Yérémia 38:1-28
38 Syéfatia anak Matan, Gédalia anak Pasyur, Yukal anak Syélémia, jeung Pasyur anak Malkhiya ngadéngé Yérémia ngomong kieu ka sakabéh rahayat,
2 ”Ieu firman ti Yéhuwa, ’Saha waé nu tetep cicing di ieu kota bakal paéh ku pedang, kalaparan, jeung wabah panyakit. Tapi, saha waé nu masrahkeun dirina ka urang Khaldéa bakal tetep hirup, nyawana bakal salamet.’
3 Ieu nu diucapkeun ku Yéhuwa, ’Ieu kota bakal diserahkeun ka pasukan raja Babilon. Ieu kota bakal ditalukkeun ku éta raja.’”
4 Para pajabat ngomong kieu ka Raja, ”Éta jalma kedah dipaéhan, sabab para prajurit nu nyésa kénéh di ieu kota sareng sakabéh rahayat téh jadi leutik haté gara-gara omonganana. Éta jalma teu hayang rahayat hirup tengtrem, hayangna rahayat téh keuna musibat.”
5 Raja Zédékia ngajawab, ”Pék manéhna rék dikukumaha gé kumaha maranéh, da Raja mah teu bisa ngahalang-halang.”
6 Kerewek Yérémia ditangkep tuluy diasupkeun ka jero sumur, diulur ku tambang. Éta sumur téh ayana di Buruan Tukang Jaga, milik Malkhiya putra raja. Sumurna teu aya caian, ngan aya leutak wungkul. Lalaunan Yérémia tilelep dina leutak.
7 Ébéd-mélékh urang Étiopia, pajabat istana, nyahoeun yén Yérémia diasupkeun ka jero sumur. Harita, Raja keur diuk di Gerbang Bényamin.
8 Jadi, Ébéd-mélékh indit ti istana pikeun manggihan Raja. Manéhna ngomong kieu,
9 ”Gusti Raja, lalampahan maranéhna ka Nabi Yérémia téh jahat. Maranéhna ngasupkeun Yérémia ka jero sumur. Lamun kitu, manéhna bakal maot kalaparan, da di ieu kota teu aya deui roti.”
10 Tuluy, Raja méré paréntah ka Ébéd-mélékh urang Étiopia éta, ”Sok bawa 30 urang ti dieu, tuluy kaluarkeun Nabi Yérémia tina sumur, bisi kaburu maot.”
11 Bral Ébéd-mélékh jeung jalma-jalma éta indit ka istana, ka rohangan handapeun tempat nyimpen harta. Di dinya, maranéhna nyokot sababaraha kaén bubututan jeung sosoéhan. Terus, éta kabéh diulurkeun ka Yérémia di jero sumur maké tali.
12 Geus kitu, Ébéd-mélékh urang Étiopia éta ngomong ka Yérémia, ”Éta kaén bubututan jeung sosoéhan téh kepit dina kélék, sangkan anjeun teu raheut ku tali.” Ku Yérémia diturut,
13 tuluy Yérémia ditarik kaluar tina sumur maké tali. Saterusna, Yérémia matuh di Buruan Tukang Jaga.
14 Geus kitu, Raja Zédékia ngirim utusan pikeun mawa Nabi Yérémia ka manéhna di jalan asup nu katilu, nu aya di bumina Yéhuwa. Raja ngomong kieu ka Yérémia, ”Aya nu badé ditaroskeun ku abdi, tapi ulah aya nu disumput-disumputkeun.”
15 Yérémia ngajawab Zédékia, ”Upami ku abdi dicarioskeun ka Raja, tangtos abdi bakal dipaéhan ku Raja. Upami abdi masihan saran ka Raja, tangtos ku Raja moal didangukeun.”
16 Jadi, Raja Zédékia sumpah ka Yérémia bari haharéwosan. Ceuk manéhna, ”Demi Yéhuwa nu hirup, nu masihan kahirupan ka urang sadaya, abdi moal maéhan anjeun. Abdi gé moal masrahkeun anjeun ka jalma-jalma nu ngincer nyawa anjeun.”
17 Geus kitu Yérémia ngomong ka Zédékia, ”Ieu nu diucapkeun ku Yéhuwa Allah Israél, pangawasa pasukan sorga, ’Lamun manéh masrahkeun diri ka para pajabat raja Babilon, manéh bakal tetep hirup. Ieu kota gé moal bakal diduruk. Manéh jeung kulawarga manéh bakal tetep hirup.
18 Tapi lamun manéh teu daék masrahkeun diri ka para pajabat raja Babilon, ieu kota bakal diserahkeun ka urang Khaldéa sarta bakal diduruk. Manéh gé moal bakal lolos ti maranéhna.’”
19 Raja Zédékia ngomong kieu ka Yérémia, ”Abdi sieun ku urang Yahudi nu bélot ka urang Khaldéa. Lamun abdi diserahkeun ka maranéhna, meureun abdi bakal disiksa.”
20 Tapi Yérémia ngajawab, ”Raja moal bakal diserahkeun ka maranéhna. Sok nurut kana firman Yéhuwa nu ditepikeun ku abdi, ku kituna Raja bakal tetep hirup, moal dinanaonkeun.
21 Tapi upami Raja teu kersa masrahkeun diri, Yéhuwa tos némbongkeun ka abdi yén ieu bakal kajadian.
22 Sadaya wanita di istana raja Yéhuda digiring ka para pajabat raja Babilon. Para wanita éta ngomong,’Jalmi-jalmi nu dipercaya ku Raja tos nipu sareng ngéléhkeun Raja.
Gara-gara maranéhna, sampéan Raja nepi ka tibebes kana leutak.
Ayeuna, maranéhna tos ninggalkeun Raja.’
23 Sadaya istri sareng putra-putra Raja digiring ka urang Khaldéa. Raja moal bisa lolos ti maranéhna. Tapi, Raja bakal ditéwak ku raja Babilon. Gara-gara Raja, ieu kota bakal diduruk.”
24 Geus kitu, Zédékia ngomong ka Yérémia, ”Kadé, ulah dugi ka aya nu terang, bisi anjeun maot.
25 Upami para pajabat tarerangeun yén anjeun téh nyarios sareng abdi, tuluy maranéhna datang sarta nyarios kieu ka anjeun, ’Cik béjaan, anjeun ngomong naon ka Raja? Ulah aya nu disumputkeun supaya anjeun teu dipaéhan. Raja ngomong naon ka anjeun?’
26 Jawab wéh kieu, ’Abdi nyuhunkeun ka Raja supaya teu dipulangkeun ka bumina Yéhonatan, bisi paéh di dinya.’”
27 Enya baé para pajabat téh daratang ka Yérémia jeung tatanya. Ku Yérémia dijawab sakumaha nu diparéntahkeun ku Raja. Jadi maranéhna teu tatanya deui, da teu nyahoeun naon nu diomongkeun ku Raja jeung Yérémia.
28 Nepi ka poéna Yérusalém ditalukkeun, Yérémia tetep matuh di Buruan Tukang Jaga. Manéhna masih kénéh aya di ditu waktu Yérusalém ditalukkeun.
