Yérémia 26:1-24
26 Dina awal pamaréntahan Yéhoyakim anak Yosia, raja Yéhuda, Yéhuwa nepikeun firman-Na,
2 ”Ieu nu diucapkeun ku Yéhuwa, ’Sok nangtung di buruan imah Yéhuwa tuluy ngomong ngeunaan* jalma-jalma ti kota-kota di Yéhuda nu daratang pikeun ibadah di imah Yéhuwa. Kabéh nu diparéntahkeun ku Kuring, tepikeun ka maranéhna. Sakecap gé ulah aya nu tinggaleun.
3 Sugan wéh maranéhna daék ngadéngékeun sarta tobat tina lalampahanana nu jahat. Mun geus kitu mah Kuring moal tulus* nibankeun musibat nu geus dirancang keur maranéhna ku lantaran kajahatan maranéhna.
4 Béjakeun kieu ka maranéhna, ”Ieu nu diucapkeun ku Yéhuwa, ’Lamun maranéh teu daék ngadéngékeun Kuring, teu daék ngajalankeun hukum* nu geus dibikeun ku Kuring ka maranéh,
5 lamun maranéh teu daék ngadéngékeun omongan hamba-hamba Kuring, nyaéta para nabi nu teterusan diutus ka maranéh,*
6 Kuring rék ngajadikeun ieu imah kawas Syilo. Ngaran ieu kota bakal disebut-sebut dina kutukan nu diucapkeun ku bangsa-bangsa saalam dunya.’”’”
7 Para imam, para nabi, jeung sakabéh rahayat ngadéngékeun omongan Yérémia di bumina Yéhuwa.
8 Sanggeus Yérémia bérés nepikeun naon nu diparéntahkeun ku Yéhuwa pikeun ditepikeun ka sakabéh rahayat, Yérémia ditéwak ku para imam, para nabi, jeung sakabéh rahayat. Maranéhna ngomong, ”Dipaéhan siah.
9 Ku naon manéh ngaramal kieu bari mamawa nami Yéhuwa, ’Ieu bumi bakal jadi kawas Syilo, ieu kota bakal diancurkeun jeung moal dicicingan deui’?” Yérémia dirempug ku jalma-jalma di bumina Yéhuwa.
10 Barang éta kadéngé ku para pajabat Yéhuda, maranéhna arindit ti istana raja ka bumina Yéhuwa tuluy diuk di lawang gerbang anyar bumina Yéhuwa.
11 Para imam jeung para nabi ngomong kieu ka para pajabat jeung sakabéh rahayat, ”Ieu jelema pantes dihukum pati, sabab manéhna geus ngaramalkeun musibat ka ieu kota, sakumaha nu didangu ku aranjeun nyalira.”
12 Geus kitu, Yérémia ngomong ka sakabéh pajabat jeung rahayat, ”Abdi téh diutus ku Yéhuwa pikeun ngadugikeun kekecapan nu tos didangu ku aranjeun, nyaéta ramalan ngeunaan ieu bumi sareng ieu kota.
13 Jadi, geura robah jalan hirup sareng kalakuan aranjeun. Tuturkeun ucapan Yéhuwa Allah aranjeun. Ku kituna, Yéhuwa gé teu tulus* nibankeun musibat nu tos dicarioskeun ka aranjeun téa.
14 Ari abdi mah mangga téh teuing badé dikumahakeun ogé, kumaha saéna wéh.
15 Tapi aranjeun kedah terang, upami abdi dipaéhan, aranjeun sarta ieu kota, kitu deui pendudukna, kedah tanggung jawab lantaran maéhan jalmi nu teu salah, sabab abdi téh bener-bener diutus ku Yéhuwa pikeun ngadugikeun sadaya ucapan nu tos didangu ku aranjeun.”
16 Geus kitu, para pajabat jeung sakabéh rahayat ngomong ka para imam jeung para nabi, ”Ieu jelema sakuduna mah ulah dipaéhan, da manéhna ngomong ka urang sadaya téh ngawakilan Yéhuwa Allah urang.”
17 Salian ti éta, sababaraha kokolot éta nagri narangtung tuluy ngaromong kieu ka sakumna jamaah,
18 ”Dina jaman Hizkia raja Yéhuda, Mikha ti Morésyét pernah nepikeun ramalan kieu ka sakabéh urang Yéhuda, ’Ieu nu diucapkeun ku Yéhuwa, pangawasa pasukan sorga,
”Zion bakal diwuluku* kawas kebon,Yérusalém bakal jadi tumpukan barangkal,Gunung tempat bumina Allah* bakal kawas leuweung.”’
19 ”Manéhna teu dipaéhan pan ku Hizkia raja Yéhuda jeung sakabéh rahayat Yéhuda? Raja sieun pan ka Yéhuwa tuluy nyuhunkeun piwelas Yéhuwa? Ku kituna, Yéhuwa teu tulus* nibankeun musibat nu tos dicarioskeun ku Anjeunna ka maranéhna. Kadé, urang bisa waé nibankeun musibat ka diri sorangan.
20 ”Aya ogé jalma séjén nu ngaramal bari mawa nami Yéhuwa. Ngaranna téh Uriya anak Syémaya ti Kiriat-yéarim. Harita manéhna ngaramal ngeunaan ieu kota jeung ieu nagri saperti Yérémia.
21 Barang éta kadéngé ku Raja Yéhoyakim, sakabéh prajurit nu perkasa, sarta sakabéh pajabat, seug Raja néangan cara pikeun maéhan manéhna. Ngadéngé kitu, Uriya jadi sieun tuluy kabur ka Mesir.
22 Geus kitu, Raja Yéhoyakim ngutus Élnatan anak Akhbor jeung sababaraha jalma séjénna ka Mesir.
23 Uriya ditéwak di Mesir tuluy digiring ka Raja Yéhoyakim. Raja maéhan manéhna ku pedang, tuluy mayitna dialungkeun ka kuburan rahayat.”
24 Tapi Yérémia mah didukung ku Ahikam anak Syafan, jadi manéhna teu diserahkeun ka jalma-jalma pikeun dipaéhan.
Catetan Tambihan
^ Atawa bisa jadi ”ka”.
^ Atawa ”Kuring bakal kaduhung”.
^ Atawa ”pituduh”.
^ As. ”nu diutus sanggeus Kuring hudang isuk-isuk”.
^ Atawa ”Yéhuwa gé kaduhung”.
^ Diguar.
^ Atawa ”Gunung tempatna bait”.
^ Atawa ”Yéhuwa kaduhung”.
