Hoséa 7:1-16
7 ”Unggal Kuring rék nyageurkeun Israél,Kasalahan Éfraim katémbong, kitu deui kajahatan Samaria.Maranéhna téh tukang tipu.
Maranéhna norobos jeung pulang-paling ka imah batur,Ngarampog ka nu laliwat di jalan-jalan.
2 Tapi teu kapikir ku maranéhna yén Kuring inget kana sakabéh kajahatanana.
Maranéhna kajiret ku kalakuanana sorangan.Éta kabéh euweuh nu buni ti Kuring.
3 Maranéhna ngabubungah raja ku kajahatanana,Sarta ngabubungah para pamingpin ku tipu dayana.
4 Kabéhanana téh tukang jinah.Maranéhna kawas tungku nu dihurungkeun ku tukang roti,Nu teu kudu dipanaskeun deui salila manéhna nyieun adonan nepi ka adonanana beukah.
5 Dina poé raja ngayakeun pésta, para pamingpin harayang utahJeung jaradi ambek sanggeus nginum cianggur.
Raja ngabalad jeung jalma-jalma nu sok moyok.
6 Waktu datang, haté maranéhna téh panas kawas tungku.*
Sapeupeuting tukang rotina saré,Isuk-isuk pameuleumanana ngajegur hurung.
7 Maranéhna kabéh panas kawas tungku,Maranéhna ngalebur para pamingpinna.*
Sakabéh rajana digulingkeun.Euweuh saurang-urang acan nu ménta tulung ka Kuring.
8 Éfraim pacampur jeung bangsa-bangsa.
Éfraim saibarat kuéh bunder nu asak sabeulah.
9 Teu karasaeun ku manéhna yén tanagana téh geus dibéakkeun ku jalma-jalma nu teu dikenal.
Manéhna gé teu sadar yén buukna geus jadi bodas.
10 Kaangkuhan Israél téh geus ngabuktikeun kasalahanana.Najan kitu, maranéhna teu baralik deui ka Yéhuwa Allahna.Maranéhna gé teu ménta tulung ka Anjeunna.
11 Éfraim téh kawas japati bodo, teu ngarti nanaon.
Maranéhna ménta tulung ka Mesir, terus ka Asiria.
12 Ka mana waé maranéhna indit, ku Kuring rék dipasangan jaring.
Kuring rék néwak maranéhna kawas néwak manuk nu keur hiber.
Kuring bakal ngahukum maranéhna sakumaha paringetan nu geus ditepikeun ku Kuring ka bangsa maranéhna.
13 Cilaka maranéhna lantaran kabur ti Kuring!
Maranéhna bakal diancurkeun lantaran doraka ka Kuring!
Kuring geus daék nebus maranéhna, tapi maranéhna kalah ka mitnah ka Kuring.
14 Sanajan maranéhna terus careurik dina tempat saréna,Ménta tulungna téh henteu bener-bener tina haté.
Maranéhna ngabesétan awak pikeun ménta sisikian jeung cianggur anyar.Maranéhna barontak ka Kuring.
15 Sanajan ku Kuring geus dididik jeung dikuatkeun,Maranéhna ngadon ngalawan ka Kuring jeung ngararancang siasat jahat.
16 Maranéhna geus barobah, tapi teu ngajalankeun ibadah nu sajati.Maranéhna teu bisa diandelkeun, kawas busur panah nu kendor.
Para pamingpinna bakal tariwas ku pedang, sabab omonganana téh kurang ajar.
Maranéhna bakal diseungseurikeun di Mesir.”
Catetan Tambihan
^ Atawa bisa jadi ”Maranéhna datang bari boga siasat, sarta haté maranéhna téh panas kawas tungku”.
^ As. ”hakimna”.
