Ayub 5:1-27
5 ”Sok sasambat! Mémangna aya nu ngajawab manéh?
Ka malaikat mana manéh rék ménta tulung?
2 Jalma nu bodo bakal maot ku kaambekna.Jalma nu pondok pikir bakal maot ku kasirikna.
3 Urang pernah ningali jalma bodo hirupna makmur,Tapi ujug-ujug panyicinganana dikutuk.
4 Anak-anakna euweuh nu ngajaga.Maranéhna ditindes di gerbang kota, euweuh nu nyalametkeun.
5 Nu dipanén ku jalma bodo didalahar ku nu lapar,Malahan nu aya dina rungkun cucuk gé diaralaan.Harta bandana dirampas ku batur.
6 Piraku kajahatan bijil tina kekebul?Piraku kasusah bijil ti jero taneuh?
7 Manusa téh hirupna pasti pinuh ku masalah,Kawas ruhak lembut pasti bijil tina seuneu.
8 Lamun urang jadi manéh, urang bakal ménta tulungSarta masrahkeun kasus urang ka Allah,
9 Ka Anjeunna nu ngadamel hal-hal nu hébat jeung teu kahontal ku akal,Hal-hal nu matak tajub nu teu kaitung lobana.
10 Anjeunna nurunkeun hujan ka bumi,Nyaian tegalan-tegalan.
11 Jalma leutik ku Anjeunna dipunjulkeun.Jalma nu sedih ku Anjeunna disalametkeun.
12 Anjeunna ngagagalkeun rarancang jalma licik,Supaya sagala usahana taya hasilna.
13 Anjeunna ngajiret jalma bijaksana ku kapinteranana sorangan,Supaya rencana jalma pinter gagal.
14 Keur maranéhna mah beurang téh karasana poék.Beurang-beurang maranéhna rarampa kawas geus peuting.
15 Anjeunna nyalametkeun hiji jalma tina ucapan jalma jahat nu kawas pedang,Nyalametkeun jalma miskin ti leungeun jalma nu kuat,
16 Supaya jalma leutik boga harepan,Tapi biwir jalma nu teu bener dibekem.
17 Bagja jalma nu ditegor ku Allah,Jadi ulah nampik lamun dipapatahan ku Nu Mahakawasa!
18 Sabab Anjeunna nu ngaraheutan, tapi Anjeunna ogé nu ngabulen raheutna.Anjeunna nu motongkeun, tapi Anjeunna ogé nu nyageurkeun ku panangan-Na.
19 Anjeunna bakal nyalametkeun manéh tina genep musibat,Malah ku musibat nu katujuh gé manéh moal kua-kieu.
20 Dina usum* kalaparan, manéh bakal disalametkeun tina maot.Waktu perang, manéh bakal disalametkeun tina pedang.
21 Manéh bakal dijauhkeun tina omongan nu nganyenyeri kawas pecut.Manéh gé moal sieun waktu kabinasaan narajang.
22 Kabinasaan jeung kalaparan bakal diseungseurikeun ku manéh.Ka sato galak di bumi gé manéh moal bakal sieun.
23 Batu-batu di tegalan moal bakal nyusahkeun manéh.Sato galak gé moal bakal nyerang manéh.
24 Manéh pasti bakal ngarasa aman di kémah manéh.Waktu manéh ngalongok ingon-ingon di tegalan, moal aya sato nu leungit hiji-hiji acan.
25 Manéh bakal boga loba anak,Sarta turunan manéh bakal loba pisan kawas jujukutan di bumi.
26 Manéh bakal jagjag kénéh waktu maot,Kawas sabeungkeut gandum nu diala dina usum panén.
27 Tah! Sanggeus ditilik-tilik ku urang kabéh mah, nya mémang kitu kanyataanana.
Sok déngékeun jeung tarimakeun.”
Catetan Tambihan
^ Atawa ”usim”.
