Yérémia 13:1-27
13 Ieu nu diucapkeun ku Yéhuwa ka abdi, ”Jung indit, beuli beubeur tina linén tuluy beulitkeun kana cangkéng manéh, tapi beubeurna teu meunang kabaseuhan.”
2 Seug beubeur téh ku abdi dibeuli sakumaha ucapan Yéhuwa, tuluy dipaké.
3 Yéhuwa nyarios deui ka abdi,
4 ”Geura indit ka Walungan Éfrat. Di ditu, beubeur nu geus dibeuli jeung dipaké ku manéh téh sumputkeun dina sela-sela batu cadas.”
5 Bral abdi indit. Beubeur téh disumputkeun deukeut Walungan Éfrat, sakumaha paréntah Yéhuwa.
6 Sanggeus sababaraha waktu, Yéhuwa nyarios ka abdi, ”Jung indit ka Walungan Éfrat, cokot beubeur nu ku Kuring dititah disumputkeun téa.”
7 Abdi indit ka Walungan Éfrat, seug ngagali di tempat abdi nyumputkeun beubeur téa. Beubeur téh ku abdi dicokot, ari pék téh geus ruksak, geus teu bisa dipaké sama sakali.
8 Geus kitu Yéhuwa nyarios ka abdi,
9 ”Ieu nu diucapkeun ku Yéhuwa, ’Nya ku cara kitu kasombongan Yéhuda jeung Yérusalém bakal ruksak.
10 Ieu bangsa nu jahat téh embung nurut kana ucapan Kuring, keukeuh nuturkeun kahayang haténa. Maranéhna nyembah, ngalalayanan, jeung sujud ka allah-allah séjén. Éta sababna, maranéhna bakal kawas ieu beubeur nu euweuh gunana.’
11 Ceuk Yéhuwa, ’Sakumaha beubeur pageuh meulit kana cangkéng jelema, sakabéh urang Israél jeung Yéhuda téh pageuh meulit ka Kuring. Éta téh supaya maranéhna bisa jadi umat Kuring, ngamulyakeun Kuring, ngahormat ka Kuring, jeung ngagungkeun Kuring. Tapi hanjakalna, maranéhna teu narurut.’
12 ”Manéh gé kudu nepikeun ieu amanat ka maranéhna, ’Ieu nu diucapkeun ku Yéhuwa Allah Israél, ”Unggal kendi nu gedé sakuduna dieusian ku cianggur.”’ Maranéhna bakal ngajawab, ’Nya puguh atuh. Kendi nu gedé mah kudu dieusian ku cianggur.’
13 Tuluy béjakeun kieu, ’Ieu nu diucapkeun ku Yéhuwa, ”Kawas kendi gedé éta, sakabéh penduduk ieu nagri, nyaéta raja-raja nu dariuk dina tahta Daud, imam-imam jeung nabi-nabi, sarta sakabéh penduduk Yérusalém, ku Kuring rék dicekok ku cianggur nepi ka marabok.
14 Nu itu jeung nu ieu ku Kuring rék disina silih teunggar, boh bapa boh anak,” ceuk Yéhuwa. ”Kuring moal karunya, moal watir, jeung moal nunjukkeun welas asih ka maranéhna. Moal aya nu bisa ngahalang-halang Kuring ngancurkeun maranéhna.”’”
15 Dangukeun jeung perhatikeun.
Ulah sombong, sabab Yéhuwa geus ngucapkeun firman-Na.
16 Mulyakeun Yéhuwa Allah aranjeunSaacan Anjeunna ngadatangkeun poék,Saacan suku aranjeun titarajong di gunung-gunung pasosoré.
Aranjeun bakal ngarep-ngarep caang,Tapi nu bakal didatangkeun ku Anjeunna téh poék mongkléng.Caang ku Anjeunna dirobah jadi poék ngajumbleng.
17 Lamun aranjeun teu daék ngadangukeun,Abdi bakal nyeungceurikan kaangkuhan aranjeun bari nyumput.
Abdi bakal teterusan ceurik, panon moal eureun ngucurkeun cimata,Lantaran umat Yéhuwa geus diboyong jadi tawanan.
18 ”Béjakeun kieu ka raja jeung ibu suri, ’Geura turun tina tahta,Sabab makuta maranéh nu éndah bakal leupas tina sirah maranéh.’
19 Gerbang-gerbang kota di kidul geus ditutup,* euweuh nu mukakeun.
Sakabéh urang Yéhuda geus diboyong ka pangbuangan.
20 Tuh tempo, musuh murubul ti kalér.
Mana ingon-ingon nu dibikeun ka manéh* téh, domba-domba manéh nu aralus?
21 Manéh rék ngomong naon lamun dihukumKu jalma-jalma nu ku manéh dianggap sobat?
Manéh bakal ngarasakeun kanyeri kawas awéwé nu keur ngajuru, pan?
22 Lamun manéh mikir, ’Ku naon ieu kabéh bét kaalaman ku urang?’
Nya éta téh ku lantaran dosa manéh sakitu lobana, jadi baju manéh dilaanan
Sarta keuneung* manéh nyeri pisan.
23 Bisaeun kitu urang Kus* ngaganti warna kulitna, atawa maung tutul ngarobah totol-totolna?
Lamun bisa, kakara manéh ogé, nu geus tuman kana kajahatan,Bisa migawé nu hadé.
24 Éta sababna, maranéhna ku Kuring rék dipabalencarkeun kawas jarami ditebak ku angin ti gurun keusik.
25 Éta nu bakal kaalaman ku manéh. Nya, éta bagian manéh ti Kuring,” saur Yéhuwa,”Lantaran manéh geus mopohokeun Kuring jeung percaya kana bohong.
26 Ku kituna, pakéan manéh ku Kuring rék disingsatkeun nepi ka nutupan beungeut manéh,Sina batur ningali manéh taranjang.
27 Kalakuan jinah manéh, napsu birahi manéh,Jeung palacuran manéh nu ngérakeun gé bakal dibolékérkeun.
Kuring geus nempo kalakuan manéh nu pikaijideunDi pasir-pasir* jeung di tegalan.
Cilaka manéh, Yérusalém!
Rék nepi ka iraha manéh najis téh?”
Catetan Tambihan
^ Atawa ”dikepung”.
^ Bisa jadi ngamaksudkeun Yérusalém.
^ Atawa ”tumit”.
^ Atawa ”Étiopia”.
^ Atawa ”bukit-bukit”.
