Yérémia 43:1-13
43 Sanggeus Yérémia bérés nepikeun firman Yéhuwa Allah maranéhna, nyaéta unggal kecap ti Yéhuwa Allah maranéhna nu kudu ditepikeun,
2 Azaria anak Hosyaya, Yohanan anak Karéah, jeung sakabéh jalma nu kurang ajar ngaromong kieu ka Yérémia, ”Bapa téh bohong! Moal mungkin Yéhuwa Allah abdi sadaya nyarios ka Bapa yén abdi sadaya teu meunang indit jeung matuh di Mesir.
3 Pasti Barukh anak Néria nu ngahasud Bapa ngarah abdi sadaya diserahkeun ka urang Khaldéa ambéh dipaéhan atawa diboyong ka Babilon.”
4 Jadi Yohanan anak Karéah, sakabéh panglima, jeung sakabéh rahayat teu nurut kana paréntah Yéhuwa pikeun tetep matuh di nagri Yéhuda.
5 Yohanan anak Karéah jeung sakabéh panglima kalah ka ngaboyong urang Yéhuda nu nyésa, padahal maranéhna kakara balik ti tempat maranéhna dipabalencarkeun pikeun matuh di tanah Yéhuda.
6 Nu diboyong téh nyaéta lalaki-lalaki, awéwé-awéwé, barudak, putri-putri raja, jeung kabéh anu dipercayakeun ku Nébuzaradan kapala pangawal téa ka Gédalia anak Ahikam incu Syafan. Nabi Yérémia jeung Barukh anak Néria gé milu diboyong.
7 Jalma-jalma téh teu daék nurut kana ucapan Yéhuwa, bral arindit ka Mesir tuluy nepi ka Tahpanhés.
8 Di Tahpanhés, Yéhuwa nepikeun firman-Na ka Yérémia,
9 ”Cokot batu-batu nu galedé, selapkeun dina téhel batu bata di lawang istana Firaun di Tahpanhés, tuluy tutupan ku semén. Keun sina kasaksian ku urang Yahudi.
10 Geus kitu béjaan maranéhna, ’Ieu nu diucapkeun ku Yéhuwa Allah Israél, pangawasa pasukan sorga, ”Kuring ngutus hamba Kuring, nyaéta Nébukhadnézar* raja Babilon. Kuring bakal masang tahtana percis di luhureun batu-batu nu disumputkeun ieu. Manéhna bakal masang kémah karajaanana di dinya.
11 Manéhna bakal datang jeung narajang Mesir. Nu bakal maot ku panyakit, nya disamber ku panyakit. Nu bakal ditawan, nya digiring ka pangbuangan. Nu bakal maot ku pedang, nya disamber ku pedang.
12 Kuil-kuil déwa Mesir rék diduruk ku Kuring. Éta raja tangtu bakal ngaduruk kabéhanana jeung ngaboyong aallahanana. Keur manéhna mah ngarebut Mesir téh gampang, sarua gampangna kawas pangangon maké jubahna. Geus kitu mah manéhna bakal indit ti dinya, teu raheut-raheut acan.
13 Tugu-tugu Bét-syémés* di Mesir ku manéhna bakal diancur-ancurkeun. Kuil-kuil déwa Mesir ku manéhna bakal diduruk.”’”
Catetan Tambihan
^ As. ”Nébukhadrézar”, éjahan séjénna.
^ Atawa ”Kuil Panonpoé”, nyaéta kota kuno Héliopolis.
