.
5 Kaangkuhan Israél ngabuktikeun kasalahanana.Boh Israél boh Éfraim titarajong ku kasalahanana sorangan.Yéhuda gé milu titajong bareng jeung maranéhna.
6 Maranéhna néangan Yéhuwa bari mawa domba jeung sapi,Tapi teu kapanggih,
Sabab Anjeunna geus ninggalkeun maranéhna.
7 Maranéhna geus ngahianat ka Yéhuwa,Sabab maranéhna geus boga anak-anak haram.*
Maranéhna jeung sagala pangabogana* bakal dimusnakeun dina sabulan.*
8 Tiup tarompét tanduk di Gibéah! Tiup tarompét di Rama!
Gorowokkeun perang di Bét-awén! Sok maju, Bényamin!
9 Éh Éfraim, dina poé maranéh dihukum, jalma-jalma bakal sarieuneun ningali kaayaan manéh.
Kuring geus méré nyaho naon nu pasti bakal kajadian ka kaom-kaom Israél.
10 Para pamingpin Yéhuda téh kawas jalma-jalma nu mindahkeun wates tanah.
Kuring rék ngabedahkeun amarah Kuring ka maranéhna lir cai.
11 Éfraim ditindes. Geus sapantesna manéhna diancurkeun,Bongan manéhna keukeuh sakongkol jeung musuhna.
12 Kawas ngenget,* Kuring bakal ngabasmi Éfraim.Urang Yéhuda ku Kuring rék disina baruruk.
13 Waktu Éfraim ngarasa dirina gering, sarta Yéhuda ningali dirina borok,Éfraim indit ka Asiria jeung ngirim utusan ka raja nu agung.
Tapi, éta raja teu bisa nyageurkeun maranéhSarta teu bisa ngaleungitkeun borok maranéh.
14 Kuring rék nyerang Éfraim kawas singa ngora.Kuring bakal nyerang urang Yéhuda kawas singa nu bedas.*
Maranéhna rék disasaak ku Kuring tuluy diculkeun.Maranéhna rék ditéwak tuluy dibawa ku Kuring, sarta moal aya nu bisa nyalametkeun maranéhna.
15 Kuring bakal ninggalkeun maranéhna tuluy balik ka tempat Kuring nepi ka maranéhna ngarasakeun balukar tina kasalahanana.Ari geus kitu mah maranéhna bakal ménta dipikarunya ku Kuring.
Waktu keur kasusahan, maranéhna bakal néangan Kuring.”
Catetan Tambihan
^ Atawa ”resep ngalacur”.
^ Atawa ”ngalampahkeun nu cabul”.
^ Meureun anak-anak ti pamajikanana nu lain urang Israél.
^ Atawa ”jeung kebonna”.
^ Atawa bisa jadi ”kurang ti sabulan”.
^ Serangga nu osok ngahakan kaén.
^ Atawa ”singa ngora nu jabrig”.
