Yérémia 41:1-18
41 Dina bulan katujuh, Ismail anak Nétania incu Élisyama, nu kaasup kulawarga raja sarta salah sahiji jalma penting dina karajaan, datang ka Mizpa bareng jeung sapuluh jalma séjénna, maksudna rék manggihan Gédalia anak Ahikam. Waktu maranéhna keur dahar bareng di Mizpa,
2 Ismail anak Nétania jeung sapuluh jalma téa nyarabut pedang tuluy maéhan Gédalia anak Ahikam incu Syafan. Kitu caritana manéhna maéhan jalma nu diangkat ku raja Babilon pikeun ngawasaan éta nagri.
3 Ismail gé maéhan sakabéh urang Yahudi nu babarengan jeung Gédalia di Mizpa, kitu ogé jeung para prajurit Khaldéa nu aya di dinya.
4 Sapoé sanggeus Gédalia dipaéhan, méméh maotna kanyahoan,
5 aya 80 urang nu datang ti Syikhém, Syilo, jeung Samaria. Maranéhna geus nyukur janggotna nepi ka béak, nyosoéh pakéanana, jeung nurihan awakna. Maranéhna mawa kurban kadaharan jeung menyan pikeun dibawa ka bumina Yéhuwa.
6 Ismail anak Nétania indit ti Mizpa pikeun manggihan maranéhna, bari ceurik sajajalan. Barang amprok jeung maranéhna, Ismail ngomong, ”Tepungan Gédalia anak Ahikam.”
7 Tapi waktu maranéhna nepi ka jero kota, Ismail anak Nétania sarta babaturanana maéhan maranéhna, tuluy mayit-mayitna dialungkeun ka jero sumur.
8 Tapi, aya sapuluh urang ti antara maranéhna nu ngomong kieu ka Ismail, ”Abdi sadaya ulah dipaéhan. Abdi sadaya gaduh dahareun nu disumputkeun di tegalan, nyaéta gandum, barli, minyak, jeung madu.” Jadi maranéhna teu dipaéhan, teu kawas dulur-dulurna.
9 Mayit jalma-jalma nu dipaéhan téh ku Ismail dialung-alungkeun ka sumur gedé, nu dijieun ku Raja Asa waktu perang jeung Baasya raja Israél. Éta sumur ku Ismail anak Nétania dieusian ku mayit-mayit.
10 Kabéh jalma nu aya di Mizpa ditawan ku Ismail, kaasup para putri raja jeung sakabéh jalma nu aya di Mizpa, nyaéta jalma-jalma nu dipercayakeun ku Nébuzaradan kapala pangawal téa ka Gédalia anak Ahikam pikeun dijaga. Bral Ismail anak Nétania bareng jeung para tawanan indit rék meuntas ka wilayah urang Ammon.
11 Waktu Yohanan anak Karéah jeung para panglima ngadéngé ngeunaan sakabéh kajahatan nu dilampahkeun ku Ismail anak Nétania,
12 maranéhna ngumpulkeun sakabéh lalaki tuluy indit rék merangan Ismail anak Nétania. Ismail kapanggih deukeut talaga gedé* di Gibéon.
13 Para tawanan nu diboyong ku Ismail aratoheun waktu nempo Yohanan anak Karéah sarta para panglima nu milu jeung manéhna.
14 Geus kitu, kabéh jalma ti Mizpa nu ditawan ku Ismail téh malik tuluy milu ka Yohanan anak Karéah.
15 Ari Ismail anak Nétania jeung dalapan baturna kabur ti Yohanan tuluy indit ka urang Ammon.
16 Yohanan anak Karéah jeung para panglima nyalametkeun jeung mawa para tawanan, nu diboyong ti Mizpa ku Ismail anak Nétania sanggeus Ismail maéhan Gédalia anak Ahikam. Yohanan mawa para prajurit, lalaki-lalaki, awéwé-awéwé, barudak, sarta para pajabat ti Gibéon.
17 Kabéhanana indit tuluy mondok di pamondokan milik Khimham di deukeut Bétléhém. Rencanana mah maranéhna rék indit ka Mesir.
18 Éta téh ku lantaran maranéhna sieun ku urang Khaldéa, ku sabab Ismail anak Nétania geus maéhan Gédalia anak Ahikam, anu ku raja Babilon geus diangkat pikeun ngawasaan éta nagri.
Catetan Tambihan
^ Atawa bisa jadi ”kolam gedé”.
