Budalan 17:1-16
17 Sakumna jamaah Israél indit ti Tanah Gurun Sin. Maranéhna pundah-pindah sakumaha nu diparéntahkeun ku Yéhuwa. Tuluy maranéhna masang kémah di Réfidim, tapi di dinya euweuh cai keur nginum.
2 Jadi maranéhna ngajak paséa ka Musa, ”Ménta cai, urang hayang nginum.” Tapi ceuk Musa ka maranéhna, ”Ku naon maranéh ngajak paséa ka urang? Ku naon maranéh teterusan ngadoja Yéhuwa?”
3 Maranéhna kacida harauseunana, jadi maranéhna kukulutus ka Musa teu eureun-eureun, ”Jang naon atuh urang dibawa budal ti Mesir? Urang, barudak, jeung ingon-ingon téh rék disina paéh lantaran harauseun?”
4 Ahirna Musa sasambat ka Yéhuwa, ”Abdi kudu kumaha ka jalma-jalma ieu? Moal lila deui abdi bakal dibalédogan ku batu!”
5 Terus Yéhuwa ngomong ka Musa, ”Sok pilih sababaraha pamingpin Israél, tuluy indit jeung maranéhna bari disaksian ku urang Israél. Bawa ogé iteuk manéh nu dipaké keur neunggeul Walungan Nil.
6 Kuring bakal nangtung di hareupeun manéh di luhureun hiji batu gedé di Horéb. Manéh kudu neunggeul éta batu, engké bakal kaluar cai ti dinya keur inumeun urang Israél.” Musa ngalampahkeunana di hareupeun para pamingpin Israél.
7 Jadi ku Musa éta tempat dingaranan Masah* jeung Mériba* sabab di dinya urang Israél paséa jeung Musa sarta ngadoja Yéhuwa. Ceuk maranéhna, ”Yéhuwa téh nyarengan urang teu?”
8 Geus kitu, urang Amalék datang jeung nyerang urang Israél di Réfidim.
9 Ningali kitu, Musa ngomong ka Yosua, ”Pilih lalaki-lalaki, tuluy lawan urang Amalék. Isukan urang rék nangtung di luhureun pasir* bari nyekel iteuk nu diparéntahkeun ku Allah pikeun dibawa.”
10 Éta dilampahkeun ku Yosua sakumaha nu diparéntahkeun ku Musa. Manéhna ngalawan urang Amalék. Ari Musa, Harun, jeung Hur naék ka luhureun pasir.*
11 Lamun Musa ngangkat leungeunna, urang Israél nu unggul. Tapi lamun Musa nurunkeun leungeunna, urang Amalék nu unggul.
12 Waktu leungeun Musa cangkeul, Harun jeung Hur nyokot batu, seug Musa disina diuk dina éta batu. Geus kitu, Harun jeung Hur nanggeuy leungeun Musa, nu hiji di kénca nu hiji di katuhu. Ku kituna, Musa bisa terus ngangkat leungeunna nepi ka panonpoé surup.
13 Jadi Yosua bisa ngéléhkeun urang Amalék ku pedang.
14 Yéhuwa ngomong ka Musa, ”Tulis ieu dina buku supaya terus dipikainget, ’Kuring rék ngamusnakeun urang Amalék ti sakuliah bumi.’ Béjakeun ogé ieu ka Yosua.”
15 Tuluy Musa nyieun mézbah nu dingaranan Yéhuwa-nisi.*
16 Musa ngomong, ”Ku sabab urang Amalék ngalawan kakawasaan Yah, Yéhuwa bakal merangan maranéhna jeung turunanana.”
Catetan Tambihan
^ Hartina ”Ngadoja; Nguji”.
^ Hartina ”Paséa”.
^ Atawa ”bukit”.
^ Atawa ”bukit”.
^ Hartina ”Yéhuwa téh Panji Abdi”.
