Hakim-Hakim 10:1-18
10 Sanggeus Abimélékh maot, aya nu nyalametkeun Israél, nyaéta Tola urang Isakhar, nu cicing di Syamir di daérah pagunungan Éfraim. Manéhna téh anakna Pua, incuna Dodo.
2 Manéhna jadi hakim Israél salila 23 taun. Geus kitu manéhna maot tuluy dikuburkeun di Syamir.
3 Sanggeus manéhna, Yair urang Giléad jadi hakim Israél salila 22 taun.
4 Yair boga 30 anak lalaki, masing-masing boga hiji kaldé jeung hiji kota. Nepi ka ayeuna, 30 kota éta téh disebut Hawot-yair, kabéhanana aya di tanah Giléad.
5 Geus kitu Yair maot tuluy dikuburkeun di Kamon.
6 Urang Israél ngalampahkeun nu jahat deui dina pandangan Yéhuwa. Maranéhna nyembah déwa-déwa Baal, patung-patung Astorét, allah-allahna Siria,* allah-allahna Sidon, allah-allahna Moab, allah-allahna urang Ammon, jeung allah-allahna urang Filistin. Maranéhna ninggalkeun Yéhuwa jeung teu nyembah deui ka Anjeunna.
7 Ku kituna, Yéhuwa ambek pisan ka Israél, jadi Anjeunna nyerahkeun* maranéhna ka urang Filistin jeung urang Ammon.
8 Dina taun éta, maranéhna nyangsarakeun jeung kacida nindesna ka urang Israél. Salila 18 taun, maranéhna nindes sakabéh urang Israél nu aya di beulah wétan Walungan Yordan, nu baheulana dicicingan ku urang Amori di Giléad.
9 Urang Ammon gé osok meuntasan Walungan Yordan pikeun merangan kaom Yéhuda, Bényamin, jeung Éfraim. Israél kacida nalangsana.
10 Tuluy urang Israél ménta tulung ka Yéhuwa, kieu cenah, ”Abdi sadaya tos dosa ka Gusti, lantaran tos ninggalkeun Gusti Allah abdi jeung nyembah ka déwa-déwa Baal.”
11 Tapi Yéhuwa ngajawab urang Israél, ”Lainna Kuring geus nyalametkeun maranéh ti Mesir, ti urang Amori, urang Ammon, urang Filistin,
12 urang Sidon, Amalék, jeung Midian waktu maranéhna nindes maranéh? Pas maranéh ménta tulung ka Kuring, Kuring nyalametkeun maranéh ti jalma-jalma éta.
13 Tapi, maranéh ninggalkeun Kuring jeung nyembah allah-allah séjén. Jadi Kuring moal nyalametkeun maranéh deui.
14 Jung ménta tulung wéh ka allah-allah pilihan maranéh. Keun sina maranéhna nu nulungan waktu maranéh meunang kasusah.”
15 Tapi urang Israél ngomong kieu ka Yéhuwa, ”Abdi sadaya geus dosa. Kumaha saéna Gusti wéh badé dikukumahakeun ogé. Ngan ayeuna, tulungan abdi sadaya.”
16 Geus kitu, maranéhna nyingkirkeun patung allah-allah séjén tuluy nyembah ka Yéhuwa. Anjeunna jadi teu téga ningali kasusahan Israél.
17 Ka dieunakeun, urang Ammon ngumpulkeun pasukan jeung masang kémah di Giléad. Jadi, urang Israél gé ngumpul jeung masang kémah di Mizpa.
18 Jalma-jalma jeung para pamingpin Giléad pada ngomong kieu, ”Saha nu rék mingpin urang merangan urang Ammon? Lamun aya, manéhna rék dijadikeun kapala sakabéh penduduk Giléad.”
