Yérémia 39:1-18
39 Dina taun kasalapan pamaréntahan Zédékia raja Yéhuda, dina bulan kasapuluh, Nébukhadnézar raja Babilon bareng jeung pasukanna datang ka Yérusalém tuluy ngepung éta kota.
2 Dina taun ka-11 pamaréntahan Zédékia, dina bulan kaopat poé kasalapan, maranéhna ngabobol témbok kota.
3 Sakabéh pajabat raja Babilon datang jeung diuk di Gerbang Tengah. Maranéhna téh nyaéta Samgar* nu ngaranna Nérgal-syarézér, Rabsaris* nu ngaranna Nébo-sarsékhim,* Rabmag* nu ngaranna Nérgal-syarézér, jeung sakabéh pajabat raja Babilon séjénna.
4 Waktu Zédékia raja Yéhuda jeung kabéh prajurit ningali para pajabat éta, maranéhna kabur ti kota peuting-peuting ngaliwatan gerbang di antara témbok lapis dua, nu aya di deukeut taman raja. Maranéhna terus kabur ka arah Araba.
5 Tapi ku pasukan urang Khaldéa diudag. Zédékia kasusul di Gurun Keusik Yérikho. Manéhna ditangkep tuluy dibawa ka Nébukhadnézar* raja Babilon nu keur aya di Ribla, di tanah Hamat. Di dinya, Zédékia dihukum.
6 Raja Babilon meuncitan anak-anak Zédékia nu lalaki di Ribla, hareupeun panonna pisan. Raja Babilon gé meuncitan sakabéh bangsawan Yéhuda.
7 Sanggeus éta, panon Zédékia dilolongan. Manéhna diranté ku ranté tambaga tuluy diboyong ka Babilon.
8 Geus kitu, urang Khaldéa ngaduruk istana jeung imah-imah rahayat. Témbok-témbok Yérusalém gé dirugrugkeun.
9 Rahayat nu nyésa kénéh di éta kota, jalma-jalma nu bélot ka manéhna, jeung saha waé nu masih kénéh aya di dinya ku Nébuzaradan kapala pangawal diboyong kabéh ka Babilon.
10 Tapi sawaréh ti jalma-jalma nu pangmalaratna, nu teu boga nanaon, ditinggalkeun di Yéhuda ku Nébuzaradan. Dina poé éta gé maranéhna dibéré kebon anggur jeung lahan pikeun digarap.*
11 Nébukhadnézar* raja Babilon méré paréntah kieu ngeunaan Yérémia ka Nébuzaradan kapala pangawal éta,
12 ”Téang manéhna, tuluy bawa. Urus manéhna, ulah dikukumaha. Naon waé paméntana cumponan.
13 Jadi Kapala Pangawal Nébuzaradan, Rabsaris* Nébusyazban, Rabmag* Nérgal-syarézér, jeung kabéh jalma penting ti karajaan Babilon ngirim utusan
14 pikeun ngaluarkeun Yérémia ti Buruan Tukang Jaga. Geus kitu, manéhna diserahkeun ka Gédalia anak Ahikam incu Syafan sina dibawa ka imahna Gédalia. Jadi, Yérémia matuh di antara rahayat.
15 Basa Yérémia ditahan di Buruan Tukang Jaga, Yéhuwa nepikeun firman-Na ka manéhna,
16 ”Jung béjaan Ébéd-mélékh urang Étiopia téa, ’Ieu nu dicarioskeun ku Yéhuwa Allah Israél, pangawasa pasukan sorga, ”Kuring rék ngalaksanakeun ucapan Kuring, nyaéta nibankeun musibat ka ieu kota, lain ngadatangkeun hal-hal hadé. Dina waktuna, manéh bakal ningali éta laksana.”’
17 ”Ceuk Yéhuwa, ’Tapi dina poé éta, manéh mah bakal disalametkeun ku Kuring, moal diserahkeun ka jalma-jalma nu dipikasieun ku manéh.’
18 ”’Kuring pasti bakal ngaluputkeun manéh. Manéh moal bakal paéh ku pedang. Nyawa manéh bakal salamet, sabab manéh percaya ka Kuring,’ ceuk Yéhuwa.”
Catetan Tambihan
^ Katingalina ieu téh gelaran.
^ Atawa ”kapala pajabat istana”.
^ Nurutkeun naskah Ibranina, kecap-kecapna bisa dibagi jadi, ”Nérgal-syarézér, Samgar-nébo, Sarsékhim, Rabsaris”.
^ Atawa ”kapala tukang sihir (ahli béntang)”.
^ As. ”Nébukhadrézar”, éjahan séjénna.
^ Atawa bisa jadi ”jeung dititah gawé paksa”.
^ As. ”Nébukhadrézar”, éjahan séjénna.
^ Atawa ”kapala pajabat istana”.
^ Atawa ”kapala tukang sihir (ahli béntang)”.
