Yérémia 37:1-21
37 Raja Zédékia anak Yosia téh maréntah ngaganti Konia* anak Yéhoyakim. Zédékia dijadikeun raja di Yéhuda téh ku Nébukhadnézar* raja Babilon.
2 Tapi Zédékia, para palayanna, jeung rahayat éta nagri teu daék ngadéngékeun ucapan Yéhuwa nu ditepikeun ku Nabi Yérémia.
3 Raja Zédékia ngutus Yéhukal anak Syélémia jeung Imam Zéfanya anak Maaséya pikeun manggihan Nabi Yérémia sarta ngomong kieu, ”Pangdoakeun abdi sadaya ka Yéhuwa, Allah abdi sadaya.”
4 Harita mah Yérémia bisa kénéh indit ka mana waé di tengah jalma réa, da can diasupkeun ka panjara.
5 Basa éta téh urang Khaldéa nu keur ngepung Yérusalém malundur ti Yérusalém lantaran ngadéngé pasukan Firaun rék datang ti Mesir.
6 Tuluy, Yéhuwa nepikeun firman-Na ka Nabi Yérémia, kieu saur-Na,
7 ”Ieu nu diucapkeun ku Yéhuwa Allah Israél, ’Maranéh kudu ngomong kieu ka raja Yéhuda nu ngutus maranéh pikeun ménta pituduh ka Kuring, ”Pasukan Firaun nu datang pikeun nulungan Raja bakal baralik deui ka Mesir nagrina.
8 Ari urang Khaldéa bakal baralik deui ka dieu. Maranéhna bakal nyerang, ngarebut, jeung ngaduruk ieu kota.”
9 Yéhuwa ngucap kieu, ”Ulah ngabobodo diri sorangan sarta nganggap urang Khaldéa moal balik deui, da maranéhna téh pasti balik deui.
10 Sanajan maranéh ngéléhkeun sakabéh pasukan urang Khaldéa nu nyerang maranéh, sarta nu nyésa ti maranéhna téh ngan nu raraheut wungkul, angger wéh maranéhna bakal tingkoréjat deui tina kémahna tuluy ngaduruk ieu kota.”’”
11 Barang pasukan urang Khaldéa alundur ti Yérusalém lantaran nyingkahan pasukan Firaun,
12 Yérémia indit ti Yérusalém ka tanah Bényamin pikeun narima warisan di antara dulur-dulurna.
13 Tapi waktu nepi ka Gerbang Bényamin, Nabi Yérémia ditéwak ku kapala tukang jaga nu ngaranna Iriya anak Syélémia incu Hanania. Iriya ngomong kieu, ”Manéh rék bélot ka urang Khaldéa, nya?”
14 Yérémia némbalan, ”Henteu, abdi teu bélot ka urang Khaldéa.” Tapi ku Iriya teu didéngékeun. Jadi, Yérémia ditéwak ku manéhna tuluy dibawa ka para pajabat.
15 Para pajabat ambek ka Yérémia. Manéhna diteunggeulan tuluy dipanjarakeun di imahna Yéhonatan sékertaris téa, nu geus dijadikeun panjara.
16 Yérémia ditahan mangpoé-poé di rohangan jero taneuh.
17 Geus kitu, Raja Zédékia ngirim utusan pikeun mawa Yérémia. Raja cicing-cicing nanya kieu ka manéhna di istana, ”Aya pesen teu ti Yéhuwa?” Yérémia ngajawab, ”Aya.” Manéhna neruskeun, ”Raja bakal diserahkeun ka raja Babilon.”
18 Yérémia gé ngomong kieu ka Raja Zédékia, ”Abdi téh gaduh salah naon ka Raja, ka hamba-hamba Raja, sareng ka ieu bangsa dugi ka abdi dipanjara?
19 Ayeuna, mana nabi-nabi aranjeun nu ngaramal kieu, ’Raja Babilon moal bakal datang jeung nyerang aranjeun sarta ieu nagri’?
20 Ayeuna mangga dangukeun abdi, Gusti Raja. Mugia Raja ngabulkeun panuhun abdi. Abdi ulah diwangsulkeun ka bumina Yéhonatan sékertaris téa, sabab di ditu mah abdi bakal maot.”
21 Jadi, Raja Zédékia nitah supaya Yérémia ditahan di Buruan Tukang Jaga. Saban poé, manéhna dibéré roti bunder sasiki ti jalan tukang-tukang roti, nepi ka sakabéh roti di kota béak. Yérémia terus matuh di Buruan Tukang Jaga.
Catetan Tambihan
^ Ngaran séjénna téh Yéhoyakhin jeung Yékonia.
^ As. ”Nébukhadrézar”, éjahan séjénna.
