Yérémia 18:1-23
18 Ieu firman Yéhuwa ka Yérémia,
2 ”Jung indit ka imahna tukang nyieun gagarabah. Di ditu, Kuring rék ngomong ka manéh.”
3 Bral abdi indit. Barang nepi, tukang nyieun gagarabah téh keur barangjieun dina pamuteranana.
4 Tapi, wadah taneuh liket nu keur dijieun téh bangunna teu kawas nu dipikahayang. Jadi, ku manéhna éta dijieun deui jadi wadah séjén, nu bangunna luyu jeung kahayang manéhna.
5 Geus kitu, Yéhuwa nyarios ka abdi,
6 ”’Éh urang Israél, Kuring gé bisa kua-kieu ka maranéh, sakumaha tukang nyieun gagarabah bisa kua-kieu kana taneuh liket,’ ceuk Yéhuwa. ’Dina leungeun Kuring, maranéh téh kawas taneuh liket dina leungeun tukang nyieun gagarabah.
7 Waktu Kuring ngomong ngeunaan ngarabut, ngaruntuhkeun, jeung ngancurkeun hiji bangsa atawa hiji karajaan,
8 tuluy éta bangsa tobat tina kajahatan nu disebutkeun ku Kuring, nya Kuring gé moal tulus* ngadatangkeun musibat nu geus dirancang keur maranéhna.
9 Tapi, waktu Kuring ngomong ngeunaan ngawangun jeung melak hiji bangsa atawa hiji karajaan,
10 tuluy maranéhna ngalampahkeun nu jahat dina pandangan Kuring sarta teu daék nurut kana omongan Kuring, nya Kuring gé moal tulus* méré hal-hal hadé nu geus dirancang keur maranéhna.’
11 ”Ayeuna pangbéjakeun kieu ka priya-priya Yéhuda jeung penduduk Yérusalém, ’Ieu nu diucapkeun ku Yéhuwa, ”Kuring nyiapkeun musibat jeung nyieun rencana rék ngahukum maranéh. Jadi, sok tarobat tina lalampahan maranéh nu jahat. Geura robah kalakuan jeung laku lampah maranéh.”’”
12 Tapi ceuk maranéhna, ”Ah, jang naon tobat? Kumaha urang wéh. Urang masing-masing rék keukeuh ngalaksanakeun kahayang haté nu jahat.”
13 Ku sabab kitu, Yéhuwa nyarios kieu,
”Pék tanya ka bangsa-bangsa séjén,
Pernah teu ngadéngé ucapan nu kawas kitu?
Kalakuan urang Israél mah geus kacida parahna.
14 Bisa kitu salju leungit ti lamping-lamping* Pagunungan Lébanon,
Atawa citiis nu ngocor ti tempat nu jauh jadi saat?
15 Ari umat Kuring mah geus mopohokeun Kuring.
Maranéhna ngurban ka berhala-berhala nu euweuh gunana,Nu ngalantarankeun batur jadi boga dosa sarta nyimpang ti jalan nu geus aya ti baheula.Maranéhna dibawa ka jalan leutik nu garinjul jeung henteu mulus.
16 Ku kituna, tanah maranéhna bakal jadi tempat nu pikasieuneun,Nu dihina* salilana.
Saha waé nu ngaliwat bakal sieuneun jeung gogodeg.
17 Maranéhna ku Kuring rék disina paburencay hareupeun musuh-musuhna, lir kekebul katebak ku angin wétan.
Dina poé maranéhna keuna ku musibat, Kuring rék ngabalieur, rék nonggongan.”
18 Ceuk jalma-jalma, ”Hayu urang nyieun siasat pikeun ngalawan Yérémia, da sual hukum* mah urang bisa diajar ti imam-imam urang. Sual naséhat, urang bisa meunang ti jalma nu bijaksana. Sual firman Allah, urang bisa nyaho ti nabi-nabi. Hayu urang tuding manéhna, omonganana ulah didéngé.”
19 Nun Yéhuwa, perhatoskeun abdi,Dangukeun omongan musuh-musuh abdi.
20 Piraku kahadéan dibales ku kajahatan?
Maranéhna téh tos ngagali lombang pikeun ngubur abdi.
Mugi émut waktu abdi nangtung payuneun Gusti pikeun nyaritakeun kahadéan maranéhna,Ngabélaan maranéhna supaya Gusti teu ambek deui.
21 Ayeuna mah keun barudakna sina paéh ku kalaparan.Maranéhna sina paéh ku pedang.
Pamajikanana sina kaleungitan anak jeung salaki.
Lalaki-lalakina sina paéh ku panyakit.Para pamudana sina paéh ku pedang di pangperangan.
22 Di imah maranéhna bakal kadéngé sora jejeritanWaktu Gusti ngadadak ngadatangkeun rampog.
Bongan maranéhna ngagali lombang pikeun néwak abdiSarta masang jiret keur suku abdi.
23 Tapi nun Yéhuwa,Gusti mah terang pisan kana siasat maranéhna pikeun maéhan abdi.
Kasalahan maranéhna ulah dihampura,Dosa maranéhna ulah dipupus.
Keun maranéhna sina titarajong payuneun GustiWaktu Gusti ngahukum maranéhna ku amarah Gusti.
Catetan Tambihan
^ Atawa ”Kuring gé kaduhung”.
^ Atawa ”Kuring gé kaduhung”.
^ Atawa ”léréng-léréng”.
^ As. ”dihéotan”.
^ Atawa ”pituduh”.
