Hakim-Hakim 3:1-31
3 Ieu bangsa-bangsa nu diantep ku Yéhuwa supaya maranéhna nguji kabéh urang Israél nu can pernah perang jeung urang Kanaan
2 (diantep kitu téh supaya génerasi-génerasi Israél nu saterusna, nu can pernah perang, bisa boga pangalaman jeung dilatih perang):
3 lima pangawasa urang Filistin, kabéh urang Kanaan, urang Sidon, jeung urang Héwi nu matuh di Gunung Lébanon, ti Gunung Baal-hérmon nepi ka Lébo-hamat.*
4 Bangsa-bangsa éta diantep supaya bisa nguji, urang Israél téh taat teu kana paréntah-paréntah Yéhuwa nu ditepikeun ka karuhun maranéhna ku perantaraan Musa.
5 Jadi urang Israél cicing babarengan jeung urang Kanaan, urang Hét, urang Amori, urang Périz, urang Héwi, jeung urang Yébus.
6 Maranéhna kawin jeung anak awéwé ti bangsa-bangsa éta. Anak awéwé maranéhna gé dikawinkeun jeung anak lalaki ti bangsa-bangsa éta. Maranéhna mimiti nyembah allah-allah séjén.
7 Urang Israél ngalampahkeun nu jahat dina pandangan Yéhuwa. Maranéhna poho ka Yéhuwa, Allah maranéhna, jeung nyembah déwa-déwa Baal sarta tihang-tihang suci.*
8 Ku kituna, Yéhuwa ambek pisan ka Israél. Ku Anjeunna maranéhna diserahkeun* ka Kusyan-risyataim raja Mésopotamia.* Urang Israél dijajah ku Kusyan-risyataim salila dalapan taun.
9 Waktu urang Israél ménta tulung ka Yéhuwa, Yéhuwa ngutus saurang jalma pikeun nyalametkeun urang Israél. Manéhna téh Otniél anak Kénaz, adina Kaléb.
10 Yéhuwa méré kawasa suci ka manéhna, tuluy manéhna jadi hakim Israél. Waktu manéhna indit perang, Yéhuwa nyerahkeun Kusyan-risyataim raja Mésopotamia* ka manéhna. Manéhna ngéléhkeun raja éta.
11 Geus kitu, nagri éta aman* salila 40 taun. Tuluy Otniél anak Kénaz maot.
12 Urang Israél ngalampahkeun nu jahat deui dina pandangan Yéhuwa. Ku kituna, Yéhuwa ngantep Églon raja Moab ngéléhkeun Israél, lantaran maranéhna ngalampahkeun nu jahat dina pandangan Yéhuwa.
13 Raja Églon gé ngajak urang Ammon jeung urang Amalék. Maranéhna nyerang Israél jeung ngarebut kota tangkal palem.
14 Urang Israél dijajah ku Églon raja Moab salila 18 taun.
15 Tuluy urang Israél ménta tulung ka Yéhuwa, jadi Yéhuwa ngutus saurang jalma pikeun nyalametkeun maranéhna, nyaéta Éhud anak Géra ti kaom Bényamin. Manéhna téh ngédé.* Ka dieunakeun, Israél ngutus Éhud ngirim upeti keur Églon raja Moab.
16 Éhud nyieun pedang nu seukeut dua sisina, panjangna kurang leuwih 40 sénti.* Éta pedang dibeungkeutkeun kana pingping katuhuna di jero bajuna.
17 Seug Éhud indit mawa upeti ka Églon raja Moab. Églon téh kacida lintuhna.
18 Bérés mikeun upeti, Éhud balik bareng jeung jalma-jalma nu ngangkut éta upeti.
19 Tapi barang nepi di tempat patung-patung ukiran* di Gilgal, manéhna balik deui sorangan manggihan raja. Manéhna ngomong kieu, ”Nun Raja, aya pesen rasiah kanggo Raja.” Jadi raja nitah para palayanna, ”Kalaluar heula!” Tuluy para palayanna kalaluar.
20 Éhud nyampeurkeun raja nu keur diuk sorangan di kamar paniisan di loténg. Ceuk Éhud, ”Aya pesen ti Allah kanggo Raja.” Jadi raja ngadeg tina tahtana.*
21 Serepet Éhud mesat pedang nu aya di pingping katuhuna maké leungeun kéncana, bles ditubleskeun kana beuteung raja.
22 Pedangna ambles jeung gagang-gagangna, bari katutupan ku gajih. Pedangna teu dicabut ku Éhud, diantep sina nancleb dina beuteung raja, nepi ka bijil kokotorna.
23 Éhud nutup jeung ngonci panto-panto kamar loténg éta, tuluy kaluar liwat jandéla.*
24 Sanggeus Éhud indit, para palayan raja baralik deui jeung nempo panto-panto kamar loténg téh dikonci. Ceuk maranéhna, ”Sigana Raja keur miceun* di kamar paniisan.”
25 Maranéhna terus ngadagoan nepi ka pada hariwangeun. Tapi lantaran panto kamar loténg téh teu dibuka waé ku raja, maranéhna nyokot konci tuluy muka pantona, bray kasampak raja geus ngagolér,* euweuh nyawaan!
26 Basa para palayan lila ngadagoan raja, Éhud mah geus kabur jeung salamet nepi ka Séira, ngaliwatan tempat patung-patung ukiran* téa.
27 Barang nepi, manéhna niup tarompét tanduk di daérah pagunungan Éfraim. Tuluy manéhna mingpin urang Israél turun ti daérah pagunungan éta.
28 Manéhna ngomong, ”Tuturkeun kuring, lantaran urang Moab, musuh maranéh, geus diserahkeun ku Yéhuwa ka maranéh.” Jadi maranéhna nuturkeun Éhud jeung ngarebut tempat pameuntasan di Walungan Yordan, supaya urang Moab euweuh nu bisa kabur.
29 Harita, aya kira-kira 10.000 urang Moab nu dipaéhan ku maranéhna. Kabéhanana téh priya-priya nu kuat jeung perkasa. Euweuh hiji-hiji acan nu bisa kabur.
30 Poé éta, urang Moab ditalukkeun ku urang Israél. Geus kitu, nagri éta aman* salila 80 taun.
31 Sanggeus Éhud, nu jadi hakim nu nyalametkeun Israél téh Syamgar anak Anat. Manéhna maéhan 600 urang Filistin maké tongkat paranti ngangon.
Catetan Tambihan
^ Atawa ”jalan asup ka Hamat”.
^ Tingali Daptar Istilah.
^ As. ”dijual”.
^ As. ”Aram-naharaim”.
^ As. ”Aram.”
^ Atawa ”tengtrem”.
^ Atawa ”kidal”.
^ As. ”sahasta”. Bisa jadi ieu téh hasta pondok. Tingali Lamp. B14.
^ Atawa bisa jadi ”di tambang batu”.
^ Atawa ”tempat diukna”.
^ Atawa bisa jadi ”liang angin”.
^ As. ”nutupan sukuna”.
^ Atawa ”ngagolér dina taneuh”.
^ Atawa bisa jadi ”ngaliwatan tambang batu”.
^ Atawa ”tengtrem”.
