Jabur 119:1-176
-
Ngahargaan kekecapan Allah
-
’Kumaha sangkan budak ngora hirupna bersih?’ (9)
-
”Abdi resep kana pépéling ti Gusti” (24)
-
”Sakitu cintana abdi kana hukum Gusti!” (97)
-
”Langkung seueur pangarti tibatan guru-guru abdi” (99)
-
”Firman Gusti téh lampu nu nyaangan léngkah abdi” (105)
-
”Sadaya firman Gusti téh bener” (160)
-
Nu cinta kana hukum Allah bakal ngarasa tengtrem (165)
-
א [Alef]
119 Bagja jalma nu bersih hirupna,*Nu nuturkeun hukum Yéhuwa.
2 Bagja jalma nu nuturkeun pépéling-Na,Nu sapinuh haté néangan pituduh-Na.
3 Maranéhna teu ngalampahkeun kajahatan,Hirupna nuturkeun jalan Anjeunna.
4 Nun Allah, Gusti tos miwarangSangkan paréntah ti Gusti bener-bener dijalankeun.
5 Mugia abdi tetep pengkuhPikeun ngajalankeun aturan-aturan ti Gusti!
6 Jadi waktu abdi mariksa kabéh paréntah ti Gusti,Abdi moal bakal éra.
7 Waktu abdi diajar ngeunaan putusan Gusti nu adil,Abdi bakal muji Gusti ku haté nu iklas.
8 Abdi bakal taat kana aturan ti Gusti.
Gusti, ulah pernah ninggalkeun abdi.
] בBet]
9 Kumaha carana sangkan budak ngora hirupna tetep bersih?
Nya, kudu ngajaga diri jeung taat kana firman Gusti.
10 Abdi sapinuh haté milarian pituduh Gusti,Abdi ulah dugi ka diantep ngalanggar paréntah Gusti.
11 Ucapan Gusti disimpen di jero haté abdi kawas hartaSupaya abdi teu nyieun dosa ka Gusti.
12 Nun Yéhuwa, mugia Gusti dipuji.
Ajarkeun aturan Gusti ka abdi.
13 Abdi ngabéwarakeunPutusan hukum nu tos diucapkeun ku Gusti.
14 Tibatan sagala hal nu dianggap penting ku batur,Abdi mah leuwih bungah dipasihan pépéling ku Gusti.
15 Abdi bakal bener-bener mikirkeun* pituduh ti GustiSarta terus merhatikeun jalan Gusti.
16 Abdi resep kana katangtuan hukum Gusti,Abdi moal mopohokeun firman Gusti.
ג [Gimel]
17 Sing bageur ka hamba Gusti ieu,Sangkan abdi tetep hirup sarta bisa ngajalankeun firman Gusti.
18 Beuntakeun panon abdiSupaya kaunggulan hukum Gusti téh tiasa katingal jelas ku abdi.
19 Abdi ngarasa jadi urang asing di nagri ieu.
Paréntah-paréntah Gusti ulah disumputkeun ti abdi.
20 Saban waktu, abdi hoyong pisan ngartiKana putusan hukum Gusti.
21 Gusti negor jalma nu lancang,Nyaéta jalma nu dikutuk lantaran teu taat kana paréntah Gusti.
22 Abdi ulah dugi ka dipoyok sareng dihina deui ku batur,Lantaran abdi tos nuturkeun pépéling ti Gusti.
23 Sanajan para pamingpin ngariung jeung ngagogoréng abdi,Hamba Gusti ieu mah bener-bener mikirkeun* aturan ti Gusti.
24 Abdi resep kana pépéling ti Gusti,Éta sadaya jadi jurunaséhat abdi.
ד [Dalet]
25 Abdi ngagolépak dina kekebul.
Jaga abdi sangkan tetep hirup, sakumaha nu diucapkeun ku Gusti.
26 Abdi nyaritakeun sagala lalampahan abdi ka Gusti, jadi ku Gusti abdi dibingbing.
Ajar abdi aturan ti Gusti.
27 Tulungan abdi sangkan ngarti kana pituduh Gusti,Ku kituna abdi bisa bener-bener mikirkeun* tindakan Gusti nu harébat.
28 Abdi teu bisa saré bakating ku sedih,Kuatkeun abdi sakumaha nu diucapkeun ku Gusti.
29 Tulungan sangkan abdi teu jadi tukang tipu.
Mugia Gusti resep ka abdi sarta kersa ngajar abdi hukum Gusti.
30 Abdi tos milih badé satia ka Gusti,Sabab abdi terang putusan hukum Gusti téh bener.
31 Abdi nyekel pageuh pépéling ti Gusti.
Nun Yéhuwa, abdi ulah dugi ka dikuciwakeun.*
32 Abdi hoyong pisan taat kana paréntah GustiKu lantaran abdi dikersakeun ngarti* kana paréntah Gusti,
] הHe]
33 Nun Yéhuwa, ajar abdi aturan Gusti,Abdi bakal ngajalankeunana saterusna.
34 Pasihan abdi pangarti,Ngarah abdi tiasa nuturkeun hukum GustiSarta sapinuh haté ngajalankeunana.
35 Bingbing abdi pikeun nuturkeun paréntah Gusti,Sabab éta dipikaresep ku abdi.
36 Geuing haté abdi sangkan mikacinta pépéling ti Gusti,Supaya abdi teu néangan kauntungan keur sorangan.
37 Tulungan sangkan panon abdi teu ningali sagala nu taya gunana,Bantu abdi leumpang di jalan Gusti sangkan abdi tetep hirup.
38 Laksanakeun jangji* Gusti ka hamba Gusti ieu,Supaya Gusti dihormat.*
39 Singkirkeun panghina nu dipikasieun ku abdi,Sabab putusan hukum Gusti téh hadé.
40 Abdi ngantosan pisan pituduh ti Gusti.
Jaga abdi tetep hirup, lantaran Gusti téh adil.
ו [Waw]
41 Sakumaha jangji* Gusti, nun Yéhuwa,Mugia abdi disalametkeun sarta ngarasakeun asih satia Gusti.
42 Ku kituna abdi tiasa ngajawab jalma nu ngahina abdi,Lantaran abdi percaya kana firman Gusti.
43 Tulungan, sangkan abdi terus ngucapkeun nu bener,Sabab abdi miharep kana* kaadilan Gusti.
44 Abdi bakal terus ngajalankeun hukum Gusti,Salalanggengna.
45 Ka mana waé abdi indit, abdi bakal aman,Lantaran abdi néangan pituduh ti Gusti.
46 Abdi moal éraNyaritakeun hukum Gusti di payuneun raja-raja.
47 Abdi resep kana paréntah GustiTur kacida mikacintana.
48 Abdi bakal nadahkeun leungeun pikeun ngadoa ka Gusti, lantaran abdi cinta kana paréntah Gusti.
Abdi bakal bener-bener mikirkeun* aturan Gusti.
ז [Zayin]
49 Sing émut kana jangji* Gusti ka hamba Gusti ieu,Sabab éta téh harepan keur abdi.
50 Éta nu ngupahan abdi waktu abdi keur susah,Lantaran ucapan Gusti ngajaga abdi tetep hirup.
51 Jalma lancang bébéakan moyok ka abdi,Tapi abdi henteu ngalanggar hukum Gusti.
52 Nun Yéhuwa, abdi émut kana putusan Gusti nu tos aya ti baheula,Putusan éta téh nengtremkeun haté abdi.
53 Abdi ambek pisan ka jalma jahat,Ka nu teu nurut kana hukum Gusti.
54 Di mana waé abdi matuh,*Aturan Gusti téh ibarat kawih keur abdi.
55 Pas wengi, abdi émut ka nami Gusti, nun Yéhuwa,Ku kituna abdi terus ngajalankeun hukum Gusti.
56 Éta tos jadi kabiasaan abdiLantaran abdi hoyong nurut kana pituduh Gusti.
] חHet]
57 Kagaduh abdi mah mung Yéhuwa.
Abdi tos jangji badé ngajalankeun firman Gusti.
58 Abdi sapinuh haté nyuhunkeun ka Gusti,Sing karunya ka abdi, sakumaha jangji* Gusti.
59 Abdi mariksa jalan hirup abdiSupaya tiasa nuturkeun deui pépéling ti Gusti.
60 Abdi gancang ngajalankeun paréntah ti Gusti,Éta teu diengké-engké ku abdi.
61 Jalma jahat masang tali keur ngajiret abdi,Tapi abdi teu mopohokeun hukum Gusti.
62 Pas tengah wengi, abdi sok gugah pikeun ngucap sukur ka GustiLantaran putusan Gusti téh adil.
63 Abdi nyobat jeung kabéh jalma nu hormat* ka GustiSarta nu nurut kana pituduh ti Gusti.
64 Nun Yéhuwa, bumi téh pinuh ku asih satia Gusti.
Ajarkeun aturan Gusti ka abdi.
ט [Tet]
65 Nun Yéhuwa, Gusti bageur ka hamba Gusti ieu,Sakumaha jangji* Gusti.
66 Ajar abdi sangkan abdi gaduh pangarti sarta tiasa bener waktu nimbang-nimbang perkara,Sabab abdi percaya kana paréntah Gusti.
67 Baheula abdi sering sasab* sarta jadi sangsara,Tapi ayeuna mah abdi nurut kana ucapan Gusti.
68 Gusti téh bageur, tindakan Gusti gé hadé.
Ajarkeun aturan Gusti ka abdi.
69 Jalma nu lancang nyebarkeun carita bohong ngeunaan abdi,Tapi abdi mah sapinuh haté nurut kana pituduh ti Gusti.
70 Maranéhna teu boga parasaan,Tapi abdi mah resep kana hukum Gusti.
71 Aya saéna abdi sangsara téh,Ngarah abdi tiasa diajar aturan Gusti.
72 Hukum nu ditepikeun ku Gusti téh saé keur abdi,Langkung saé tibatan rébuan keping emas jeung pérak.
] יYod]
73 Panangan Gusti ngadamel sareng ngabentuk abdi.
Pasihan abdi pangarti,Ngarah abdi tiasa diajar paréntah Gusti.
74 Jalma-jalma nu hormat* ka Gusti barungaheun ningali abdi,Lantaran abdi percaya* kana firman Gusti.
75 Nun Yéhuwa, abdi terang putusan hukum Gusti téh adil.
Abdi diantep sangsara téh lantaran Gusti satia.
76 Mugia asih satia Gusti nengtremkeun haté abdi,Sakumaha jangji* Gusti ka hamba Gusti ieu.
77 Sing karunya ka abdi, ngarah abdi tetep hirup,Lantaran abdi resep kana hukum Gusti.
78 Mugia nu lancang aréraeun,Lantaran maranéhna teu pupuguh nganyenyeri* abdi.
Tapi abdi mah bakal bener-bener mikirkeun* pituduh Gusti.
79 Mugia jalma nu hormat* ka Gusti sarta nu terang kana aturan ti GustiMihak deui ka abdi.
80 Mugia abdi sapinuh haté nuturkeun aturan Gusti,Ngarah abdi teu nandangan kaéra.
כ [Kaf]
81 Abdi ngantos-ngantos kasalametan ti Gusti,Lantaran abdi percaya* kana firman Gusti.
82 Panon parantos capé ngantosan jangji Gusti laksana,Ceuk abdi téh, ”Iraha Gusti badé ngupahan abdi?”
83 Abdi téh sapertos kantong cai tina kulit nu garing ku haseup,Tapi abdi teu mopohokeun aturan Gusti.
84 Dugi ka iraha hamba Gusti ieu kedah ngantosan?
Iraha Gusti badé ngahukum jalma-jalma nu nganiaya abdi?
85 Jalma lancang nu ngalanggar hukum Gusti ngagali lombang keur abdiNgarah abdi tigebrus ka dinya.
86 Sadaya paréntah Gusti tiasa dipercaya.
Tulungan abdi, Gusti! Aya nu teu pupuguh nganiaya abdi.
87 Maranéhna ampir-ampiran nyingkirkeun abdi ti bumi,Tapi abdi tetep taat kana pituduh Gusti.
88 Gusti téh pan nyaahan,* jadi pangjagakeun abdi supaya tetep hirup,Ngarah abdi tiasa nuturkeun pépéling nu diucapkeun ku Gusti.
ל [Lamed]
89 Nun Yéhuwa,Firman Gusti bakal tetep aya di sorga salamina.
90 Kasatiaan Gusti lumangsung ti jaman ka jaman.
Bumi kukuh diadegkeun ku Gusti, ku kituna éta terus aya.
91 Ku lantaran putusan Gusti, éta sadaya* tetep aya dugi ka ayeuna,Sabab sadayana téh hamba Gusti.
92 Lamun abdi teu mikaresep hukum Gusti,Abdi pasti tos maot ku kasangsaraan.
93 Abdi moal pernah hilap kana pituduh Gusti,Nya ku pituduh éta Gusti ngajaga abdi tetep hirup.
94 Abdi téh milik Gusti, mugia abdi disalametkeun,Lantaran abdi tos néangan pituduh Gusti.
95 Jalma jahat ngadodoho rék maéhan abdi.
Sanajan kitu, abdi mah rék bener-bener mikirkeun pépéling ti Gusti.
96 Abdi tos ningali sagala nu sampurna téh aya watesna,Ari paréntah Gusti mah teu aya watesna.
מ [Mem]
97 Sakitu cintana abdi kana hukum Gusti!
Sadinten jeput, éta bener-bener dipikirkeun ku abdi.*
98 Paréntah Gusti nungtun abdi salamina,Abdi jadi leuwih bijaksana tibatan musuh-musuh.
99 Abdi gaduh langkung seueur pangarti tibatan guru-guru abdi,Lantaran abdi bener-bener mikirkeun* pépéling ti Gusti.
100 Tindakan abdi jadi leuwih bijaksana tibatan nu karolot,Lantaran abdi nuturkeun pituduh Gusti.
101 Abdi pantrang kana lampah jahat,Lantaran hayang ngajalankeun firman Gusti.
102 Abdi henteu ingkar tina putusan Gusti,Sabab abdi tos diajar ku Gusti.
103 Ucapan Gusti téh amis karasana,Leuwih amis tibatan madu!
104 Tindakan abdi bijaksana lantaran dipasihan pituduh ku Gusti,Éta sababna abdi geuleuh kana sagala lampah salah.
נ [Nun]
105 Firman Gusti téh lampu nu nyaangan léngkah abdiSarta cahaya nu nyaangan jalan abdi.
106 Abdi tos sumpah badé nurut kana putusan Gusti nu adil,Abdi badé ngajalankeunana.
107 Abdi téh sangsara pisan.
Nun Yéhuwa, jaga abdi tetep hirup sakumaha jangji* Gusti.
108 Nun Yéhuwa, tampi pujian nu disanggakeun ku abdi sabagé korban sukaréla,*Sareng ajarkeun putusan Gusti ka abdi.
109 Unggal waktu, abdi nyorang bahaya,Tapi abdi teu mopohokeun hukum Gusti.
110 Jalma jahat masang jiret keur abdi,Tapi abdi teu ngalanggar pituduh Gusti.
111 Abdi moal bakal mopohokeun pépéling ti Gusti,*Sabab éta nu nyukakeun haté abdi.
112 Abdi boga tékad rék taat kana aturan GustiSalamina, nepi ka ahir.
] סSamekh]
113 Abdi ngéwa ka jalma nu midua haté,Ari abdi mah mikacinta hukum Gusti.
114 Gusti téh panyalindungan jeung taméng abdi,Lantaran abdi percaya* kana firman Gusti.
115 Nyalingkir ka ditu, hé jalma-jalma jahat,Supaya abdi bisa taat kana paréntah Allah abdi.
116 Nun Gusti, dukung abdi sakumaha jangji* Gusti,Ngarah abdi tetep hirup.
Ulah dugi ka abdi kuciwa* lantaran harepan abdi teu laksana.
117 Dukung abdi sangkan salamet,Ku kituna abdi tiasa terus merhatikeun aturan Gusti.
118 Gusti nampik sadaya nu ngalanggar aturan Gusti,Sabab maranéhna téh tukang bohong jeung tukang tipu.
119 Gusti miceun kabéh jalma jahat di bumi kawas miceun runtah,Éta sababna abdi misuka pépéling ti Gusti.
120 Abdi ngadégdég lantaran sieun ka Gusti,Abdi gimir ku putusan hukum ti Gusti.
ע [Ayin]
121 Abdi tos ngalampahkeun nu bener jeung adil.
Abdi ulah diserahkeun ka jalma-jalma nu sok nindes!
122 Pasihan jaminan yén Gusti badé nulungan hamba Gusti ieu,Ulah dugi ka jalma nu lancang nindes abdi.
123 Panon abdi capé ngantosan kasalametan ti GustiSarta ngantosan jangji* Gusti nu bisa dipercaya laksana.
124 Témbongkeun asih satia ka hamba Gusti ieu,Sarta ajarkeun aturan Gusti ka abdi.
125 Abdi téh hamba Gusti, jadi pasihan abdi pangartiSangkan abdi paham kana pépéling ti Gusti.
126 Nun Yéhuwa, tos waktuna Gusti ngahukumJalma-jalma nu ngalanggar hukum Gusti.
127 Éta sababna, abdi leuwih cinta kana paréntah ti GustiTibatan kana emas, sanajan emasna téh emas murni.
128 Keur abdi mah, sadaya pituduh Gusti téh bener.
Abdi geuleuh kana sagala lampah salah.
פ [Pe]
129 Pépéling ti Gusti téh saé pisan,Éta sababna ku abdi dituturkeun.
130 Waktu firman Gusti diterangkeun, éta téh nyaangan,Méré pangarti ka nu teu boga pangalaman.
131 Abdi haus kana paréntah Gusti,Abdi hoyong pisan ngadangukeun.
132 Perhatikeun abdi sarta sing karunya ka abdi,Sakumaha putusan Gusti keur jalma-jalma nu cinta ka nami Gusti.
133 Bingbing léngkah abdi ku ucapan Gusti ngarah abdi salamet.*
Ulah dugi ka abdi diéléhkeun ku kajahatan.
134 Salametkeun* abdi ti jalma-jalma tukang nindesNgarah abdi bisa ngalaksanakeun pituduh ti Gusti.
135 Témbongkeun, Gusti téh resep ka hamba Gusti ieu,Sarta ajar abdi aturan Gusti.
136 Panon abdi banjir cimataLantaran jalma-jalma teu nurut kana hukum Gusti.
צ [Tsade]
137 Nun Yéhuwa, Gusti téh bener.
Putusan Gusti gé adil.
138 Pépéling ti Gusti téh benerSarta bisa dipercaya pisan.
139 Sumanget pikeun ngabdi ka Gusti ngagedur dina diri abdi,Lantaran musuh-musuh abdi geus nyapirakeun firman Gusti.
140 Ucapan Gusti téh murni,Éta dipikaresep ku hamba Gusti ieu.
141 Abdi téh disapirakeun jeung dianggap hina,Tapi abdi teu mopohokeun pituduh Gusti.
142 Kaadilan Gusti téh aya keur salalanggengna.
Hukum Gusti téh bener.
143 Sanajan susah jeung sangsara,Abdi tetep mikaresep paréntah Gusti.
144 Pépéling ti Gusti téh salawasna bener.
Pasihan abdi pangarti ngarah abdi tetep hirup.
ק [Qof]
145 Sapinuh haté abdi sasambat ka Gusti. Jawab abdi, nun Yéhuwa.Aturan Gusti bakal diturut ku abdi.
146 Abdi sasambat ka Gusti, salametkeun abdi!
Abdi bakal nuturkeun pépéling ti Gusti.
147 Sateuacan panonpoé bijil, abdi tos gugah pikeun ménta tulung ka Gusti,Lantaran abdi percaya* kana firman Gusti.
148 Tengah wengi abdi gugahSangkan tiasa bener-bener mikirkeun* ucapan Gusti.
149 Nun Yéhuwa, dangukeun ucapan abdi, pan Gusti téh nyaah* ka abdi.
Jaga supaya abdi tetep hirup, pan Gusti téh adil.
150 Jalma-jalma nu kalakuanana ngérakeun* daratang rék nyilakakeun abdi.
Maranéhna ngajauh ti hukum Gusti.
151 Nun Yéhuwa, Gusti téh caket sareng abdi.
Sadaya paréntah Gusti téh bener.
152 Ti kapungkur abdi tos diajar aturan-aturan Gusti,Sadayana tos ditetepkeun ku Gusti pikeun aya salamina.
ר [Res]
153 Gusti, tingali abdi téh sangsara, salametkeun abdi,Sabab abdi teu mopohokeun hukum Gusti.
154 Béla* abdi, salametkeun abdi,Jaga supaya abdi tetep hirup sakumaha jangji* Gusti.
155 Jalma jahat mah moal disalametkeun,Sabab maranéhna teu daék nurut kana aturan Gusti.
156 Kacida ageungna welas asih Gusti téh, nun Yéhuwa.
Jaga supaya abdi tetep hirup, lantaran Gusti téh adil.
157 Seueur pisan nu nganiaya jeung nu ngamusuh ka abdi,Tapi abdi mah teu mopohokeun pépéling ti Gusti.
158 Abdi geuleuh pisan ka jalma-jalma nu sok ngahianat,Lantaran maranéhna mah teu nurut kana ucapan Gusti.
159 Sakitu cintana abdi kana pituduh Gusti!
Nun Yéhuwa, jaga abdi supaya tetep hirup, sabab Gusti téh Allah nu nyaahan.*
160 Sadaya firman Gusti téh bener,Sarta sadaya putusan Gusti nu adil bakal terus aya salalanggengna.
] שSin] atawa [Syin]
161 Para pamingpin teu pupuguh nganiaya abdi,Tapi abdi mah tajub kana firman Gusti.
162 Abdi gumbira ku ucapan GustiKawas jalma nu manggih loba harta.
163 Abdi geuleuh, geuleuh pisan kana omongan bohong,Tapi abdi cinta kana hukum Gusti.
164 Tujuh kali sadinten abdi muji GustiLantaran putusan Gusti téh adil.
165 Jalma nu cinta kana hukum Gusti bakal ngarasa tengtrem pisan.
Moal aya nu bisa ngalantarankeun maranéhna titajong.*
166 Nun Yéhuwa, abdi miharep disalametkeun ku Gusti.
Abdi taat kana paréntah Gusti.
167 Abdi terus nuturkeunSarta bener-bener misuka pépéling ti Gusti.
168 Abdi taat kana pituduh jeung pépéling ti Gusti,Lantaran Gusti terang kana sagala nu dilampahkeun ku abdi.
ת [Taw]
169 Nun Yéhuwa, mugia panyambat abdi ménta tulung dugi ka Gusti.
Mugia ucapan Gusti masihan abdi pangarti.
170 Mugia paménta abdi didangu ku Gusti,Sarta mugia abdi disalametkeun, sakumaha jangji* Gusti.
171 Mugia biwir abdi terus ngucapkeun pujian kanggo Gusti,Lantaran Gusti ngajarkeun aturan Gusti ka abdi.
172 Ucapan Gusti bakal dinyanyikeun ku abdi,Lantaran sadaya paréntah Gusti téh bener.
173 Mugia panangan Gusti siap nulungan abdi,Lantaran abdi milih pikeun taat kana pituduh Gusti.
174 Nun Yéhuwa, abdi ngantos-ngantos kasalametan ti Gusti,Abdi gé resep kana hukum Gusti.
175 Mugia abdi tetep hirup supaya tiasa muji Gusti.
Mugia putusan Gusti nulungan abdi.
176 Abdi kawas domba nu nyasab. Pilarian hamba Gusti ieu,Lantaran abdi teu mopohokeun paréntah Gusti.
Catetan Tambihan
^ Atawa ”jalma nu terus satia”.
^ Atawa ”bakal diajar”.
^ Atawa ”Hamba Gusti ieu mah diajar”.
^ Atawa ”bisa diajar”.
^ Atawa ”nandangan kaéra”.
^ Atawa bisa jadi ”Ku lantaran haté abdi diyakinkeun”.
^ Atawa ”ucapan”.
^ Atawa bisa jadi ”Sakumaha jangji Gusti ka jalma-jalma nu sieun ka Gusti”.
^ Atawa ”ucapan”.
^ Atawa ”abdi ngantosan”.
^ Atawa ”bakal diajar”.
^ Atawa ”ucapan”.
^ Atawa ”matuh salaku urang asing”.
^ Atawa ”ucapan”.
^ As. ”sieun”.
^ Atawa ”ucapan”.
^ Atawa ”abdi teu ngahaja nyieun dosa”.
^ As. ”sieun”.
^ Atawa ”ngaharep”.
^ Atawa ”ucapan”.
^ Atawa bisa jadi ”Lantaran maranéhna nganyenyeri jeung ngabohong ka”.
^ Atawa ”bakal diajar”.
^ As. ”sieun”.
^ Atawa ”ngaharep”.
^ As. ”nunjukkeun asih satia”.
^ Nyaéta sadaya ciptaan Allah.
^ Atawa ”Sadinten jeput, abdi diajar hal éta”.
^ Atawa ”abdi diajar”.
^ Atawa ”ucapan”.
^ As. ”korban sukaréla tina biwir abdi”.
^ Atawa ”Pépéling ti Gusti téh warisan nu langgeng keur abdi”.
^ Atawa ”ngaharep”.
^ Atawa ”ucapan”.
^ Atawa ”éra”.
^ Atawa ”ucapan”.
^ Atawa ”ngarah abdi mantep ngaléngkah”.
^ As. ”Tebus”.
^ Atawa ”ngaharep”.
^ Atawa ”diajar”.
^ As. ”nunjukkeun asih nu satia”.
^ Atawa ”bejad”.
^ Atawa ”Urus kasus hukum”.
^ Atawa ”ucapan”.
^ As. ”nu nunjukkeun asih satia”.
^ Atawa ”Moal aya hahalang keur maranéhna”.
^ Atawa ”ucapan”.
