Bilangan 9:1-23
9 Dina bulan kahiji taun kadua sanggeus urang Israél budal ti Mesir, Yéhuwa ngomong kieu ka Musa di Tanah Gurun Sinai,
2 ”Urang Israél kudu nyiapkeun kurban Paskah dina waktu nu geus ditangtukeun.
3 Dina poé ka-14 bulan ieu pasosoré,* maranéh kudu nyiapkeun éta kurban dina waktu nu geus ditangtukeun. Nyiapkeunana kudu nurutkeun aturan jeung cara nu geus ditangtukeun.”
4 Jadi, Musa nitah urang Israél nyiapkeun kurban Paskah.
5 Maranéhna nyiapkeun kurban Paskah dina poé ka-14 bulan ka-1 pasosoré* di Tanah Gurun Sinai. Éta dilampahkeun ku urang Israél sakumaha paréntah Yéhuwa ka Musa.
6 Tapi aya sababaraha jalma nu najis lantaran nyabak mayit, jadi maranéhna teu bisa nyiapkeun kurban Paskah dina poé éta. Maranéhna ngadep ka Musa jeung Harun dina poé éta kénéh,
7 tuluy ngomong, ”Abdi sadaya téh najis lantaran nyabak mayit, padahal abdi sadaya hoyong ngabaktikeun kurban ka Yéhuwa bareng jeung urang Israél séjénna dina waktu nu geus ditangtukeun. Abdi sadaya kedah kumaha atuh?”
8 Ceuk Musa, ”Antosan nya di dieu, rék ditaroskeun heula ka Yéhuwa.”
9 Tuluy Yéhuwa ngomong ka Musa,
10 ”Béjaan urang Israél, ’Lamun di antara maranéh atawa turunan maranéh aya nu jadi najis lantaran nyabak mayit atawa aya nu keur iinditan jauh, manéhna kudu tetep nyiapkeun kurban Paskah keur Yéhuwa.
11 Éta kudu disiapkeun ku maranéhna dina poé ka-14 bulan ka-2 pasosoré.* Kurbanna kudu didahar bareng jeung roti nu teu diragian sarta sayur pait.
12 Ulah aya nu disésakeun nepi ka isuk-isuk. Tulang kurbanna ulah aya nu dipotongkeun. Éta kabéh kudu disiapkeun nurutkeun sakabéh aturan ngeunaan Paskah.
13 Lamun aya jalma nu teu najis atawa teu iinditan jauh, tapi manéhna embung nyiapkeun kurban Paskah, éta jalma kudu dipaéhan, sabab manéhna henteu ngabaktikeun kurban ka Yéhuwa dina waktu nu geus ditangtukeun. Manéhna kudu nanggung balukar tina dosana.
14 ”’Urang asing nu cicing di antara maranéh gé kudu nyiapkeun kurban Paskah keur Yéhuwa. Nyiapkeunana kudu nurutkeun aturan ngeunaan Paskah jeung cara nu geus ditangtukeun. Boh keur maranéh boh keur urang asing, aturanana téh sarua.’”
15 Sanggeus tabernakel bérés diadegkeun, aya méga* nu nutupan tabernakel, nyaéta kémah tempat peti perjangjian. Ari ti peuting nepi ka isuk mah éta méga téh katingalina kawas seuneu nu aya di luhureun tabernakel.
16 Kieu baé salawasna: Mun beurang tabernakelna katutup ku méga, mun peuting mégana katingali kawas seuneu.
17 Lamun mégana unggah, urang Israél kudu geura indit, tapi lamun mégana eureun di hiji tempat, nya di dinya urang Israél kudu masang kémah.
18 Ku paréntah Yéhuwa urang Israél bakal indit, ku paréntah Yéhuwa ogé urang Israél bakal masang kémah. Lamun éta méga tetep aya di luhureun tabernakel, urang Israél bakal tetep matuh di dinya.
19 Lamun mégana tetep aya di luhureun tabernakel mangpoé-poé, urang Israél bakal nurut ka Yéhuwa, moal indit ti dinya.
20 Sakapeung, éta méga aya di luhureun tabernakel téh ngan sababaraha poé. Ku paréntah Yéhuwa maranéhna bakal tetep matuh, ku paréntah Yéhuwa ogé maranéhna bakal indit.
21 Sakapeung, mégana aya di luhureun tabernakel téh ngan ti peuting nepi ka isuk. Waktu mégana unggah isuk-isuk, maranéhna kudu indit. Rék beurang rék peuting, waktu mégana unggah, nya maranéhna kudu indit.
22 Rék dua poé, sabulan, atawa leuwih ti sabulan, lamun mégana tetep matuh di luhureun tabernakel, urang Israél kudu tetep matuh di dinya, teu meunang indit. Tapi lamun mégana unggah, maranéhna kudu indit.
23 Ku paréntah Yéhuwa maranéhna bakal tetep matuh, ku paréntah Yéhuwa ogé maranéhna bakal indit. Urang Israél nurut ka Yéhuwa. Maranéhna nurut kana paréntah nu ditepikeun ku Yéhuwa ka Musa.
Catetan Tambihan
^ Bisa jadi sanggeus panonpoé surup tapi saacan poék.
^ Bisa jadi sanggeus panonpoé surup tapi saacan poék.
^ Bisa jadi sanggeus panonpoé surup tapi saacan poék.
^ Atawa ”awan”.
