Ayub 4:1-21
4 Tuluy Élifaz urang Téman ngajawab Ayub,
2 ”Lamun aya nu ngabéjaan, manéh bakal ambek moal?
Lantaran urang teu bisa cicing waé.
3 Nya mémang manéh geus mapatahan loba jalma.Manéh gé sok nguatkeun nu lemah.
4 Ucapan manéh negerkeun jalma nu ngudupruk.Manéh nguatkeun jalma nu teu walakaya.*
5 Tapi ayeuna mah manéh pisan nu katinggang ku musibat, manéh gé teu kuat nandanganana.Manéh katerap lara sarta jadi leutik haté.
6 Ongkoh manéh hormat ka Allah, naha atuh bet teu percaya ka Anjeunna?
Ongkoh manéh satia ka Allah, naha bet pegat harepan?
7 Sok pikirkeun, pernah kitu jalma bener dibinasakeun?
Pernah kitu jalma soléh dimusnakeun?
8 Nu katempo ku urang mah nu melak kajahatanJeung nu nebarkeun masalah bakal ngala balukarna.
9 Nu kararitu mah binasa ku angin ti napas Allah.Maranéhna musna ku amarah Allah nu ngagedur.
10 Singa bisa guar-gaur, singa ngora bisa ngagerem,Tapi angger wéh singa nu kuat* gé huntuna bisa potong.
11 Singa paéh lantaran euweuh mamangsan,Sarta anak-anak singa paburencay.
12 Aya nu cicing-cicing datang terus méré béja ka urang.Aya nu ngaharéwos kana ceuli urang.
13 Peuting-peuting waktu jalma-jalma saré tibra,Urang guligah lantaran meunang titingalian.
14 Urang ngeleper,Sakujur awak ngadégdég bakating ku sieun.
15 Aya nu* ngaliwat di hareupeun urang.Urang muringkak, sabulu-bulu muriding.
16 Tuluy nu ngaliwat téh eureun,Tapi urang teu nyaho éta téh naon.
Aya nu ngabelegedeg di hareupeun urang.Harita téh keur jempling, ngong kadéngé sora,
17 ’Bisa kitu manusa leuwih bener tibatan Allah?
Bisa kitu manusa leuwih bersih tibatan Nu Nyiptana?’
18 Anjeunna teu percaya ka hamba-hamba-Na.Anjeunna néang-néang kasalahan para malaikat-Na.*
19 Komo deui ka manusa nu dijieun tina taneuh liket,Nu asalna tina kekebul,Nu babari diremukkeun kawas ngenget.*
20 Isuk-isuk maranéhna harirup kénéh, ari peutingna geus raremuk.Les maranéhna musna salilana tapi taya nu paduli.
21 Maranéhna kawas kémah nu ambruk lantaran talina dicabut.
Maranéhna paraéh jeung teu baroga kabijaksanaan.
Catetan Tambihan
^ Atawa ”nu tuurna ngadégdég”.
^ Atawa ”singa ngora nu jabrig”.
^ Atawa ”Aya mahluk roh”.
^ Atawa ”para utusana-Na”.
^ Serangga nu osok ngahakan kaén.
