Yérémia 20:1-18
20 Imam Pasyur anak Imér, kapala pangawas di bumina Yéhuwa, ngadéngé Yérémia ngaramalkeun hal-hal éta.
2 Tuluy Pasyur neunggeul Nabi Yérémia. Geus kitu, Yérémia dipasung di Gerbang Bényamin di daérah nu leuwih luhur di bumina Yéhuwa.
3 Tapi isukna, waktu Pasyur muka pasung Yérémia, Yérémia ngomong kieu ka manéhna,
”Yéhuwa geus ngarobah ngaran manéh jadi ’Kasieun di Mana-Mana’, lain Pasyur deui.
4 Sabab Yéhuwa nyarios kieu, ’Kuring rék ngalantarankeun manéh jeung kabéh babaturan manéh kacida sieunna. Manéh bakal nyaksian sorangan kabéh babaturan manéh dipaéhan ku pedang musuh-musuhna. Kuring rék nyerahkeun sakuliah Yéhuda ka raja Babilon. Ari jalma-jalmana mah sawaréh rék diboyong ka Babilon, sawaréhna deui rék dipaéhan ku pedang.
5 Kuring rék nyerahkeun sakabéh kakayaan ieu kota, harta milik, barang-barang nu aralus, jeung harta banda raja-raja Yéhuda ka musuh-musuh maranéhna. Musuh-musuh bakal ngajarah, ngarampas, tuluy mawa éta kabéh ka Babilon.
6 Ari manéh, Pasyur, manéh jeung rumah tangga manéh bakal diboyong ka pangbuangan. Manéh bakal dibawa ka Babilon sarta maot di ditu, geus kitu dikuburkeun bareng jeung kabéh babaturan manéh, lantaran manéh geus nepikeun ramalan palsu ka maranéhna.’”
7 Sanajan pipikiran abdi béda ti Gusti, nun Yéhuwa, Gusti ngayakinkeun abdi.
Gusti kabuktos langkung kiat tibatan abdi, Gusti tos unggul.
Abdi diseungseurikeun sadinten jeput,Dihihina ku kabéh jalma.
8 Abdi dikitukeun téh lantaran unggal abdi nyarita, abdi kedah ngagorowok jeung ngumumkeun,”Kakerasan, kaancuran!”
Ku lantaran firman Yéhuwa, abdi dihina sareng dipoyok sadinten jeput.
9 Jadi ceuk abdi téh, ”Abdi moal nyebut-nyebut Anjeunna deui.Abdi moal nyarita deui mamawa nami Anjeunna.”
Tapi ari dina haté mah firman Anjeunna téh kawas seuneu nu ngagedur, nu kakurung ku tulang-tulang.Éta geus teu bisa ditahan-tahan,Abdi teu bisa cicing waé.
10 Abdi ngadéngé loba béja goréng,Kaayaan di sakurilingeun abdi téh pikasieuneun.
Ceuk maranéhna, ”Laporkeun manéhna, hayu urang laporkeun!”
Unggal jalma nu api-api bageur ka abdi ngarep-ngarep abdi nyieun kasalahan. Ceuk maranéhna,
”Sugan wéh manéhna katipu tuluy nyieun kasalahan.Mun geus kitu mah urang bisa ngéléhkeun jeung ngabales manéhna.”
11 Tapi Yéhuwa nyarengan abdi. Anjeunna téh sapertos prajurit nu gagah perkasa.
Éta sababna nu nganiaya abdi bakal titajong jeung moal unggul.
Maranéhna bakal éra pisan sabab rencanana moal hasil.
Maranéhna bakal dihina salilana, sarta éta moal bakal dipopohokeun.
12 Tapi nun Yéhuwa, pangawasa pasukan sorga, Gusti mah mariksa jalma bener.Gusti ningali haté sareng pikiran.*
Abdi hoyong pisan ningali Gusti ngabales musuh-musuh,Sabab abdi tos nyanggakeun perkara hukum ka Gusti.
13 Pék nyanyi kanggo Yéhuwa! Puji Yéhuwa!
Sabab Anjeunna nyalametkeun nu miskin ti jalma-jalma jahat.
14 Mending abdi teu dijurukeun!
Mending abdi teu dijurukeun ku pun biang!
15 Sing dikutuk jalma nu mawa béja hadé ieu ka pun bapa,
”Anak anjeun tos lahir, anak téh pameget!”
Nu matak pun bapa jadi kacida atohna.
16 Mugia éta jalma jadi kawas kota-kota nu dibasmi ku Yéhuwa tanpa karunya.
Mugia manéhna ngadéngé sora nu ngajerit isuk-isuk sarta sora gorowokna perang ti beurang.
17 Ku naon abdi teu maot waé basa di jero kandungan?Pan mun kitu mah pun biang téh jadi kuburan abdi.Anjeunna gé moal pernah ngajuru.
18 Keur naon abdi dijurukeunAri ngan keur ningali kasusah jeung kasedih,Sarta paéh bari nandangan kaéra mah?
Catetan Tambihan
^ Atawa ”batin”.
