Yérémia 34:1-22
34 Yéhuwa nepikeun firman-Na ka Yérémia. Harita téh Yérusalém jeung sakabéh kotana keur diserang ku Nébukhadnézar* raja Babilon, sakabéh pasukanna, sakabéh karajaan di bumi nu dikawasaan ku manéhna, sarta sakabéh bangsa. Saur Anjeunna,
2 ”Ieu nu diucapkeun ku Yéhuwa Allah Israél, ’Jung béjakeun kieu ka Zédékia raja Yéhuda, ”Ieu nu diucapkeun ku Yéhuwa, ’Kuring rék nyerahkeun ieu kota ka raja Babilon, ku manéhna bakal diduruk.
3 Manéh moal bisa lolos, sabab manéh pasti bakal ditéwak jeung diserahkeun ka manéhna. Manéh bakal indit ka Babilon, pahareup-hareup jeung raja Babilon, sarta ngomong langsung jeung éta raja.’
4 Tapi déngékeun firman Yéhuwa, éh Zédékia raja Yéhuda, ’Ieu nu diucapkeun ku Yéhuwa ngeunaan manéh, ”Manéh moal bakal maot ku pedang.
5 Manéh bakal maot cara biasa. Waktu manéh dikuburkeun, rahayat bakal meuleum dupa keur manéh kawas nu dilampahkeun ku maranéhna ka karuhun manéh, nyaéta raja-raja saacan manéh. Maranéhna bakal ceurik tuluy ngomong, ’Aduh, Juragan!’ Ieu téh bakal kajadian, sabab Kuring, Yéhuwa, geus méré nyaho kitu.”’”’”
6 Sakabéh kekecapan éta ku Nabi Yérémia ditepikeun ka Zédékia raja Yéhuda di Yérusalém
7 waktu pasukan raja Babilon keur merangan Yérusalém jeung sakabéh kota Yéhuda nu nyésa kénéh, nyaéta Lakhis jeung Azéka. Ti antara kota-kota Yéhuda nu dibénténgan, ngan kota-kota éta nu aya kénéh.
8 Yéhuwa nepikeun firman-Na ka Yérémia sanggeus Raja Zédékia nyieun perjangjian jeung sakabéh rahayat di Yérusalém pikeun ngabébaskeun budak beulian.
9 Eusi perjangjianana téh nyaéta unggal jalma kudu ngabébaskeun budak beulian urang Ibrani, boh lalaki boh awéwé, supaya teu aya sasama urang Yahudi nu jadi budak beulian.
10 Éta diturut ku sakabéh pajabat jeung rahayat. Maranéhna satuju kana perjangjian nu nyebutkeun yén maranéhna kudu ngabébaskeun budak beulian lalaki jeung awéwé, teu meunang aya nu diperbudak deui. Maranéhna narurut, seug ngabébaskeun budak beulianana.
11 Tapi teu lila ti dinya, para budak beulian lalaki jeung awéwé téh dibawa deui, dipaksa jadi budak beulian deui.
12 Jadi, Yéhuwa nepikeun firman-Na ka Yérémia. Kieu saur Yéhuwa,
13 ”Ieu nu diucapkeun ku Yéhuwa Allah Israél, ’Baheula, waktu Kuring mawa karuhun maranéh budal ti tanah Mesir, ti pangbudakan, Kuring nyieun perjangjian kieu jeung maranéhna,
14 ”Dina taun katujuh, maranéh kabéh kudu ngabébaskeun dulur Ibrani nu dijual ka maranéh, nu geus digawé keur maranéh salila genep taun. Éta jalma kudu dibébaskeun.” Tapi, karuhun maranéh teu daék ngadéngékeun atawa merhatikeun omongan Kuring.
15 Ari maranéh mah anyar-anyar ieu babalik pikir sarta ngalampahkeun nu bener dina pandangan Kuring. Maranéh ngabébaskeun sasama maranéh sarta nyieun perjangjian hareupeun Kuring di imah nu nyandang ngaran Kuring.
16 Hanjakalna, maranéh barobah deui jeung nganajisan ngaran Kuring. Maranéh kalah ka mawa balik deui budak beulian lalaki jeung awéwé, padahal maranéhna geus dibébaskeun pikeun indit ka mana waé sakahayangna. Maranéhna dipaksa jadi budak beulian deui.’
17 ”Ku kituna, ieu nu diucapkeun ku Yéhuwa, ’Maranéh teu nurut ka Kuring sarta teu ngabébaskeun dulur jeung sasama maranéh. Jadi, maranéh rék dibébaskeun ku Kuring,’ ceuk Yéhuwa. ’Bébas téh waktu maranéh paéh ku pedang, wabah panyakit, jeung kalaparan. Sakabéh karajaan di bumi nu ningali maranéh bakal sarieuneun.
18 Ieu nu bakal kaalaman ku jalma-jalma nu ngalanggar perjangjian Kuring sarta teu ngajalankeun perjangjian nu dijieun ku maranéhna hareupeun Kuring waktu maranéhna meulah anak sapi jadi dua tuluy leumpang di antara dua beubeulahan anak sapi éta,*
19 nyaéta para pajabat Yéhuda, pajabat Yérusalém, pajabat istana, imam, jeung sakabéh rahayat ieu nagri nu leumpang di antara dua beubeulahan anak sapi éta:
20 Maranéhna rék diserahkeun ka musuh-musuh maranéhna sarta ka jalma-jalma nu ngincer nyawa maranéhna. Mayitna bakal jadi parab manuk-manuk nu ngahakan bangké sarta sato-sato galak di bumi.
21 Zédékia raja Yéhuda jeung para pajabatna rék diserahkeun ka musuh-musuh maranéhna, ka jalma-jalma nu ngincer nyawa maranéhna, sarta ka pasukan raja Babilon nu ayeuna keur mundur ti maranéh.’
22 ”’Kuring rék méré paréntah, sarta Kuring bakal mawa balik deui maranéhna ka ieu kota sina narajang, ngarebut, jeung ngaduruk ieu kota. Kota-kota Yéhuda bakal kalantar, moal aya nu nyicingan,’ kitu nu diucapkeun ku Yéhuwa.”
Catetan Tambihan
^ As. ”Nébukhadrézar”, éjahan séjénna.
^ Ieu téh kabiasaan urang Israél pikeun ngukuhkeun perjangjian.
