Yérémia 33:1-26
33 Basa Yérémia ditahan kénéh di Buruan Tukang Jaga, Yéhuwa nepikeun deui firman-Na ka Yérémia, kieu saur-Na,
2 ”Ieu nu diucapkeun ku Yéhuwa nu nyiptakeun bumi, nu ngawangun jeung ngadegkeunana, nu nami-Na téh Yéhuwa. Ieu firman Yéhuwa,
3 ’Pék sasambat, tangtu dijawab ku Kuring. Kuring bakal ngabéjaan hal-hal nu manéh can nyaho, nyaéta hal-hal nu hébat jeung teu kahontal ku akal.’”
4 ”Kuring, Yéhuwa Allah Israél, méré nyaho ngeunaan imah-imah di ieu kota sarta istana-istana para raja Yéhuda, nu diruntuhkeun pikeun nguatan pertahanan tina musuh nu ngepung jeung narajang ku pedang.
5 Kuring gé méré nyaho ngeunaan jalma-jalma nu datang pikeun merangan urang Khaldéa sarta ngeunaan tempat-tempat nu pinuh ku mayit jalma-jalma nu dipaéhan ku Kuring lantaran kacida ambekna, nyaéta jalma-jalma jahat nu ngalantarankeun Kuring ngabalieur ti ieu kota.
6 Kuring pernah ngomong kieu, ’Kuring rék mulihkeun sarta nyageurkeun ieu kota. Jalma-jalmana gé ku Kuring rék dicageurkeun sarta dilimpahan ku katengtreman jeung kaamanan.
7 Urang Yéhuda jeung urang Israél nu ditawan rék dibawa balik ku Kuring. Maranéhna rék dijadikeun hiji bangsa deui kawas baheula.
8 Kuring rék mersihan maranéhna tina dosa jeung kasalahanana ka Kuring. Kuring rék ngahampura kasalahan jeung palanggaranana ka Kuring.
9 Tiap ngaran ieu kota disebut, Kuring jadi bungah. Kabéh bangsa di bumi nu ngadéngé yén Kuring méré hal-hal hadé ka umat Kuring bakal muji jeung ngamulyakeun Kuring. Maranéhna gé bakal sieun jeung gumeter ku lantaran Kuring méré hal-hal hadé jeung katengtreman ka ieu kota.’”
10 ”Ieu nu diucapkeun ku Yéhuwa, ’Maranéh bakal ngomong yén ieu tempat téh teu kaurus, teu dicicingan ku jelema atawa sato. Maranéh gé bakal ngomong yén kota-kota Yéhuda jeung jalan-jalan di Yérusalém téh kalantar, euweuh jelema, euweuh penduduk, jeung euweuh sato. Tapi, di tempat-tempat éta bakal kadéngé
11 surak gumbira jeung sora kasukaan, sora pangantén lalaki jeung sora pangantén awéwé, sarta sora jalma-jalma nu ngomong kieu, ”Haturkeun nuhun ka Yéhuwa, pangawasa pasukan sorga, sabab Yéhuwa téh bageur. Asih satia-Na aya keur salalanggengna!”’
”’Maranéhna bakal mawa kurban pamuji sukur ka imah Yéhuwa, sabab Kuring rék mawa balik rahayat ieu nagri nu keur ditawan. Maranéhna bakal jadi kawas baheula deui,’ ceuk Yéhuwa.”
12 ”Ieu nu diucapkeun ku Yéhuwa, pangawasa pasukan sorga, ’Di tempat nu kalantar ieu, nu teu dicicingan ku jelema atawa sato, sarta di sakabéh kota-kotana, bakal aya deui tegal jukut tempat para pangangon ngangon ingon-ingonna.’
13 ”’Di kota-kota di daérah pagunungan, di kota-kota di padataran handap, di kota-kota beulah kidul, di tanah Bényamin, di daérah sabudeureun Yérusalém, sarta di kota-kota Yéhuda, para pangangon bakal ngitung deui domba-dombana,’ ceuk Yéhuwa.”
14 ”’Bakal datang mangsana,’ ceuk Yéhuwa, ’Kuring ngalaksanakeun hal-hal hadé nu dijangjikeun ku Kuring ngeunaan urang Israél jeung urang Yéhuda.
15 Dina mangsa éta, Kuring rék milih hiji pangawasa ti turunan* Daud nu lalampahanana bener. Manéhna bakal ngajalankeun kaadilan jeung hal-hal nu bener di ieu nagri.
16 Dina mangsa éta, Yéhuda bakal disalametkeun, sarta Yérusalém bakal matuh di tempat nu aman. Ieu kota bakal dingaranan: Bebeneran téh Datangna ti Yéhuwa.’”
17 ”Ieu nu diucapkeun ku Yéhuwa, ’Bakal terus aya turunan Daud nu diuk dina tahta Israél.
18 Imam-imam Léwi gé bakal terus ngalalayanan hareupeun Kuring pikeun ngabaktikeun kurban beuleuman, meuleum kurban kadaharan, sarta ngabaktikeun kurban-kurban séjénna.’”
19 Yéhuwa nepikeun deui firman-Na ka Yérémia,
20 ”Ieu ucapan ti Yéhuwa, ’Lamun maranéh bisa ngabatalkeun perjangjian Kuring ngeunaan beurang jeung peuting, supaya beurang jeung peuting teu datang dina waktuna,
21 kakara perjangjian Kuring jeung Daud hamba Kuring bisa dibatalkeun. Mun kitu, manéhna moal boga anak lalaki nu maréntah jadi raja dina tahtana. Perjangjian Kuring jeung imam-imam Léwi nu ngalalayanan Kuring gé bisa dibatalkeun.
22 Turunan Daud hamba Kuring jeung urang Léwi nu ngalalayanan Kuring rék dijadikeun kacida lobana kawas béntang-béntang di langit nu teu bisa diitung sarta kawas keusik di laut nu teu bisa ditimbang.’”
23 Yéhuwa nepikeun deui firman-Na ka Yérémia,
24 ”Manéh teu ngadéngé kitu jalma-jalma ngaromong kieu, ’Yéhuwa bakal nolak dua kulawarga nu geus dipilih ku Anjeunna’? Umat Kuring direndahkeun ku maranéhna, geus teu dianggap hiji bangsa deui.
25 ”Ieu nu diucapkeun ku Yéhuwa, ’Sakumaha Kuring nyieun perjangjian nu langgeng ngeunaan beurang jeung peuting sarta netepkeun hukum-hukum* ngeunaan langit jeung bumi,
26 nya kitu ogé Kuring moal bakal nolak turunan Yakub sarta turunan Daud hamba Kuring. Ti antara turunan Daud, Kuring bakal milih jalma-jalma nu bakal maréntah turunan Ibrahim, Ishak, jeung Yakub, sabab Kuring bakal ngumpulkeun deui jalma-jalma nu ditawan sarta bakal mikarunya ka maranéhna.’”
