Nu Ditulis ku Matius 8:1-34
8 Sanggeus manéhna turun ti gunung, loba jalma nuturkeun manéhna.
2 Jol jalma nu boga panyakit kusta nyampeurkeun jeung sujud ka manéhna, terus ngomong, ”Juragan, lamun daék mah Juragan bisa nyageurkeun abdi.”
3 Isa nyodorkeun leungeunna jeung nyabak manéhna bari ngomong, ”Urang daék! Heug geura cageur.” Panyakit kustana langsung leungit.
4 Geus kitu Isa ngomong ka manéhna, ”Omat, ulah bébéja ka sasaha nya. Tapi, jung indit ka imam ménta dipariksa. Geus kitu béré kurban sakumaha nu diatur ku Hukum Musa ngarah maranéhna nyaho manéh téh geus cageur.”
5 Barang asup ka Kapernaum, Isa disampeurkeun ku saurang perwira nu ménta tulung,
6 ceuk manéhna, ”Pa, palayan abdi ngalempréh baé di imah lantaran lumpuh, meni ripuh pisan.”
7 Isa ngajawab, ”Engké urang indit ka ditu, urang cageurkeun.”
8 Tapi ceuk éta perwira, ”Pa, abdi teu layak narima Bapa di imah abdi. Geus wéh ngomong ti dieu palayan abdi sina cageur, da pasti manéhna cageur.
9 Abdi gé saurang bawahan jeung boga prajurit-prajurit bawahan. Lamun abdi nitah nu hiji, ’Geura indit!’ manéhna bakal indit, lamun nitah nu séjén, ’Ka dieu!’ manéhna bakal nyampeurkeun, jeung lamun nitah palayan abdi, ’Gawékeun yeuh!’ pasti digawékeun.”
10 Basa ngadéngé omonganana, Isa tajub jeung ngomong ka jalma-jalma nu naluturkeun, ”Bener ieu mah, di Israél, urang can pernah manggihan jalma nu boga iman sakitu gedéna.
11 Urang ngabéjaan, bakal loba nu daratang ti wétan jeung kulon, diuk sarta dahar bareng jeung Ibrahim, Ishak, sarta Yakub di Pamaréntahan sorga.
12 Tapi, jalma-jalma nu sakuduna jadi bagian ti Pamaréntahan* sorga bakal dijongklokkeun ka luar ka nu poék. Di dinya maranéhna bakal careurik bari jeung huntuna tingkereket.”
13 Geus kitu, Isa ngomong ka éta perwira, ”Jung ayeuna mah balik wéh. Lantaran manéh boga iman, kahayang manéh bakal laksana.” Harita kénéh, palayanna cageur.
14 Terus, Isa ka imahna Pétrus. Manéhna ningali mitohana Pétrus nu awéwé keur ngagolér lantaran muriang.
15 Ku Isa leungeunna dicekel, harita kénéh muriangna cageur. Manéhna hudang tuluy ngaladénan Isa.
16 Ka sorénakeun, loba jalma daratang mawa jalma-jalma nu kasurupan ku roh-roh jahat. Ngan ku sakecap, Isa ngusir roh-roh jahat éta. Kitu deui, nu garering kabéh dicageurkeun.
17 Ku kituna, naon nu diomongkeun liwat Nabi Yésaya laksana, nyaéta, ”Manéhna anu nyageurkeun panyakit urang jeung ngaleungitkeun kanyeri urang.”
18 Basa Isa nempo loba jalma ngagimbung, manéhna ngajak murid-muridna indit ka peuntaseun.
19 Ari pék téh aya saurang ahli Torét nu nyampeurkeun tuluy ngomong, ”Guru, ka mana baé gé abdi rék milu.”
20 Tapi, Isa ngajawab, ”Rubah baroga liang, manuk baroga sayang, tapi Putra manusa mah teu boga tempat keur saré-saré acan.”
21 Terus aya murid séjén ngomong ka manéhna, ”Juragan, abdi ménta idin rék nguburkeun heula bapa.”
22 Ku Isa dijawab, ”Terus tuturkeun urang. Keun baé nu maot mah sina nguburkeun nu maot.”
23 Tuluy manéhna naék ka parahu dituturkeun ku murid-muridna.
24 Ujug-ujug di éta situ aya angin ribut, parahuna diteumbragan ku ombak nepi ka kaasupan cai. Tapi, Isa mah saré.
25 Murid-muridna ngahudangkeun manéhna, tuluy ngagorowok, ”Juragan tulungan! Urang téréh paéh!”
26 Tapi ceuk manéhna, ”Ku naon bet sarieun, kurang iman nya maranéh téh?” Tuluy, manéhna hudang, nyentak angin jeung situ. Rep wéh kaayaanana jadi tenang.
27 Murid-murid olohokeun jeung ngomong, ”Saha sabenerna manéhna téh, nepi ka angin jeung situ gé nurut ka manéhna?”
28 Pas nepi ka peuntaseun, nyaéta daérah urang Gadara, Isa didatangan ku dua lalaki nu kasurupan roh jahat, jolna téh ti antara makam-makam. Duanana kacida garalakna nepi ka euweuh nu wani ngaliwatan jalan éta.
29 Éta dua jelema ngagorowok, ”Rék naon manéh ka dieu, Putra Allah? Rék nyiksa urang saacan waktuna?”
30 Rada jauh ti dinya, aya sakumpulan babi nu keur nyaratu.
31 Éta roh-roh jahat ménta ka Isa, ”Ari rék ngusir mah idinan urang saréréa nyurup ka babi-babi éta.”
32 Isa ngajawab, ”Jig!” Tuluy roh-roh jahat kalaluar ti dua lalaki éta, seug nyarurup ka babi-babi. Geus kitu, babi-babina ngabalecir ka sisi gawir, ngarajleng ka situ. Kabéh paraéh tingkerelep.
33 Ari tukang ngangonna kalabur ka kota. Maranéhna ngalaporkeun sakabéh kajadianana, ogé nyaritakeun dua lalaki nu tadina kasurupan téa.
34 Sakabéh jalma di kota éta murubul kaluar manggihan Isa, ngadesek manéhna indit ti daérah éta.
Catetan Tambihan
^ As. ”putra-putra Pamaréntahan”.
