Nahum 3:1-19
3 Cilaka éta kota!
Jalma-jalmana resep maéhan, resep pisan nipu jeung ngarampog,
Haben wéh mawaan mamangsan!
2 Déngékeun, aya sora pecut tingjalebréd jeung roda tinggurudug.Tingali kudana nu gagah jeung karétana nu ngabelesat.
3 Aya nu tumpak kuda, pedangna ngaburinyay, jeung tumbakna ngagurilap.Aya loba pisan nu dipaéhan, mayit-mayit patumpang tindih,Tinggolépak teu kaitung lobana,
Matak titajong jalma-jalma.
4 Kitu téh pédah manéhna ngalacur waé.Manéhna geulis jeung mikat ati, ahli kana sihir.Bangsa-bangsa kajiret ku palacuranana, kulawarga-kulawarga kapélét ku sihirna.
5 Yéhuwa, pangawasa pasukan sorga, ngucap kieu, ”Kuring nu rék ngalawan manéh.*Jubah manéh rék disingsatkeun nepi ka nutupan beungeut manéh.Keun bangsa-bangsa sina ngalalajoan manéh taranjang,Karajaan-karajaan sina nempo manéh diéra-éra.
6 Manéh ku Kuring rék dialungan kokotor.Manéh bakal direndahkeun.Manéh ku Kuring bakal dijadikeun tongtonan.
7 Sing saha nu ningali manéh bakal lumpat jeung ngomong,’Niniwé geus diburak-barik!
Saha nu bakal karunya?’
Aya kitu nu daék ngupahan manéh?
8 Mémangna manéh leuwih hadé kitu tibatan No-amon,* nu boga Walungan Nil?
Sakuriling manéhna téh cai.Laut téh sumber kakayaan jeung bénténgna.
9 Kakuatanana nu teu aya watesna téh asalna ti Étiopia jeung Mesir.
Urang Put jeung Libia gé jadi baladna.
10 Najan kitu, angger wéh manéhna jadi tawanan,Diboyong ka pangbuangan.
Barudakna ditareunggeulan di jalan-jalan nepi ka paraéh.
Para pamingpinna diundi pikeun dijadikeun budak beulian.Jalma-jalma pentingna diborgol ku ranté.
11 Niniwé, manéh gé bakal mabok.Manéh bakal nyumput,
Néangan panyalindungan ti musuh-musuh.
12 Bénténg-bénténg manéh kawas tangkal ara nu buahna* geus arasak.Lamun tangkalna diendag-endag, buahna maruragan tuluy dicaplukan.
13 Prajurit-prajurit manéh téh lemah kawas awéwé.
Gerbang-gerbang kota manéh marolongo, nu matak musuh-musuh bisa arasup.
Palang-palang gerbang manéh bakal béak diduruk.
14 Kumpulkeun cai, manéh rék dikepung!
Bénténg-bénténg manéh kudu dikuatan.
Téangan tempat nu pinuh ku leutak, tincakan taneuh liketna,Sok jieunan bata.
15 Najan kitu, seuneu bakal ngaduruk manéh,
Pedang bakal nyabet manéh.
Manéh bakal musna kawas pepelakan nu dihakan ku simeut ngora.
Pék wéh ari penduduk manéh rék beuki loba kawas simeut mah!
Sok wéh ari rék ngalobaan mah!
16 Padagang-padagang manéh ngalobaan, leuwih loba tibatan béntang-béntang di langit.
Simeut ngora ngaleupaskeun kulitna tuluy hiber.
17 Para pangawal manéh kawas simeut,Para pajabat manéh kawas simeut nu ngagimbung.
Waktu hawana keur tiis, maranéhna nyalindung dina sela-sela témbok batu.Barang bray panonpoé, maranéhna haliber,Euweuh nu nyaho ka mana jigna.
18 Éh raja Asiria, pangangon-pangangon manéh tarunduheun.Para bangsawan manéh caricing di imahna.
Rahayat manéh papencar di gunung-gunung.Euweuh nu ngumpulkeun maranéhna.
19 Moal bakal aya nu mantuan manéh waktu musibat narajang.
Raheut-raheut manéh moal bisa diubaran.
Kabéh nu ngadéngé béja ngeunaan manéh bakal kaleprok,Da saha anu teu pernah ngarasakeun kabengisan manéh nu taya ahirna?”
