Yérémia 28:1-17
-
Nabi palsu Hanania ngalawan Yérémia (1-17)
28 Dina taun éta kénéh, dina awal pamaréntahan Zédékia raja Yéhuda, nyaéta dina taun kaopat bulan kalima, Nabi Hanania anak Azur ti Gibéon ngomong ka abdi di bumina Yéhuwa, hareupeun para imam jeung sakabéh rahayat, kieu cenah,
2 ”Ieu nu diucapkeun ku Yéhuwa Allah Israél, pangawasa pasukan sorga, ’Kai tanggungan* raja Babilon ku Kuring rék dipotongkeun.
3 Di jero dua taun, kabéh paparabotan imah Yéhuwa, nu geus dibawa ka Babilon ku Nébukhadnézar raja Babilon, ku Kuring rék dipulangkeun ka ieu tempat.’
4 ’Yékonia anak Yéhoyakim, raja Yéhuda, ku Kuring gé rék dipulangkeun bareng jeung kabéh urang Yéhuda nu diboyong ka Babilon, sabab kai tanggungan raja Babilon ku Kuring rék dipotongkeun,’ saur Yéhuwa.”
5 Ngadéngé kitu, Nabi Yérémia ngomong ka Nabi Hanania hareupeun para imam jeung kabéh rahayat nu keur narangtung di bumina Yéhuwa.
6 Ceuk Nabi Yérémia, ”Amin!* Mugia Yéhuwa ngalaksanakeunana! Mugia paparabotan bumina Yéhuwa sareng sadaya jalmi nu diboyong ka Babilon téh ku Yéhuwa dipulangkeun ka ieu tempat, sakumaha ramalan anjeun.
7 Tapi, mangga dangukeun ucapan abdi nu badé didugikeun ka anjeun sarta sadaya rahayat.
8 Kapungkur pisan, para nabi sateuacan abdi sareng sateuacan anjeun osok ngaramal ngeunaan seueur nagri jeung karajaan-karajaan nu hébat sarta ngeunaan perang, musibat, jeung wabah panyakit.
9 Jadi upami aya nabi nu ramalanana béda, nyaéta ngaramalkeun hal katengtreman, anjeunna kakara tiasa disebat nabi anu leres-leres diutus ku Yéhuwa upami ramalanana jadi kanyataan.”
10 Ti dinya, Nabi Hanania nyokot kai tanggungan tina pundukna Nabi Yérémia, tuluy dipotongkeun.
11 Pok Hanania ngomong hareupeun sakabéh rahayat, ”Ieu nu diucapkeun ku Yéhuwa, ’Tah, kawas kieu Kuring bakal motongkeun kai tanggungan Nébukhadnézar raja Babilon tina punduk sakabéh bangsa di jero dua taun.’” Geus kitu, Nabi Yérémia indit ti dinya.
12 Sanggeus Nabi Hanania motongkeun kai tanggungan nu tadina dipaké dina pundukna Nabi Yérémia, Yéhuwa nepikeun firman-Na ka Yérémia,
13 ”Jung indit tuluy béjakeun kieu ka Hanania, ’Ieu nu diucapkeun ku Yéhuwa, ”Manéh geus motongkeun kai tanggungan, jadi manéh kudu nyieun tanggungan tina beusi pikeun gagantina.”
14 Sabab ieu nu diucapkeun ku Yéhuwa Allah Israél, pangawasa pasukan sorga, ”Kuring rék masangkeun tanggungan tina beusi dina punduk sakabéh bangsa ieu, sina ngalalayanan Nébukhadnézar raja Babilon. Maranéhna kudu ngalalayanan éta Raja. Sato-sato galak di tegalan gé ku Kuring rék disina taluk ka manéhna.”’”
15 Geus kitu, Nabi Yérémia ngomong kieu ka Nabi Hanania, ”Hanania, mangga dangukeun! Anjeun teu diutus ku Yéhuwa. Tapi gara-gara anjeun, ieu bangsa percaya kana bohong.
16 Ku sabab éta, Yéhuwa nyarios kieu, ’Manéh ku Kuring rék dimusnakeun ti dunya. Taun ieu manéh bakal paéh, lantaran manéh ngajak rahayat barontak ka Yéhuwa.’”
17 Dina taun éta kénéh, dina bulan katujuh, Nabi Hanania maot.
