Yérémia 15:1-21
15 Tuluy, Yéhuwa nyarios kieu ka abdi, ”Sanajan Musa jeung Samuél narangtung hareupeun Kuring jadi perantara, angger wéh Kuring mah moal karunya ka ieu bangsa. Kuring rék ngusir ieu bangsa, sina arindit ti hareupeun Kuring.
2 Mun maranéhna nanya kieu ka manéh, ’Abdi sadaya bakal kumaha?’ jawab kieu, ’Ieu nu diucapkeun ku Yéhuwa,
”Nu bakal maot ku panyakit, nya disamber ku panyakit!
Nu bakal maot ku pedang, nya disamber ku pedang!
Nu bakal maot ku kalaparan, nya disamber ku kalaparan!
Nu bakal ditawan, nya digiring ka pangbuangan!”’
3 ”Yéhuwa ngucap kieu, ’Kuring geus nangtukeun opat musibat* nu bakal narajang maranéhna, nyaéta pedang pikeun maéhan, anjing pikeun ngagusur mayit, manuk-manuk di langit pikeun ngahakan bangké, sarta sato-sato galak di bumi pikeun ngalegleg sésana.
4 Sakabéh karajaan di bumi ku Kuring rék disina sarieuneun ningali kaayaan maranéhna. Éta téh ku sabab naon nu dilampahkeun ku Manasyé anak Hizkia, raja Yéhuda, di Yérusalém.
5 Cik, saha nu bakal karunyaeun ka manéh, éh Yérusalém?Saha nu bakal welaseun ka manéh?Saha nu bakal nyimpang heula pikeun nanyakeun kumaha kaayaan manéh?’
6 ’Manéh geus miceun Kuring,’ ceuk Yéhuwa.
’Manéh teterusan nukangan Kuring.
Jadi ku kawasa Kuring, Kuring rék ngancurkeun manéh.
Kuring geus bosen mikarunya ka manéh.*
7 Di gerbang-gerbang ieu nagri, umat Kuring bakal diirik* nepi ka paburencay katebak angin.
Kuring rék ngarampas anak-anak maranéhna,
Rék ngancurkeun umat Kuring,Da maranéhna arembung tobat.
8 Randa-randa maranéhna bakal jadi leuwih loba tibatan keusik di laut.
Kuring rék ngadatangkeun tukang ngancurkeun pikeun ngabasmi nu jadi indung jeung para pamuda.
Ngadadak maranéhna bakal geumpeur jeung ngarasa sieun.
9 Awéwé nu ngalahirkeun tujuh anak ngalempréh leuleus,Napasna mani eungap.
Panonpoéna surup padahal beurang kénéh.Manéhna jadi éra jeung asa dihina.’*
’Sésa maranéhna nu kari saeutik,Ku Kuring rék diserahkeun ka musuh-musuhna sina diparaéhan ku pedang,’ ceuk Yéhuwa.”
10 Duh Ema, abdi mah dijurukeun ka dunya téh mani apes.Di sakuliah nagri, abdi teterusan cékcok sarta paséa sareng batur.
Abdi tara ngahutang tara ngahutangkeun,Tapi disumpahan ku sadaya jalmi.
11 Saur Yéhuwa, ”Kuring pasti nulungan manéh.Kuring pasti ngajaga manéh waktu musibat datang,Waktu manéh susah nyanghareupan musuh.
12 Cik, saha nu bisa ngancurkeun beusi, komo beusi ti kalér?Saha nu bisa ngancurkeun tambaga?
13 Kakayaan jeung harta banda maranéh ku Kuring rék dibikeun jadi jarahan.Lain lantaran Kuring hayang meunang kauntungan, tapi éta téh lantaran manéh geus ngalampahkeun loba dosa di sakuliah nagri.
14 Éta kabéh ku Kuring rék diserahkeun ka musuh,Dibawa ka nagri nu asing keur maranéh.
Sabab amarah Kuring geus ngagedur,Ngahuru ka maranéh.”
15 Nun Yéhuwa, Gusti terang kumaha kasesah abdi.Mugi Gusti émut sareng merhatikeun abdi.
Mugi Gusti ngabales jalmi-jalmi nu nganiaya abdi.
Ulah dugi ka abdi binasa ku lantaran Gusti sabar teuing ka maranéhna.
Abdi dugi ka dihihina kieu téh pan demi Gusti.
16 Waktu nampi firman ti Gusti, ku abdi dilebetkeun kana haté.*Ku karana firman Gusti, haté mani atoh sareng gumbira.Éta téh ku sabab abdi nyandang nami Gusti, nun Yéhuwa, Allah pangawasa pasukan sorga.
17 Abdi teu ruang-riung sareng jalmi-jalmi nu resep senang-senang.
Lantaran nuturkeun pituduh Gusti, abdi diuk mencil nyorangan.Abdi gé milu ambek ka maranéhna sapertos Gusti.*
18 Ku naon kanyeri abdi téh teu leungit-leungit, raheut gé teu tiasa diubaran?
Éta teu cageur-cageur.
Piraku Gusti téh sapertos cinyusu saat,Nu teu tiasa diandelkeun?
19 Ku kituna Yéhuwa nyarios kieu,
”Lamun manéh balik ka Kuring, tangtu ku Kuring dipikaresep deui.Manéh gé bakal terus ngalalayanan Kuring.
Lamun manéh nyingkirkeun hal-hal nu euweuh gunana sarta ngajaga hal-hal nu penting,Manéh bakal terus nguarkeun amanat Kuring.
Jalma-jalma tangtu ngadatangan manéh,Manéh mah teu kudu ngadatangan maranéhna.”
20 ”Manéh ku Kuring rék dijadikeun kawas témbok tambaga nu kuat di antara ieu bangsa.
Maranéhna tangtu nyerang manéh,Tapi moal bisa ngéléhkeun manéh.Sabab Kuring nyarengan manéh. Kuring bakal nyalametkeun jeung ngabébaskeun manéh,” saur Yéhuwa.
21 ”Kuring bakal ngaluputkeun manéh ti leungeun jalma jahatSarta nebus manéh ti genggeman jalma nu telenges.”
Catetan Tambihan
^ Atawa bisa jadi ”opat rupa hukuman”.
^ Atawa ”bosen ngarasa kaduhung”.
^ Sisikian dipisahkeun tina cangkangna.
^ Atawa bisa jadi ”Éta geus éra”.
^ As. ”Waktu firman Gusti kapanggih, ku abdi dituang”.
^ Atawa ”Warta hukuman ti Gusti aya dina diri abdi”.
