Nahum 1:1-15
1 Warta keur Niniwé: Buku ngeunaan titingalian nu ditarima ku Nahum* urang Élkos:
2 Allah Yéhuwa téh ménta supaya urang ngabdi ngan ka Anjeunna hungkul.Yéhuwa bakal ngahukum musuh-musuh-Na.
Anjeunna moal mopohokeun kajahatan maranéhna, sarta amarah-Na bakal ngagedur ka maranéhna.Yéhuwa bakal ngabales musuh-musuh-Na.
3 Yéhuwa téh teu gancang ambek sarta gedé kawasa-Na.Tapi nu jahat mah moal luput tina hukuman Yéhuwa.
Anjeunna ngagunakeun angin ribut jeung angin topan.Kumpulan méga* téh jadi kawas kekebul dina sampéan-Na.
4 Barang laut disentak ku Anjeunna, caina garing.Kabéh walungan gé jadi saat.
Tutuwuhan di Basyan jeung Karmél gararing,Kekembangan di Lébanon gé layu.
5 Ku karana Anjeunna, gunung-gunung aleundeur,Pasir-pasir* lalééh.
Bumi ngadégdég payuneuna-Na,Kitu ogé jeung dunya tur pangeusina.
6 Lamun Anjeunna geus ambek, saha nu bisa tahan?
Saha nu kuat nyanghareupan amarah-Na nu ngagedur?
Amarah-Na ngagedur kawas seuneu.Ku karana Anjeunna, batu-batu cadas gé bakal ancur lebur.
7 Yéhuwa téh bageur, bénténg dina mangsa kasusah.
Saha waé nu nyalindung ka Anjeunna tangtu dijaga.*
8 Ku banjir nu ngagulidag, Niniwé bakal béak dibasmi.Musuh-musuh Allah bakal diudag-udag ku poék.
9 Éh maranéh nu rék ngalawan Yéhuwa, mémangna maranéh boga rencana naon?
Maranéh bakal béak dibasmi ku Anjeunna.
Teu kudu nepi ka dua kali Anjeunna ngabasmi maranéh téh.
10 Najan urang Niniwé kawas rungkun cucuk nu pacangreudSarta kawas jalma nu mabok ku bir,*Maranéhna bakal béak kaduruk kawas jarami garing.
11 Ti manéh, Niniwé, bakal aya nu boga rencana jahat rék ngalawan Yéhuwa.Manéhna bakal méré naséhat nu euweuh gunana.
12 Ieu nu diucapkeun ku Yéhuwa,
”Sakumaha kuat jeung lobana urang Asiria,*Maranéhna bakal dibasmi jeung dipaéhan.
Éh Yéhuda, Kuring geus ngahukum manéh, tapi moal deui-deui.
13 Kuring rék motongkeun kai tanggungan musuh nu ngabeungbeuratan manéh.Ranté-ranté anu dipaké ngaborgol manéh rék dipegat-pegatkeun.
14 Ngeunaan Asiria, Yéhuwa geus méré paréntah,’Manéh moal bakal boga turunan nu neruskeun ngaran manéh.
Patung ukiran jeung patung logam nu aya di kuil allah-allah manéh ku Kuring rék disingkir-singkirkeun.
Manéh ku Kuring rék dipangnyieunkeun kuburan lantaran manéh pikageuleuheun.’
15 Tuh, tempo! Aya jalma nu leumpang di gunung-gunung bari mawa warta hadé,Jalma nu mawa béja pitengtremeun.
Éh Yéhuda, ayakeun perayaan-perayaan manéh, tedunan ikrar manéh.Jalma-jalma jahat moal bakal nyerang manéh deui.
Maranéhna bakal béak diancurkeun.”
Catetan Tambihan
^ Hartina ”Nu Negerkeun”.
^ Atawa ”awan”.
^ Atawa ”Bukit-bukit”.
^ Atawa ”dipikirkeun”. As. ”dikenal”.
^ Atawa ”bir tina gandum”.
^ As. ”maranéhna”. Asiria téh nagri nu ibu kotana nyaéta Niniwé.
