Yérémia 50:1-46
50 Yéhuwa nepikeun firman-Na ka Nabi Yérémia ngeunaan Babilon, nyaéta nagrina urang Khaldéa. Kieu saur-Na,
2 ”Umumkeun ieu béja di antara bangsa-bangsa, uarkeun.
Pasang tanda jalan* tuluy uarkeun.
Ulah aya nu disumputkeun!
Béjaan kieu, ’Babilon geus direbut.
Déwa Bél geus diéra-éra,
Déwa Mérodakh geus sieuneun.
Patung-patung geus diéra-éra,
Berhala-berhala nu pikageuleuheun* geus sarieuneun.’
3 Hiji bangsa geus datang nyerang manéhna ti kalér.
Nu matak manéhna jadi tempat nu pikasieuneun,Euweuh nu nyicingan.
Boh manusa boh sato, kabéhanana geus kalabur.Kabéh geus ninggalkeun éta tempat.”
4 Saur Yéhuwa, ”Dina mangsa éta, urang Israél jeung urang Yéhuda bakal karumpul. Maranéhna bakal leumpang bari ceurik, tuluy babarengan néangan pituduh Yéhuwa Allah maranéhna.
5 Maranéhna bakal nanyakeun jalan ka Zion, rét naringali ka dinya. Ceuk maranéhna, ’Hayu urang jadi umat Yéhuwa deui, nu katalian ku perjangjian langgeng nu moal bakal dipopohokeun.’
6 Umat Kuring geus kawas ingon-ingon nu nyasab. Disasabkeunana téh ku para pangangonna. Maranéhna dibawa aprak-aprakan ka gunung, ngumbara ti gunung ka pasir.* Maranéhna geus parohoeun ka tempat matuhna.
7 Maranéhna diteureuy ku musuh-musuh nu manggihanana. Ceuk musuh-musuh téh, ’Ah, da lain salah urang, bongan maranéhna dosa ka Yéhuwa. Maranéhna dosa ka sumber bebeneran jeung harepan karuhunna, nyaéta Yéhuwa.’”
8 ”Geura kabur ti Babilon,Kaluar ti nagrina urang Khaldéa,Sing jadi kawas domba jalu nu mingpin domba-domba séjénna.
9 Sabab Kuring ngageroan jeung ngadatangkeunKumpulan bangsa nu hébat ti nagri kalér pikeun nyerang Babilon.
Maranéhna bakal narajang ku barisan tempur,Tuluy Babilon bakal direbut.
Anak panah bangsa-bangsa kawas anak panah hiji prajuritNu nyababkeun kolot kaleungitan budakna,Tara méngpar tina sasaran.
10 Khaldéa bakal dijarah.
Kabéh nu meunang jarahan bakal puas kabina-bina,” saur Yéhuwa.
11 ”Manéh terus bungah,Atoh waktu ngarampog milik Kuring.
Manéh terus ancul-anculan dina jukut kawas sapi bikangSarta terus ngahiem kawas kuda jalu.
12 Indung manéh geus diéra-éra.
Awéwé nu ngalahirkeun manéh geus kuciwa.
Manéhna téh jadi nu pangleutikna di antara bangsa-bangsa,Jadi kawas tanah gurun nu garing jeung gurun keusik.
13 Ku lantaran Yéhuwa ambek, manéhna moal bakal dicicingan,Bakal bener-bener kalantar.
Saha waé nu nempo jeung ngaliwat ka Babilon bakal sieuneunJeung bakal ngahina* lantaran ningali hal-hal goréng nu kaalaman ku manéhna.
14 Hé maranéh tukang panah,Jieun barisan tempur, tuluy serang Babilon ti unggal juru.
Lepaskeun panah, ulah aya nu nyésa,Da manéhna geus dosa ka Yéhuwa.
15 Gorowokkeun perang ka manéhna di unggal juru.
Manéhna geus taluk.
Pilar-pilarna geus rarubuh, témbok-témbokna geus raruntuh,Sabab éta téh babales ti Yéhuwa.
Pék bales manéhna,
Sakumaha kalakuanana baréto ka batur.
16 Jalma nu nebar binih di Babilon ulah aya nu disésakeun,Kitu ogé jeung jalma nu ngala dina usum* panén.
Lantaran hayang kabur tina pedang musuh nu kejem, masing-masing bakal balik ka bangsana sorangan,Masing-masing bakal kabur ka nagrina sorangan.
17 ”Urang Israél téh kawas domba nu paburencay lantaran dibeberik ku singa-singa. Mimitina maranéhna dihakan ku raja Asiria, geus kitu tulang-tulangna digarogotan ku Nébukhadnézar* raja Babilon.
18 Ku sabab kitu, ieu nu diucapkeun ku Yéhuwa Allah Israél, pangawasa pasukan sorga, ’Kuring rék ngahukum raja Babilon jeung nagrina, kawas Kuring ngahukum raja Asiria.
19 Israél ku Kuring rék dibawa balik ka tegal jukutna. Manéhna bakal ngadahar jukut di Karmél, Basyan, sarta pagunungan Éfraim jeung Giléad nepi ka seubeuh.’”
20 Saur Yéhuwa, ”Dina jaman éta,Kasalahan Israél bakal ditéangan,Tapi teu kapanggih.Dosa-dosa Yéhuda gé moal bakal kapanggih,Sabab Kuring bakal ngahampura jalma-jalma nu harirup kénéh.”
21 ”Serang nagri Mérataim sarta penduduk Pékod.
Keun maranéhna sina ditumpes jeung diparaéhan nepi ka béak,” saur Yéhuwa.
”Jalankeun sakabéh paréntah Kuring.
22 Kadéngé sora perang di éta nagri,Musibat nu hébat.
23 Palu nu ngancurkeun bangsa-bangsa di sakuliah bumi geus dipotongkeun jeung dibubukkeun!
Babilon geus jadi tempat nu pikasieuneun di antara bangsa-bangsa!
24 Éh Babilon, Kuring geus masang jiret keur manéh.Manéh geus karingkus, tapi manéh teu engeuh.
Manéh geus kapanggih jeung katéwak,Da bongan manéh ngalawan ka Yéhuwa.
25 Yéhuwa geus muka gudang-NaJeung ngaluarkeun pakarang-pakarang perang pikeun numplekkeun amarah-Na,
Sabab aya nu kudu dilampahkeun ku Gusti Nu Maha Agung, Yéhuwa, pangawasa pasukan sorga,Di nagrina urang Khaldéa.
26 Geura daratang ti tempat nu jauh, serang Babilon,
Buka lumbung-lumbungna.
Tumpuk jarahan sing ngagugunung kawas tumpukan gandum.
Ancurkeun manéhna nepi ka béak,
Ulah aya saurang-urang acan nu diantep hirup.
27 Paéhan kabéh sapi jalu ngorana,Giring ka pameuncitan.
Cilaka jalma-jalma éta, sabab poéna geus datang,Poé maranéhna dihukum!
28 Kadéngé sora jalma-jalma lalumpatan,Kalabur ti nagri Babilon.Maranéhna nguarkeun di Zion yén Allah Yéhuwa keur ngabales.Éta téh babales demi bait-Na.
29 Geroan tukang-tukang panah.Kumpulkeun kabéh tukang panah sina nyerang Babilon.
Pék pasang kémah sakurilingeunana ambéh ulah aya nu lolos.
Bales manéhna sakumaha kalakuanana.
Lalampahanana baréto ka batur, balikkeun deui ka manéhna,
Sabab manéhna téh geus ngajago hareupeun Yéhuwa,Hareupeun Allah Israél Nu Suci.
30 Ku kituna, para pamuda bakal paraéh di alun-alun,Para prajurit bakal tariwas dina poé éta,” saur Yéhuwa.
31 ”Éh Babilon nu kurang ajar, Kuring téh musuh manéh,” saur Gusti Nu Maha Agung, Yéhuwa, pangawasa pasukan sorga.”Pasti bakal datang poéna, poé manéh dihukum ku Kuring.
32 Éh Babilon nu kurang ajar, manéh bakal titajong jeung tigedebug.Moal aya nu ngahudangkeun.
Kota-kota manéh bakal diduruk ku Kuring,Kitu ogé jeung kabéh nu aya di sakurilingeun manéh.”
33 Ieu nu diucapkeun ku Yéhuwa, pangawasa pasukan sorga,
”Urang Israél jeung urang Yéhuda téh ditindes.Maranéhna ditahan ku nu ngaboyongna,
Teu meunang bébas.
34 Tapi Nu Nebus maranéhna téh kuat,
Nami-Na téh Yéhuwa, pangawasa pasukan sorga.
Anjeunna pasti bakal ngurus perkara hukum maranéhna,Supaya nagri maranéhna ayem tengtrem.Sabalikna, penduduk Babilon mah gulinggasahan.
35 Saur Yéhuwa, ”Pedang bakal narajang urang Khaldéa,Narajang penduduk Babilon, para pajabatna, jeung jalma-jalma bijaksana.
36 Pedang bakal narajang jalma-jalma nu omonganana euweuh eusina,* sarta maranéhna moal bakal nyaho kudu kumaha.
Pedang bakal narajang para prajuritna, sarta maranéhna jadi sarieuneun.
37 Pedang bakal narajang kuda jeung karéta perang maranéhnaSarta narajang jalma-jalma ti rupa-rupa bangsa nu matuh di dinya.Maranéhna bakal kawas awéwé nu kasieunan.
Pedang bakal narajang harta bandana, éta kabéh bakal dijarah.
38 Cilaka walungan-walunganana, kabéh bakal disaatkeun,
Sabab éta nagri téh pinuh ku patung ukiran.Kalakuan maranéhna gé kawas nu gélo sabab meunang titingalian nu pikasieuneun.
39 Ku sabab kitu, sato-sato gurun keusik jeung sato-sato nu babaung bakal cicing di éta kota,Kitu ogé jeung manuk onta.
Éta kota moal bakal dicicingan ku jelema.Ti jaman ka jaman, moal aya saurang-urang acan nu cicing di dinya.”
40 ”Sakumaha Sodom jeung Gomora sarta kota-kota tatanggana diancurkeun nepi ka béak, Babilon gé moal aya nu nyicingan. Euweuh saurang-urang acan nu bakal matuh di dinya,” saur Yéhuwa.
41 Hiji bangsa bakal datang ti Kalér.Bangsa nu hébat jeung raja-raja nu mulya bakal munculTi tempat-tempat nu pangjauhna di bumi.
42 Senjatana téh busur panah jeung tumbak.
Maranéhna kejem pisan jeung tégaan.
Waktu tarumpak kuda,Sora maranéhna téh kawas laut nu ngaguruh.
Maranéhna ngahiji dina barisan tempur ngalawan maranéh, éh penduduk Babilon.
43 Waktu raja Babilon ngadéngé béja ngeunaan maranéhna,Leungeunna ngulapés bakating ku sieun.
Manéhna kacida nalangsana,Ngarasa nyeri kawas awéwé nu keur ngajuru.
44 ”Cara singa kaluar ti leuweung nu rékép di sapanjang Walungan Yordan, hiji jalma bakal datang tuluy nyerang tegal-tegal jukut Babilon nu aman. Geus kitu, jalma-jalma bakal kabur ti éta nagri. Jalma nu geus dipilih éta bakal diangkat pikeun jadi pangawasa éta nagri. Sabab saha nu kawas Kuring? Saha nu wani nangtang ka Kuring? Pangangon mana nu sanggup ngalawan ka Kuring?
45 Hé jalma-jalma, déngékeun putusan Yéhuwa ngeunaan Babilon sarta rencana Anjeunna ngeunaan nagrina urang Khaldéa. Ieu putusanana:
Anak-anak domba pasti digusur.
Tempat-tempat matuh maranéhna bakal disina kalantar ku lantaran jalma-jalma éta.
46 Waktu Babilon direbut, sorana matak bumi eundeur.Bangsa-bangsa bakal ngadéngé sora tingjarerit.”
Catetan Tambihan
^ Atawa ”tihang tanda”.
^ Kecap Ibranina bisa jadi aya patalina jeung kecap ”tai” nu nunjukkeun sakumaha pikageuleuheunana éta.
^ Atawa ”bukit”.
^ As. ”ngahéot”.
^ Atawa ”usim”.
^ As. ”Nébukhadrézar”, éjahan séjénna.
^ Atawa ”narajang nabi-nabi palsu”.
