Yérémia 52:1-34
52 Basa jadi raja, Zédékia téh umur 21 taun. Manéhna maréntah salila 11 taun di Yérusalém. Ngaran indungna téh Hamutal anak Yérémia, asalna ti Libna.
2 Manéhna terus milampah nu jahat dina pandangan Yéhuwa, sakumaha kabéh lalampahan Yéhoyakim.
3 Aya kajadian goréng di Yérusalém jeung di Yéhuda téh lantaran Yéhuwa geus ambek jeung hayang nyingkirkeun maranéhna ti hareupeuna-Na. Teu lila ti dinya, Zédékia barontak ngalawan ka raja Babilon.
4 Dina taun kasalapan pamaréntahan Zédékia, nyaéta dina poé kasapuluh bulan kasapuluh, Nébukhadnézar* raja Babilon bareng jeung pasukanna datang nyerang Yérusalém. Maranéhna masang kémah hareupeun Yérusalém jeung ngawangun témbok sakurilingna pikeun ngepung éta kota.
5 Éta kota dikepung nepi ka taun ka-11 pamaréntahan Raja Zédékia.
6 Dina poé kasalapan bulan kaopat, aya kalaparan nu hébat di kota. Jalma-jalma teu baroga dahareun.
7 Tungtungna témbok kota dijebol. Peutingna, waktu kota dikepung kénéh ku urang Khaldéa, kabéh prajurit kabur ti éta kota ngaliwatan gerbang di antara témbok lapis dua, nu aya di deukeut taman raja. Maranéhna terus kabur ka arah Araba.
8 Tapi, Zédékia diudag ku pasukan Khaldéa. Manéhna kasusul di Gurun Keusik Yérikho sarta ditinggalkeun ku pasukanna sorangan.
9 Raja Zédékia ditéwak tuluy dibawa ka raja Babilon di Ribla di tanah Hamat. Di ditu manéhna dihukum.
10 Barudakna nu lalaki dipareuncitan ku raja Babilon, disaksian ku Zédékia sorangan. Para pamingpin Yéhuda gé dipareuncitan di Ribla.
11 Geus kitu, panon Zédékia dilolongan ku raja Babilon, tuluy manéhna diranté ku ranté tambaga sarta dibawa ka Babilon. Manéhna terus dipanjara di ditu nepi ka maotna.
12 Dina poé kasapuluh bulan kalima, nyaéta dina taun ka-19 pamaréntahan Nébukhadnézar* raja Babilon, saurang palayan raja, nyaéta Nébuzaradan kapala pangawal, datang ka Yérusalém.
13 Manéhna ngaduruk bumina Yéhuwa, istana raja, jeung kabéh imah nu aya di Yérusalém. Kabéh imah gedong gé béak kaduruk.
14 Témbok-témbok sakuriling Yérusalém diruntuhkeun ku kabéh pasukan Khaldéa, sakumaha nu diparéntahkeun ku Nébuzaradan kapala pangawal téa.
15 Rahayat nu nyésa kénéh di éta kota, sababaraha jalma biasa, jalma-jalma nu bélot ka raja Babilon, jeung tukang-tukang nu ahli nu harirup kénéh téh ku Nébuzaradan kapala pangawal téa diboyong kabéh.
16 Anu disésakeun ku Nébuzaradan téh ngan sawaréh ti jalma-jalma nu pangmalaratna. Maranéhna dititah digarawé di kebon anggur jeung ngolah tanah.
17 Urang Khaldéa ngancurkeun pilar-pilar tambaga nu aya di bumina Yéhuwa, gorobag-gorobag, jeung Laut Tambaga nu aya di bumina Yéhuwa. Geus kitu, kabéh tambagana diakutan ka Babilon.
18 Maranéhna gé nyokotan wadah paranti lebu, singkup, alat paranti mareuman seuneu dina sumbu, mangkok, cangkir, jeung kabéh parabot tambaga nu dipaké di bait.
19 Nébuzaradan kapala pangawal téa nyokot wadah ruhak, jolang, mangkok, wadah paranti lebu, wadah lampu, cangkir, sarta mangkok-mangkok tina emas jeung pérak murni.
20 Ari tambaga tina dua pilar, tina Laut Tambaga, tina 12 sasapian tambaga handapeun Laut, jeung tina gorobag-gorobag nu dijieun ku Raja Sulaéman keur bumina Yéhuwa téh teu bisa ditimbang bakating ku loba-lobana.
21 Unggal pilar téh jangkungna 18 hasta,* kurilingna 12 hasta,* jeung kandelna opat ramo.* Tengah-tengah pilar téh kosong.
22 Mamakutaanana dijieun tina tambaga, jangkungna 5 hasta. Jaring jeung dadalimaan sakuriling mamakutaan dijieun tina tambaga. Pilar nu hiji deui jeung dadalimaanana gé dijieun sarua kawas kitu.
23 Dadalimaan nu aya di sakuriling jaring téh aya 100, tapi nu katingali mah ngan 96.
24 Éta kapala pangawal téh néwak Séraya imam kapala, Zéfanya nu mantuan imam kapala, jeung tilu tukang jaga panto.
25 Ari di kota, nu ditéwak téh hiji pajabat istana nu ngapalaan para prajurit, tujuh jurunaséhat pribadi raja, hiji sékertaris panglima nu ngasup-ngasupkeun jalma jadi prajurit, jeung 60 jalma biasa nu aya di kota.
26 Maranéhna dibawa ku Nébuzaradan kapala pangawal téa ka raja Babilon di Ribla.
27 Maranéhna kabéh dipaéhan ku raja Babilon di Ribla di tanah Hamat. Tah, kitu caritana kumaha urang Yéhuda diboyong ti nagrina.
28 Ieu jumlah jalma-jalma nu diboyong ku Nébukhadnézar:* Dina taun katujuh pamaréntahanana, aya 3.023 urang Yahudi.
29 Dina taun ka-18 pamaréntahan Nébukhadnézar,* aya 832 urang nu diboyong ti Yérusalém.
30 Dina taun ka-23 pamaréntahan Nébukhadnézar,* Nébuzaradan kapala pangawal téa ngaboyong 745 urang Yahudi.
Jadi kabéh nu diboyong téh aya 4.600 urang.
31 Dina taun Éwil-mérodakh jadi raja Babilon, Yéhoyakhin raja Yéhuda dibébaskeun jeung dikaluarkeun ti panjara ku raja Babilon. Dibébaskeunana téh dina poé ka-25 bulan ka-12, nyaéta taun ka-37 ti saprak Yéhoyakhin diboyong ti Yéhuda.
32 Éwil-mérodakh kacida bageurna ka Yéhoyakhin, nepi ka Yéhoyakhin dibéré pangkat nu leuwih luhur tibatan raja séjénna nu diboyong bareng jeung manéhna ka Babilon.
33 Jadi, Yéhoyakhin ngalaanan baju panjarana. Manéhna gé saumur-umur dahar saméja jeung Raja.
34 Sapanjang hirup, manéhna dibéré dahareun ku raja Babilon unggal poé nepi ka maotna.
Catetan Tambihan
^ As. ”Nébukhadrézar”, éjahan séjénna.
^ As. ”Nébukhadrézar”, éjahan séjénna.
^ 1 hasta = 44,5 sénti. Tingali Lamp. B14.
^ Atawa ”jeung butuh tali 12 hasta pikeun ngurilingan unggal pilar”.
^ 1 ramo = 1,85 sénti. Tingali Lamp. B14.
^ As. ”Nébukhadrézar”, éjahan séjénna.
^ As. ”Nébukhadrézar”, éjahan séjénna.
^ As. ”Nébukhadrézar”, éjahan séjénna.
