Kajadian 23:1-20
-
Sara maot tuluy dikuburkeun (1-20)
23 Sara hirup nepi ka umur 127 taun.
2 Terus Sara maot di Kiriat-arba, nyaéta di Hébron di tanah Kanaan. Ibrahim meni sedih tuluy nyeungceurikan Sara.
3 Sanggeus nyeungceurikan pamajikanana nu geus maot, Ibrahim cengkat pikeun manggihan urang Hét. Manéhna ngomong,
4 ”Abdi téh urang asing nu cicing di daérah aranjeun. Abdi badé mésér tanah kanggo nguburkeun istri abdi nu nembé maot.”
5 Kieu jawaban urang Hét ka Ibrahim,
6 ”Jadi kieu, Juragan, abdi sadaya nganggap Juragan téh pamingpin nu dipilih ku Allah.* Mangga waé upama Juragan badé nguburkeun istri Juragan mah. Sok pilih tempat nu pangsaéna. Sadayana gé pasti satujueun mun tanahna dianggo nguburkeun istri Juragan.”
7 Jadi Ibrahim nangtung tuluy dongko ka urang Hét, penduduk nagri éta,
8 terus ngomong ka maranéhna, ”Upami aranjeun satuju abdi nguburkeun istri abdi di dieu, punten pangnepikeun ka Éfron anak Zohar
9 sina ngajual Guha Makhpéla milikna, nu aya di sisi tanahna. Sabaraha waé hargana, ku abdi bakal dibayar di payuneun aranjeun, ngarah abdi gaduh tempat keur nguburkeun istri abdi.”
10 Ari Éfron keur diuk bareng jeung urang Hét. Jadi, Éfron urang Hét éta ngajawab Ibrahim bari didéngé ku urang Hét séjénna jeung di hareupeun kabéh jalma nu asup ka gerbang kota éta. Kieu cenah,
11 ”Ulah atuh, Juragan! Kieu wéh, guha jeung tanahna dipasihkeun ku abdi. Di payuneun bangsa abdi, éta dipasihkeun ka Juragan. Mangga kuburkeun istri Juragan di dinya.”
12 Ngadéngé kitu, Ibrahim dongko di hareupeun penduduk nagri éta,
13 tuluy ngomong ka Éfron bari didéngé ku maranéhna, ”Punten, dangukeun abdi. Sabaraha waé harga tanah éta ku abdi bakal dibayar. Mangga tarima pérak ti abdi supaya abdi tiasa nguburkeun istri abdi di dinya.”
14 Tuluy Éfron ngajawab Ibrahim,
15 ”Juragan, dangukeun abdi. Tanah éta hargana 400 syékel* pérak, tapi éta mah teu penting lah. Mangga kuburkeun wéh istri Juragan di dinya.”
16 Sanggeus ngadéngé omongan Éfron, Ibrahim nimbang pérak sajumlah nu disebutkeun ku Éfron di hareupeun urang Hét séjénna, nyaéta 400 syékel* pérak nurutkeun timbangan nu dipaké ku para padagang.
17 Ku kituna, tanah di Makhpéla milik Éfron, nu aya di deukeut Mamré, kaasup guha jeung sakabéh tangkal nu aya di dinya, disahkeun jadi
18 milik Ibrahim. Tanah éta dibeuli di hareupeun urang Hét jeung di hareupeun kabéh jalma nu asup ka gerbang kota éta.
19 Geus kitu, Ibrahim nguburkeun Sara pamajikanana di guha nu aya di tanah Makhpéla deukeut Mamré, nyaéta di Hébron, di tanah Kanaan.
20 Kitu caritana tanah jeung guha nu aya di dinya diserahkeun ku urang Hét pikeun jadi tanah makam milik Ibrahim.
Catetan Tambihan
^ Atawa bisa jadi ”pamingpin nu hébat”.
^ 1 syékel = 11,4 g. Tingali Lamp. B14.
^ 1 syékel = 11,4 g. Tingali Lamp. B14.
